Read Karbi 2 SAMUEL 15 Bible Online

2 SAMUEL 15 - Karbi bible

2 SAMUEL 15

¹Labangso aphi, Absalom amethang aphan ingchin ahemkonglong lapen losei-heihei lapen kethondun amonit bang 50 chesik-lo.

²La adapprang thursi damlo, lapen rongsopi anghap atovar adung arjaptherlo. Monit atum kangsaiji aphan recho along kevang abangphan Absalom la aphan hangsi konat pensi kevang-loma la arjupo. Kopi akhei pensi kevangma halabangso abang chethan et aphi,

³Absalom pupo, “Langtha, aron ke nanglihin anat, bonta nangli lam kedengji recho along ketoi abangphu avelang.”

⁴Lapen la pulo, “Neli kangsai abang asonte neli ko-an ingsai ingtung-loma. Anke lam kepho an mate kehangji ateng nelilong vanglongpo, lapen neli halatum aphan ahok-akangsai pidun longpo.”

⁵Absalom aphan angno angphun patongki abangphan la ari-otsi ingjuppo.

⁶Lasonsi abangphutin a-Israel kangsai kelongji aphan recho along kevang an atum aphan Absalom klemlo lapen halatum aphan la aningpadok-lo.

⁷Ningkan phli aphi David Recho aphan Absalom pulo, “Akehai, nephan Hebron along padamlongtha, lapen HEMPHU aphan ne kechechak ason paklem longtha.

⁸Ne Geshur, Siria along kedo ahut, ne HEMPHU aphan chechak-lo, nephan jongsi Jerusalem along neponlote ne alangliphan Hebron along archopo.”

⁹Ingsamjin penle damnon, pusi recho pulo. Lasi Absalom ha Hebron anat damlo.

¹⁰Bonta la Israel akhei kedo-an aphan “Nangtum pong-ut arki arjulong-lote, Absalom Hebron along recho chotang-lo!” pu kepaputoiji aphan birta lolo.

¹¹Jerusalem pen Absalom along kedun bang 200 amonit atum la akepha dunlo, halatum kehingno kemang alam chininepin lapen kedo-anta kekroi pensi dunlo.

¹²La athok kepajir ahut Ahithophel, la David Recho thanparebang aphan kehangjisi Gilo arong anat la toilo. Recho abekethur kemang atum ingtangmuchot-lo lapen Absalom abe kedun armu nangbatbomlo.

¹³Inut apherangke David aphan thanpachinilo, “Israel atum Absalom aphansi aningdok-tang-lo.”

¹⁴Lasi Jerusalem along kedo achakri atum aphan David pulo, “Absalom pen kejoknangji pulote non amat ili damnangji! Paprapnon! Kalite la dak nangle-dapprangpo lapen rongsopi kedo bangphutin aphan pathi-etpo!”

¹⁵Kalang-lo Recho! Halatum thak-lo, Nangli kepu aling nelitum keklemjisi chesik-lo.

¹⁶Lasi recho olo, la ahem asor lapen achakri atum, bang kep enpangtar a-arloso atum, recho ahem kehon atum pen apar dun-et-lo.

¹⁷Recho lapen la kedo-an amonit atum rongsopi ojapsi, halatum ajutsi ahem chingtonlo.

¹⁸Achakri atum arjupet-lo, la adung lapen la angphun kerai abang la angno damlo. Gath pen bang 600 aron-aso atum la aphi aphi dunlo,

¹⁹lapen Ittai, halatum ajalin aphan recho pulo, “Nangli kopisi nelitum along nangkedun nangpoma? Cheruira recho kemi along do dunnon. Nang ke bang adet asor, inut kechepachong abang; nangmethang adet pen heloving.

²⁰Nangli ladak ke malomso aphansi dolongchotji, lapen kopi athesi nelihem along nangli nangdunthap nangpoma? Neli methang amatta chechinine, konat-tong neli kedam nangjilone. Chevoira nanglirong asor aphanta nanglilong chepon-non lapen HEMPHU akangjinso lapen kekroithirklong nanglilong padonang.”

²¹Bonta Ittai thak-lo, “Recho, neli HEMPHU amen pen semetang-lo, neli kaiketa nangli kedam alingsi kethi anpin seta nangdunkripo.”

²²Mesenlo, David thak-lo. Nangdunbomnon! Lasi Ittai amonit kedo-an pen lapen halatum ahem asor an pen pen dunlo.

²³David asong ke-o thek-longsi rat atum ase pathesi chirudunjolo. Recho Kidron alangjeng hatsi la amonit atum anta aphi aphi dunlo, lapen halatum kejejangtang ajo atovar anat damrappet-lo.

²⁴Zadok kurusar jokta hadak dolo, lapen la along Levi atum kechejok Asinduk kangthir parphang ponlo. Halatum longle athak lunkoksi rat kedo-an rongsopi ke-o tangtetik la humhedet-lo. Abiathar kurusar ta do.

²⁵Anke Zadok aphan recho pulo, “Kechejok Asinduk rongsopi arlo ponthunon. HEMPHU jongsi neliphan ingjinsolo pulote, arnisi la kethek-longji aphan lapen la kebi adim nevanthuji.

²⁶Bonta jongsi alangli ne ingjinsose pulote, mesen, la aningkehang aling neliphan paklem lonang.”

²⁷Alangli Zadok aphan pubomlang, “Langnon, nangli lapen Abiathar lapen nanglitum asopomar banghini Ahimaaz nanglisopo lapen Abiathar asopo Jonathan pen pen pon ra rongsopi anat ningkangsam pen dam iknon.

²⁸Neli ha kejejangtang ajo langroi kehat along nangli pen birta longletik inghongverpo.”

²⁹Lasi Zadok lapen Abiathar Kechejok Asinduk Jerusalem anat ponthusi hadak dokok-lo.

³⁰David kechiru pen Oliv Anglong arlubomlo; la akeng angse lapen ningkeduk angthek aphu pe charkulunlo. La aphi kedun atum anta aphu pe charkusi chirudunlo.

³¹Ahithophel ke Absalom kehingno kethur along chelang-duntang-lo pu David arjulongsi la ardomlo, “Kanghon pen HEMPHU, Ahithophel akepare thang paplang-plenang.”

³²Arnam aphan karcho adim, aphuchong an David chebat damlo, langtha hadak Arki aso kekroi-thirklong abang ajirpo Hushai aphan chetong-lo, la ape chingseksi aphu longle chebat-lo.

³³La aphan David pulo, “Nelilong nangli nangdun seta thangta nangrapdun thekthe,

³⁴bonta nangli rongsopi kecherui pen neliphan nerapthekji lapen Absalom aphan punangpo, la apo aphan nangli kekroithirklong pen kangduk asonthot non nangli la aphanta ingdukpo. Lapen Ahithophel kepare ason an nangli un an pen khindedunnon.

³⁵Zadok lapen Abiathar kurusar atum hadaksi dolo; nangli rechohem along karjulong ason an halatum aphan than-etnon.

³⁶Halatum along asopo atum Ahimaaz lapen Jonathan dolo, lapen nangli kelong alam an halatum aphan nelilong nangtoinon.”

³⁷Lasi David ajirpo Hushai rongsopi anat Absalom nangkele ahut an ke chiruitang-lo.