Read Karbi 2 SAMUEL 1 Bible Online

2 SAMUEL 1 - Karbi bible

2 SAMUEL 1

¹Sol kethi alam David arjulongdet aphi la Amalek atum aphan kehai along pen nangchevoisi Ziklag along nini sang-lo.

²Puthot arni Sol amukam pen inut ariso vang-lo. La aningke-oi chepaklangsi ape chingsek-lo, lapen aphu athak longle chebat-lo. La David along damlo lapen man kepijisi akengphu longle athak patongruilo.

³La aphan David arjulo, “Nang konat pensi kevang-lo?” “Ne Israel amukam pen jok-lo,” la thak-lo.

⁴Kopi plang-loma nephan nethantha, David pulo. Alangli thak-lo, “Ron pen netum ron-aso an kat-et-lo, Lapen netum amonit ke-ongdung atum thi-lo. Sol lapen asopo Jonathonta thilot-lo.”

⁵Sol lapen Jonathon thitang-lo pu nang kosonsi kechinilo? La aphan David arjulo.

⁶La thak-lo, “Gilboa anglong along ne kedo ahut Sol amethang achir aputhak kecharchakding neli thek-long-lo lapen ingchin aron ahemkonglong lapen losei kardon hotur atum la adung patebok-bomlo.

⁷Ansi alangli adung chelangsi neliphan nethek-lok-lo lapen nehang-lo. Neli thak-lo, ‘Kopilo, akehai!’

⁸Neli komatma pu alangli ne-arjulo lapen neli inut Amalek-lo pusi alangliphan thak-lo.

⁹Anke alangli pulo, ‘Vang-ra nephan pathinon! Ne thedung amek dotang-lo lapen thiji dokdok-lo.’

¹⁰Lasi neli arludamsi la aphan pathilot-lo, pima neli chinilo krep lote alangli thivekpo. Ansi la aphu athak pen neli recho aphutup lapen ari ke-i asang, ari pen enlo, lapen la ne nanglilong vanlo, hemphu.”

¹¹Aning oisi David ape chingsek-lo, lapen alangli amonit atum anta lasonsi klemlo.

¹²Halatum aningduksi chiru-charnap-lo lapen arnikangsam an Sol lapen Jonathon lapen HEMPHU arat Israel aphan an humlo, pima ron kechedan along ongdung amonit thinang-lo.

¹³David aphan birta kevan ariso aphan la pulo, “Nang konat penlo?” La thak-lo, “Neli inut Amalek amonit bonta neli nanglitum alongrisi kedo.”

¹⁴La aphan David arjulo, “Nang kopusonsi HEMPHU kangvaitang arecho aphan kepathihailo?”

¹⁵Ansi David amethang amonit angbong inut abangphan hangsi pulo, “Laphan pathinon! Laso amonit Amalek amonit aphan arbubopsi pathilot-lo,

¹⁶lapen Amalek aphan David pulo, ‘Nang la nang methang aphansi chevanlo. Nang HEMPHU kangvai arecho aphan pathilo pu kepu amat pen nangmethangsi nangdo dolo pu hoktang-lo.’ ”

¹⁷Sol lapen la asopo Jonathon aphuthak David laso keningri alun lunlo,

¹⁸Judah arat aphan la kepathantoijisi hukum pilo, (La Jemhar pu aloh along ketoktang kebi do.)

¹⁹Israel alang-heihei along nejalin atum thitang-lo! Angthin kethenei ne nokbe atum klitang-lo!

²⁰Gath along la pachethangsi mate Ashkelon atovarpi alongta. Philistia a-arloso atum pachehok-longri; kekroikre animsopimar atum seta aning parong longri.

²¹Gilboa anglong along arve lapen ar-e paklokledetnang. Laso ahidi an kaike pakrengtainang! Pima angthin kethe achong-heihei hadak langremsi hadak tichelo. Sol achong ta jangthu patip abang ave det-lo.

²²Jonathon athai ke pherememe Sol anokjir ta monit langle, nokbe aphan paphosi hotur an pathilo.

²³Sol lapen Jonathon ko-an manghumeme lapen inghon meme; reng rappet-lo, thirappet-lo; Vomu an sose keprap, teke an sose kangtang.

²⁴“Israel arloso atum, Sol aphan chirunon! La nangtum aphan adorkeso ape ke-er pen nangpa-ilo lapen ser asang pen nangpachingthang-lo.

²⁵‘Angthin kethe anokbe atum klitang-lo, Halatum aphan ron along pathitang-lo. Inglong along Jonathon ta thitang-lo.’”

²⁶O bong Jonathon, nangphan nening duk-lo, nang ko-an nephan kanghon meme! Nang kanghon nephan ko-an manghumeme la arloso akanghon apar memu.

²⁷“Angthin kethe anokbe atum klitang-lo halatum arisim-heihei enmolo lapen ale avetang-lo.”