Read Karbi KECHENG 8 Bible Online

KECHENG 8 - Karbi bible

KECHENG 8

¹Noah lapen alanglilong telong arlo kedo api atum an aphan Arnam tengnenelang; Alangli tomon pajap-lo, lapen anke lang kethep pangcheng-lo.

²Pirthe alongle arlo pen lang amek an lapen sining angsong langthepi anghap-heihei ingkir-et-lo. Arve ingtonkok-lo,

³lapen ni pharo isira ni phokep an lang kethep apor enlo.

⁴Throksi achiklo ni kre throksi arni Ararat Anglongpi aren along telong nangsakok-lo.

⁵Lang nangthep-bomlang, lapen kep achiklo kecheng arni Inglongpi aphuchong-heihei nangklang-lo.

⁶Ni phlikep arni aphi Noah inghapso ingpulo,

⁷lapen vo-ak lo pangcheng-lo. La nangchiruiredet-lo, bonta lang hamhetik an la adung-arei kangjar pakongvaibomlo.

⁸Puthot lang ham loma hamhelangma kelangjisi Noah vothung ejon lothulo,

⁹bonta lang pirthe kedipthip-bomlang thek-longsi vothung kesangji adim longledet-lo, la puthot telong along chevang-thujuilo, lapen Noah nepdunsi arlo vandet-lo.

¹⁰Alangli ni throksi inghongthulo, lapen puthot vothung alangli lo thulo.

¹¹Laso avothung arnikangsam apor alanglilong puthot angho jit arvo angjok ing-omdongsi vanlo. Ansi lang theptang-lo pu Noah chinilo.

¹²Puthot ni throksi alangli inghongsi vothung lothulo. Laso aphong abang ke la nang-chiruiredet-lo.

¹³Noah arta ningkan 601 an ahut, kecheng achiklo kecheng arni, lang kreng-lo. Noah telong asarnung oi-lo, lapen lang-lo, lapen longle kekreng thek-long-lo.

¹⁴Hini achiklo ni ingkoira throksi arni an pirthe alongle krengpamelo.

¹⁵Noah aphan Arnam pulo,

¹⁶“Nangpiso, nangsomar atum lapen nangmunpi atum penpen telong pen barnon.

¹⁷Achethe kedo, nanglong kedo vo, pi atum, pirthe athak keklim api an pirthe athak kechanjile nang pon-et non, lapen pirthe athak pachanri-pachanjai lonang.”

¹⁸Lasi Noah damlo, lapen asomar lapen apiso lapen asomar apiso atum anta damlo.

¹⁹Lapen pi ajat an, keklim api an, vo ajat an, lapen pirthe athak keklim api an telong pen achor achor barlo.

²⁰Anke HEMPHU aphan Noah isi adovan bui pilo, lapen kangthir-et api ajattin, lapen vo kangthir ajattin, dovan athak athok pilo.

²¹Lapen HEMPHU mesen angnim ingnimlongsi, aning arlo HEMPHU chepulo, “Monit pen apot Ne longle aphan ahir-pajunonelo, athema monit aning kemathatap ke ha ok-kengjang ahut pen; Ne keklemtang ason puthot achethe kedo api aphan lang pen pavirvelo.

²²Pirthe dotik ke chili kerik apor, lapen kerot-kerim apor, kechung lapen kephang-ok, barla lapen ningkreng, ajo lapen anerlo, dobompo.”