Read Karbi 2 SAMUEL 10 Bible Online

2 SAMUEL 10 - Karbi bible

2 SAMUEL 10

¹Penang an arni aphi Ammon arecho Nahash thilot-lo, lapen la asopo Hanun si recho cholo.

²David Recho pulo, “Ne Hanun aphan ahok ajirpo pu paklang nangji atheke apo Nahash nephan lasonsi klemlo.” Lasi David kangjinso kepaklangjisi pherangke atum aphan toilo. Halatum Ammon nanglesi,

³Ammon ajalin atum recho aphan pulo, “Nangli mathama la nanglipo aphan aman kepaklang lapen nangliphan kangjinso kepaklangjisi David lahei amonit nanglinat nangketoilo? La kali! Latum aphan ladak la nangketoi ke rongsopi kelang chonghu pen kechiniji aphan lo, anke la etum aphan ehai longdetpo.”

⁴David apherangke atum aphan Hanun phlungjuilo lapen halatum aphan angmum ehin soivangsi halatum amilumbong ape rotdunchet-lo, lapen toiphlot-lo.

⁵Halatum hem kechedamji aphan therakpik-lo. David laso keplangtang alam arjulongsi, halatum Jeriko along dokok nangji pu lam ethe pathan damtoilo, lapen angmum vangthu pamemetik halatum vangthu nangnelo pu pathanlo.

⁶Ammon asor chinilo, latum David aphan hotur chekamlo pu, lasi halatum Beth-Rehob lapen Zobah pen suri 20 a-Siria aron-aso chohang-lo lapen Top pen suri 12 amonit ponlo, lapen Maakah arecho ta suri isi amonit rapdunlo.

⁷David la arjulong-lok pen halatum abe kethurjisi kedo-an aron-armu pen Joab aphan toilo.

⁸Ammon asor nangbarsi halatum amethang kedonangji adim charjap-lo ha Rabbah pu halatum arongsopi anghap along, lapen Siria amonit Tob lapen Maakah pen kevang atum rong angtan aklam along si arjapphrong-lo.

⁹Hotur asor Joab aphan angno lapen anung anat pen tengkheng dettahai pu chechinisi la Israel aron-aso akemenei ingvaisi Siria atum angno parjap-lo.

¹⁰Ahin an la asong ke akorte Abishai aridengsi pilo, latum ke Ammon atum anatsi pangnotoilo.

¹¹La aphan Joab pulo, “Jongsi Siria atum nephan keparem thek-long lote nang vang-ra nephan nerapnon, lapen Ammon atum jongsi nangphan paremlo pulote, ne nangphan nangrap po.

¹²Chepangtang non lapen nangthin chepathenon! Erat aphan lapen e-Arnam arongsopi-heihei aphan etum jasemet chedanpilonang, lapen HEMPHU aningkehangle papleng-lonang.”

¹³Joab lapen la amonit atum ketengkheng jisi damlo, la amat Siria atum bephlung-lo.

¹⁴Ammon asorta Siria atum kekat thek-longsi halatumta Abishai pen kat-lo lapen rongsopi anat chiruilo. Ansi Joab Ammon atum pen kechedan che-osi Jerusalem anat vangjuilo.

¹⁵Latum Siria atum aphan Israel atum paremdet-lo pu chechinisi, halatum kedo-an asong chehangpetsi chingrumlo.

¹⁶Euphratis Aroi anihang kedo a-Siria atum aphan Recho Hadadezer pahangtoilo, lapen halatum Shobak arideng Helam along vang-lo. La Zobah arecho Hadadezer aron-armu apinpolo.

¹⁷David la arjulongsi Israel asong-heihei pangrumlo, lapen Jordan Aroi hatsi Helam, Siria atum kechingrum anat kepangno phrong adim la damlo, lapen rong chedan pangcheng-lo.

¹⁸Lapen Israel atum Siria aron-armu aphan phlung-et-lo. David lapen la amonit atum losei ahemkonglong kardon bang 700 a-Siria lapen bang suri 40 losei kardon amonit aphan pathilo, lapen latum Shobak, hotur anokbe aphan arengpasolo, lapen la ron along thilot-lo.

¹⁹Hadadezer aber kedo arecho atum chechinilo, latum aphan Israel atum paremthu bomlo pu, lasi latum halatum pen chepangsamlo, lapen halatum aber dolo. Lapen Siria atum ta Ammon atum aphan mo aphi kerapdunji aphan pherephrat-lo.