Read Karbi KECHENG 7 Bible Online

KECHENG 7 - Karbi bible

KECHENG 7

¹Anke Noah aphan HEMPHU pulo, “Telong along nang lapen nanghem asor an damnon, athema laso a-ove Ne ingno nang dhoromi pet abang-lo.

²Nanglong chor throksi kangthir-et api cheponnon, alo lapen api, lapen kangthirthe api echor, alo lapen api,

³lapen kangjar avo chor throksi, alo lapen api, latum ajat pirthe athak kepadoji aphan.

⁴Athema ni throksi aphi Ne pirthe athak jophlikep niphlikep arve pajangji lapen Ne kepinchong achethe kedo-an asontin pirthe athak pen Ne pavedetji.”

⁵Lapen Noah aphan HEMPHU hukum kepi an alangli klempi-et-lo.

⁶Pirthe athak langthepi kevang ahut Noah arta ningkan pharo throk.

⁷Noah lapen asopomar lapen apiso lapen amunpimar atum pen pen alangli lang-heihei alangthepi pen kejokji aphan telong arlo lutdamlo.

⁸Kangthir api lapen kangthirthe api, lapen vo atum, lapen longle athak keklim api an,

⁹jonni jonni alo lapen api-heihei Noah pen pen Arnam Noah aphan hukum kepitang ateng pen telong arlo lutdamlo.

¹⁰Lapen ni throksi aphi langhei-hei alangthepi pirthe athak vang-lo.

¹¹Noah arta ningkan pharothrok ahut hini achiklo, krethroksi arni, halaso arni longle arlo kedo-an lang-amek ingbob et-lo, lapen sining-heihei anghap chingpudang-lo.

¹²Lapen pirthe athak jophlikep niphlikep arve jang-lo.

¹³Halaso arni amat Noah lapen asopo atum, Shem Ham lapen Japheth, lapen Noah apiso, lapen alangli sopo atum apiso bangkethom halatum pen pen telong arlo lutdamlo,

¹⁴latum lapen ajattin api, kepangreng api halatum ajattin, lapen longle athak keklim api ajattin, avo ajattin.

¹⁵Latum Noah pen pen telong arlo lutdamlo, echor-echor achethe kevangphun api kedo-an.

¹⁶Lapen latum api-alo lutdamlo, ok api an, alangliphan Arnam hukum kepi ateng pen lutdamlo. Anke Noah chethapdet aphi HEMPHU inghap ingkirlo.

¹⁷Pirthe athak langthepi jophlikep niphlikep dobomlang; lapen lang thebomlang, lapen telong panglang-lo, lapen la pirthe athak inglangpong-lo.

¹⁸Langhei-hei dothip lo lapen pirthe athak jasemetsi thelo; lapen telong lang-heihei athak inglangpong-lo.

¹⁹Lapen lang-heihei pirthe athak lapu-an thelo, sining aber kedo anglongpi-heihei kangtui an ta pip-et-lo;

²⁰inglongpi-heihei athak anta lang inglum-et-lo, lahei aphan ingrup 15 apar inglum lo.

²¹Lapen pirthe athak chethe kedo api an thi-et-lo, vo, chainong, pi atum, pirthe athak keklim api anta, lapen monit kedo an;

²²kekrengtai longle athak chethekevang api an thi-et-lo.

²³Pirthe athak kereng-et api an monit, marat api lapen vo kedo-anta HEMPHU pathi-et-lo. Ahin kebi ke Noah lapen alanglilong telong along kedo atum ansi reng-longchot-lo.

²⁴Lang ni 150 an sanserek-lo.