Read Karbi KECHENG 50 Bible Online

KECHENG 50 - Karbi bible

KECHENG 50

¹Apo aphan Joseph bamhet-lo, kechirupen amahang ingjupbomlo.

²Anke apo abang arpum mosola kepahijisi Joseph hukum pilo.

³La ni phlikep endet-lo, kaikai ateng mosola kehi apor. Ijip aso atum ta alangliphan ni throksi kep chirulo.

⁴Kechiru apor nangjut si, recho aban atum aphan Joseph pulo, “Kanghonpen recho aphan laso abirta pontha:

⁵‘Nelipo kethipo ahut, alangliphan Kanaan adet kechethiktang athiri along kepapipjisi neliphan semepatang-lo. Lasi kanghonpen neliphan padamlongra nelipo aphan papip-longtha, lapen neli chevangthupo.’ ”

⁶Recho thak-lo, “Damra nanglipo aphan pipdamnon, nangli kechechak ateng.”

⁷Lasi Joseph apo aphan kepipdamjisi damlo. Recho aban atum an, alangli kangsai ahem abarim amonit atum, lapen Ijip adet arleng kethe atum an Joseph along dunlo.

⁸Alangli ahem asor, alangli ik atum, lapen alanglipo ahemtun abangphu kedo-an alanglilong dunlo. Halatum bihek a-osomar atum, halatum abiresak, abi, lapen achainong an si Goshen alongri dochot-lo.

⁹Alanglilong hemkonglong kechethap amonit, lapen losei kardon amonit atum ta dunlo; la isi ke-ongdung asong-lo.

¹⁰Latum Jordan anihang Atad along nangkele ahut, latum penang an apor asekethe pen chirulo, lapen nithroksi kecharhe akam Joseph klemlo.

¹¹Kanaan asor Atad along halahei arat atum kechiru thek-long si, latum pulo, “Kecharhe akam Ijip aso atum keklem kopu-an akelangme!” La apotsi halaso adim Abel Mizraim . pusi irlo.

¹²Lasi alangli keputekang ason si Jakob asomar atum klemlo;

¹³alangli bang arpum latum Kanaan adet pondet-lo, lapen la Mekhpelah alongku, Mamre anihang anat, thiri aphan Hitti aso Ephron pen Abraham kenam ahidi along pip-lo.

¹⁴Apo aphan Joseph pipdet aphi, a-ik atum penpen lapen alanglilong arleng kethi kedun atum an penpen alangli Ijip chevoithulo.

¹⁵Latum apo thidet aphi, Joseph a-ik atum pulo, “Joseph jongsi nonpu ta ehijimbomlang pulote, lapen alangphan eli kepavirji pu kechoklem apot ephan alar ehuilote kosonpoma?”

¹⁶Lasi Joseph aphan latum birta lolo: “Epo thithe aphrang,

¹⁷nangphan alangli parjutoi lo, ‘Kanghonpen nangphan nang-ik atum kechokche akam keklem apot latum aphan diya detnon.’ Non lasi netum keklem kechokche apot, Nangpo a-Arnam aban atum aphan nangdiya detnon.” Laso abirta kelongpen amat Joseph chirulo.

¹⁸Anke alangli ik atum amethang alangli long vangsi laphan latum ardomlo. “Ladak nangban atum ason si netum vang-lo,” latum pulo.

¹⁹Bonta latum aphan Joseph pulo, “Nangtum phere-nangne; Arnam adim ne chekrong un-e.

²⁰Nephan nangtum kephangnoji mang-lo, bonta Arnam la akeme aphansi klemlo, pima kopisi keplang-loma, pini kerenglang arat atum ke-ongdung apran keraiji aphanlo.

²¹Nangtum thangnat ta kephereji ason ave. Nangtum aphan lapen nangsomar atum aphan ne langpo.” Lasi alangli halatum aphan aningpalutchok alam kangsam pen ning pathethulo.

²²Apo ahemtun atum pen Joseph Ijip adet dorapbomlo, alangli kethi ahut arta ningkan 110 anlo.

²³Ephraim asomar lapen asumar kethek-longjisi alangli reng-lo. Alangli Manasseh asopo Makir asomar atum aphan ahemtun angbong kethek-longjisi alangli reng-lo.

²⁴A-ik atum aphan alangli pulo, “Ne thidap-prangpo, bonta Arnam si nangtum aphan langpo, lapen Abraham, Isaak, lapen Jakob aphan kechechak alongle along a-Arnam si nangtum aphan laso adim pen nangponpo.”

²⁵Anke arat aso atum aphan seme kepatangjisi Joseph arjulo. “Nephan semetangnon.” Alangli pulo, “Halaso alongle along Arnam nangtum aphan nangjalote, nangtum along nebang arpum ta pondetpo.”

²⁶Lasi Ijip along Joseph ningkan 110 arta ahut thi-lo. Latum la abang mosola hilo lapen la sinduk arlo thapthot-lo.