Read Karbi KECHENG 49 Bible Online

KECHENG 49 - Karbi bible

KECHENG 49

¹Jakob asomar atum aphan hangpet-lo, lapen pulo, “Nedung chingrum petnon, lapen mononphi nangtum aphan kopi plangjima ne nangthanpo”:

²“Vangpet-ra arjutha, Jakob asomar atum an. Nangpo Israel alam arjutha.”

³“Reuben, nang neso akleng, nangke nejakong-lo Lapen nekai angbong keplangsi a-nesolo, Nesomar angbong an ning kechethenei lapen kangtangnei abang-lo.

⁴Nang ke ketosai alangthepi asonlo, Bonta nangle anongkedonei abang kalidetji, Pima ne-ke-enpangtar a-arloso pen nang irap-rap-lo Lapen nangpo ahongplang pangthirthelo.

⁵‘Simeon lapen Levi atum kortetelo. Latum kephangnojisi latum arisim che-ot-lo.

⁶Latum kechepalamso akechingki along ne dodunde, Latum amei along ne dodunde, Pima latum aningthi si monit pathilo Lapen kepathu aphan latum chainong akeng palok-lo.

⁷Latum aning kethi aputhak pahirjunonang, pima la phere memepik, Lapen latum aning kesedeng aputhak, pima la hingnopik. Israel adang bithe ne latum aphan papratseiji. La arat atum angbong ne latum aphan hijikjamji.’ ”

⁸“Judah, nangkorte atum nangphan nangrohurji. Nang nanghotur atum aphan achethok tumlokpo. Nangkorte atum nangphan ardomriji.

⁹Judah ke hingho ason, Kepathiji api pathipo lapen angthor chedampo, Chephajengsi domjoipo. Baduta laphan padosojohai abang avelo.

¹⁰Judah ke recho achin ot-longpo, Lapen la aso-asu si kaiketa pangriverpo. Det atum alanglilong dan vanprelo.

¹¹La adrakha rikang along gadha aso kokpo, Drakha akemenei along. La ape-ari keprungchop adrakha ahorlang avi along chechokpo.

¹²Drakha ahorlang kejun pen la amek ertanpo, Chulang kejun apot la aso loktaipo.”

¹³“Zebulun ke talo akung si dopo. La atalo akung ke telongpi aphan sining plangpo. La ahoi Sidon anat an ta ledampo.”

¹⁴“Issakar ke gadha alonrek ta avedetji Karlu athoila angbong ketilaichot agadha asonpo.

¹⁵Bonta la kesang aphan adim mesen asonsi chethekpo Lapen longle ta laphan palangmesenpo. Lasi la keponjisi athoila chethuipo Lapen ban asonsi kam klemjokje detpo.”

¹⁶“Dan ke arat aphan inut kepangri abang plangpo, Latum akaprek Israel akhei atum ason plangpo.

¹⁷Dan ke tovar akung apherui ason plangpo, Tovar akung abi kedo apherui asonpo, Losei akeng archu dunpo, Anke kardon abang aphan aphi vardup-po.”

¹⁸“Nang akejok aphansi ne cholangding-lo, HEMPHU.”

¹⁹“Gad aphan ke kethiparohum atumsi tengkhengpo, Bonta la chetevarsi halatum aphan hungdunpo.”

²⁰“Asher alongle mesen asok longpo. La recho kechomeme a-an vanpipo.”

²¹“Naphtali ke kekatvir athijok-lo , Kelangmeme ke-etjo arong kedo abang-lo.”

²²“Joseph ke lang amek akung kedo ingnam gadha ason, Inglong akeng-ri kedo alosei aso ason.

²³La ahotur atum ketengkheng pasikpikji Lapen laphan halatum athai lapen aso pen hungji.

²⁴Bonta la thai chedothingji, Lapen la ari chepangtang-lo Jakob a-Arnam Jakongtheparpik a-Bang ajakong pen ajok, Kevi a-Bang, Israel aphan ke Rai a-Bang pen ajok.

²⁵La nangpo a-Arnam si nangphan nangrap-lo, Nangphan kepahirjume abang Jakongkethe Arnamsi Angsong pen arve ason kedo-an ahirjume pilo Lapen longle arlo pen karnukpik alang-heihei, Ongdung achainong lapen osomar ahirjume pilo.

²⁶Sok athe lapen mir-heihei ahirjume, Hako anglongpi-heihei ahirjume, Kaike kedover anglong-heihei akelangmeme amar. Lahei ahirjume Joseph aphuthak paklolongnang, Akorte atumpen kepaprekvi abang atehang along padonang.”

²⁷“Benjamin ke ejon kehingno amahar asonlo. Adap lapen arnikangsam ta la pathilo lapen chodet-lo.”

²⁸Lahei helo Israel khei krehini atumlo, lapen la helo abangphutin asomar aphan halatum apo chelon chit kechekak ahut keputekang alamthelo.

²⁹Anke asomar atum aphan Jakob hukumpilo, “Non ne kethitang nerat atum along dunpo, lasi nepo atum alongku, ha Hitti aso ahidi Ephron alongle nepipnon,

³⁰Makhpelah along, Mamre anihang, Kanaan adet. Laso alongku lapen ahidi Abraham si Ephron pen kechepipji aphan namdunlo.

³¹Hadak si Abraham lapen alangli piso Sarah aphan pip-lo; hadaksi latum Isaak lapen apiso Rebeka aphan ta pip-lo. Hadaksi Leah aphanta pip-lo,

³²Hitti aso pen si hidi lapen la along kedo alongku namdet-lo. Nephanta hadak-le nepipnon.”

³³Asomar atum aphan Jakob kepinkhat pajut si, alangli ijoilo, lapen thilot-lo.