Read Karbi KECHENG 9 Bible Online

KECHENG 9 - Karbi bible

KECHENG 9

¹Noah aphan lapen asomar aphan Arnam ahirjume pilo, latum aphan pulo, “Chanri-chanjaira pirthe paplengsetnon.

²Pirthe athak pi kedo-an lapen kangjar avo atum, longle athak keklim api an, lapen talo along a-ok kedo-an nangphan pherepo lapen pherepikpo; lahei nangridengsi hodai-et-lo.

³Kereng-et amar an nangphan, lapen nangphan kelirtir arvo ason nangkepi asonthotsi, Ne nangphan asontin amar nangpi-et-lo.

⁴Nang, achethe pen monit a-ok-le choche-chotnon, lapen pi a-ok seta la avi kedolang a-ok chochedetnon, pima vi along chethe do.

⁵Mane jongsi monit apran endet pulote, alangliphan aduk pipo, lapen Monit kepathi aphan kepathi api aphan seta kethi anpin aduk Ne piji.

⁶Monit aphan ke Arnam asonthotsi pinchong-lo, la apotsi monit inut pran karmut abangphan monitsi la aphanta pathipo.

⁷Nangsomar chanri-chanjai nangpo, ongdungsi la pirthe adang paplengset nangji.”

⁸Noah lapen asomar aphan Arnam pulo,

⁹“Langtha, nang lapen nangso-nangsu Ne kechejok aloh chepathiktang-lo,

¹⁰lapen kereng-et kepinchong api an, vo atum, chainong, lapen nanglong kedo pi amar an pen, telong pen nangkebar an pen chepathirlo.

¹¹Laso alam pensi Ne nangpen chechak-lo: Ne chechak-lo, langthepi pen ajok mononphi seta kereng-et amar an pavirvelo; langthepi puthot pirthe pavirve lo.

¹²Nang lapen kereng-et amar api an pen Ne kaike kethirver akechejok angthek lahelo,

¹³inghun-heihei along Ne thai bi po. La ke pirthe pen Ne kechepathik angthek-lo.

¹⁴Sining-inghun Ne inghun-heihei pen kedipthip ahut lapen mukak nangkeklang ahut,

¹⁵Ne nangphan lapen pi amar an aputhak chemathapo lapen kereng-et api an aputhak langthepi pen ajok pavirvelo.

¹⁶Inghun-heihei along mukak nangklang lote Ne la langpo lapen Ne pen kedo-an pirthe athak kereng-et amar angbong kaike kedover akechechak alam chemathadampo.

¹⁷La ke kereng-et amar an aphan Ne kechechak angthek-lo.”

¹⁸Telong pen kebar Noah asomar atum ke Shem, Ham, lapen Japheth. (Ham ke Kanaan apolo.)

¹⁹La bangkethom Noah asopo atum ke pirthe athak kedo-an arat atum aphusar atumlo.

²⁰Noah, inut saiketiki abang, si drakhaberi ke-echeng amonit lo.

²¹Alangli ajehak adrakha-ahorlang jundet aphi la ingrithamlo, ape chephlokjok lo, lapen apehem along reng-angse tilailo.

²²Kanaan apo Ham abang apo reng-angse ketilai thek-longsi, la barsi akorte banghini aphan thanlo.

²³Anke Shem lapen Japheth choi epak ponsi la angchun pu pu ot papringsi pehem arlo aphi chiruibom pen dambomlo, lapen halatum apo aphan pe pa-umlo, lapen apo areng-angse kethek-longle detji aphansi latum amahang chetevarvedet-lo.

²⁴Noah kebur thu ahut laphan asopo akebisi abang kopi klemtang-loma la chechinilo,

²⁵alangli pulo, “Kanaan aphan isi ahirjuno! La akorte atum aban plangpo.

²⁶HEMPHU Arnam aphan keropinon, Shem a-Arnam aphan! Kanaan ke Shem aban plangpo.

²⁷Japheth aphan Arnam pangthur nang! La aso-asu Shem arat pen padorapnang! Kanaan ke Japheth aban paplang lonang.”

²⁸Langthepi aphi Noah ningkan 350 reng-lo,

²⁹lapen kethi ahut alangli arta ningkan 950.