Read Karbi 2 SAMUEL 17 Bible Online

2 SAMUEL 17 - Karbi bible

2 SAMUEL 17

¹Ajirding-o-elang, Absalom aphan Ahithophel pulo, “Neliphan bang suri krehini amonit pangvailongtha lapen paningve David aphi neli hungdunpo.

²La kelak lapen aning kerun ahut neli laphan tengkhengpo. La pheredukpo, lapen la amonit atum anta kat-etpo,

³lapen arloso apenan along kechevoi ason thak-thaksi la amonit kedo-an ke nanglilong van-etpo. Nangli inutnatsi pathilongchotji; ahin arat anke jokji.”

⁴Laso akepare Absalom lapen Israel ajalin atum aphan mesen asonsi thek-long-lo.

⁵Absalom pulo, “Non Hushai aphan hangtha lapen la kopitong kepujine arjudun lonang.”

⁶Hushai nanglesi la aphan Absalom pulo, “Lahelo Ahithophel netum aphan nekepare alam, La netum kroidun nangjima? Jongsi kroidun nangne pulote, nangli nelitum aphan kopisi keklem nangjima nethan iknon.”

⁷Hushai thak-lo, “Non aphan Ahithophel nang keparedun ke me-o-e.

⁸Nangli chini nanglipo, lapen la amonit atum ron kechedan unpik atum saide lapen latum aso keponpidet athokvam api ason pherememe. Nanglipo ke inut asai kethektang anokbe, la ajo amethang amonit atum along dodunde.

⁹Non amat la konatne alongku mate akaprek adim chepatu-et-lo tahai. Nangli monit aphan David tengkheng-lo pu karjulong abang, nangli monit atum remtang-lo pu si la pupo.

¹⁰Hingho ason angthin kethe anokbe seta pherepo pima nanglipo inut anokbepo lapen la amonit atum anta ron kechedan unpik atum pu Israel kedo-anta chinipet.

¹¹Neli keparejike nangli kedo-an Israel aso aphan kecheng ahin pen kejut ahin an vanra pangrumpetnon, talo akung asangti amu ason an ake-ong, lapen nangli methang amat halatum aphan ron japonnon.

¹²David nahok-le do setame elitum longpo lapen kopi plang-loma pu kechini aphrang la aphan tengkheng lonang. Alangli lapen la amonit atum inutbakta jok un-elo.

¹³La jongsi rongsopi anat chiruilo pulote, elitum amonit atum kedo-an phamri vansi arlok aber halaso arongsopi anat vungpo. Anke arlong isinatta inglong angsong dolongledetpo.”

¹⁴Absalom lapen Israel kedo-an atum pulo, “Ahithophel kepare mute Hushai akepare memu.” Ahithophel akeme kepare ke padengmolo, la HEMPHU-si phar-lo, lasonsi Absalom aphuthak akevir vang-lo.

¹⁵Anke Zadok lapen Abiathar kurusar atum aphan Hushai kopu-sonsi Absalom lapen Israel ajalin atum aphan thanparedun loma lapen Ahithophel kopisi keparedunloma than-et-lo.

¹⁶Hushai la ingthum dunlo, “Paprapnon! David aphan isi abirta papinon, kejejangtang ajo alangroi kehat along ajo padolongrinon, bonta non amat Jordan pakapnon, anke la lapen la amonit atum aphan nep longlelo lapen pathilonglelo.”

¹⁷Abiathar asopo Jonathan lapen Zadok asopo Ahimaaz Jerusalem angtan Enrogel pu alang amek alongsi inghongding-lo, pima rongsopi kelutdam atum nangthek-lok na pu latum pherelo. Inut kam keklem asopisi damverlo lapen kopi plang-loma halatum aphan thanpibomlo, lapen halatum damsi David Recho aphan thanpo.

¹⁸Bonta arnisi inut a-oso latum aphan thek-lok-lo lapen la Absalom aphan thanserlo; lasi latum Bahurim along edon ahem chepatu serak-lo. Labangso amonit ahem adung langtuk isi do, lapen halatum laso arlo lutchok-lo.

¹⁹Arloso abang langtuk amahang dipthipsi la athak sok sangjailo, lalote baduta ning mathadamdelo.

²⁰Absalom achakri atum laso ahem vangsi arloso aphan arjulo, Ahimaaz lapen Jonathan konat-lo? Latum langroi hat-et-lo, pusi bangpi thak-lo. Halatum aphan latum ribomlo, bonta thek-longlesi latum Jerusalem chevoithujuilo.

²¹Halatum dam-et aphi Ahimaaz lapen Jonathan langtuk pen nangbarlo lapen damsi David aphan kelong alam an thanlo. Halatum la aphan Ahithophel la aphan kephangnojisi kopi mang-loma thanlo lapen pulo, “Paprap-ra langroi kap seraknon.”

²²Lasi David lapen la amonit atum Jordan kehat pangcheng-lo, lapen arni kevang an halatum kedo atum anta parai kap long-et-lo.

²³Ahithophel chethek long-lo la kepare ateng kroi abang avedet-lo, lasi la amethang agadha athak chardonsi amethang arongsopi chedamjuilo. Amethang keklem nangji akam klem et aphi la amethang chekokthat-ot-lo. La aphan ahemtun athiri alongsi pip-lo.

²⁴Absalom lapen Israel atum Jordan kehat ahut ke David Mohanaim le-et-lo.

²⁵(Joab adim Amosa aphan ron-armu apinpo Absalom bat-lo. Amosa ke Ishmail akur Ithra asopolo, apei ke Abigail, la Joab apei Zeruiah, amu Nahash asopilo.)

²⁶Gilead alongri alongsi Absalom lapen la amonit atum mukam chekimlo.

²⁷David Mohanaim along nangkele ahut, la Nahash asopo Shobe, la Ammon alongri Rabbah arongsopi pensi kevang, lapen Ammiel asopo Makir la Lodebar pen, lapen Barzillai, la Gilead alongri Rogelim pen kevang atum aphan chetong-lo.

²⁸Halatum harlung-heihei, longle atibuk-heihei, pe-ri-thui, lapen David lapen la amonit atum aphan an vanpilo; soktipli, soktipliso, sangkarnu, thengbon, thepak, pijo alang, chulang angkleng, chulang athu lapen ajehak abiresak-heihei vangpilo.

²⁹David lapen la amonit atum ingchir-opo, ingit-opo lapen kejejangtang ajo la-opo pu halatum chini.