Read Karbi 2 SAMUEL 22 Bible Online

2 SAMUEL 22 - Karbi bible

2 SAMUEL 22

¹David ahotur kedo-an lapen Sol arideng pen HEMPHU David aphan kepajok arni laso alun pen HEMPHU aphan David lunlo:

²HEMPHU-si nekerai abang, la neli paisong kethir.

³Ne Arnamsi nekerai a-Bang, la pensi ne jok-lo. Chong asonsi la nephan railo, la nephan railo, nepajok-long-lo. La nekepajok abang-lo; kephangno ajakong pen la nephan railo lapen pajok-lo.

⁴Ne HEMPHU aphan hang-lo, lapen la nehotur pen pajok-lo; HEMPHU aphan chorolo!

⁵Kethi angring nephan kompet-lo. Kevir angring nephuthak kong-long-lo.

⁶Kethi akesung nekompet-lo, lapen tipit nephan tonding-lo.

⁷Ne kesung ahut ne HEMPHU aphan hang-lo, Keparapjisi ne Arnam aphan hang-lo; la kardomhem along la nethak-lo. Ne kerap kechohang la arjulo.

⁸Ansi pirthe pherelo lapen klemhurlo sining ahemthur hijuksi doidaitang-lo, pima Arnam aning thitang-lo.

⁹La anokan pen amehi pavang-lo, isi kechodetji amede la angho pen kekar-ang.

¹⁰La sining ingsekdak-lo, lapen nangsunlo, la akengber isi anghun ke-ik pen.

¹¹La arveng kedo api pen kangjar pachat-lo, la tomon arveng pen damlo.

¹²Kangting pen la amethangsi chepabinlo, lang keplengset anghun karthatsi laphan kompet-lo;

¹³Kekar-ang akoila amede sining kebirlak pen la angno vang-lo.

¹⁴Ansi HEMPHU sining pen cheter paklolo lapen jakongthepik abang ase arjulong-lo.

¹⁵La athai aso ap-lo lapen ahotur paprat-lo, isi sining kebirlak atur pen la halatum aphan pakat-lo.

¹⁶Talopi aklong achetai pangthai-dang-lo lapen pirthe ahemthur dipde det-lo; HEMPHU amethang ahotur aphan kangchek ahut, halatum aningkethi pen ingrong-lo.

¹⁷Angsong pen HEMPHU arum an nang chepholo lapen nephan ne-ot-lo; lang karnuk pen la nesanthorlo.

¹⁸Kangtangnei nehotur pen la nepajok lapen nephan nekehijim atum pen lapen halatum nephan ingtang ongchot-lo.

¹⁹Ne kesung ahut halatum nephan netengkheng-lo, bonta HEMPHU nephan nerailo.

²⁰Kepherememe pen la nepajok-lo; la nephan nepajok-lo, pima la nephan aning ingsam-olo.

²¹HEMPHU nephan nong-e-pilo pima akechokpet ason ne klemlo. La nephan pahirjume, pima ne nedai ave.

²²HEMPHU ahukum ne kroitang-lo ne Arnam pen ne suise.

²³La ahukum an ne klemlo, la ahukum-heihei ne kekroikre ave.

²⁴Ne kechokche ave pu la chini lapen ne kechokche akam pen chepahelotang-lo pu.

²⁵Lasi la nong-e nepilo, pima kopisi akechokpetma ne klemlo, athe la chini ne adai ave.

²⁶O HEMPHU nangphan kekroithip abangphan nang kekroithirklong, lapen kechok-lim atum aphan nang mesen.

²⁷Kangthir-et atum aphan nang ingthir-et, bonta kehingno atum aphan nang thurkrap.

²⁸Chepabihek atum aphan nang pajok,, bonta kechepindak atum aphan nang pabihek.

²⁹Nang HEMPHU ke akethe-ang; ne kangting nang pakak-lo.

³⁰Nehotur aphan ketengkhengji aphan nang jakong nepilo, lapen halatum kechevoi aphuthak kehaiji ajakong nepilo.

³¹Laso Arnam, la akam-heihei ko-an kechok-lim, la alam ko-an chikimeme!

³²HEMPHU inutvetsi Arnam; Arnam inutvetsi ekerai.

³³Laso Arnam ke kethirklong ne kechepachong adim, netovar la pajok-van.

³⁴Nekeng jok-lu akeng ason, la nepaplang-lo; inglong along la ne kebi pajok-van.

³⁵Ron aphan la kam nethanlo, ansi ne kangtangnei athai rim unpo.

³⁶O HEMPHU, nang nephan nerailo lapen nepajok-lo; nang kerap nephan pathelo.

³⁷Bang pacheraidetji pen nang nebilo, lapen ne kaiketa klikledet-lo.

³⁸Ne hotur aphan ne hung-lo, lapen halatum aphan paremlo. Halatum aphan pavirlongletik ne sangsedet-lo.

³⁹Halatum aphan ne areng pasolo, lapen halatum thur un-edet-lo; halatum remdetsi ne ingno tithorlo.

⁴⁰Ron aphan nang jakong nepilo, lapen hotur aputhak kehaiji ajakongta nepilo.

⁴¹Ne hotur ne pen pakat-lo, nephan kehijim abangphan ne pavirlo.

⁴²Halatum kerap-rilo, bonta baduta halatum aphan kerapdun abang ave. Halatum HEMPHU aphan hang-lo, bonta la thakthe.

⁴³Halatum aphan ne sorlamlo, lapen halatum la longle aduk ason plang-lo; tovarpi anghan asonsi ne halatum aphan sak-lo.

⁴⁴Kethurkrap nerat aso pen nang pajok-lo, lapen det aputhak nephan pangrilongtoilo; ne kechinine arat an ta neber dolo.

⁴⁵Bang adet atum ne ingno angphun patongkilo, nese arjulong-lote, halatum nephan kroilo;

⁴⁶Halatum angthin thehaihelo, lapen halatum apairaikom pen a-ok klemhursi vang-lo.

⁴⁷HEMPHU renglang! Nekeraibang aphan rolo! Nephan nekepajok a-Arnam kangtang kethe alam pachethangnon!

⁴⁸Nehotur atum aphuthak la nepahailo; det atum nebersi la bilo.

⁴⁹Lapen nehotur atum arideng pen la nepajok-lo, HEMPHU, nang nehotur atum aphuthak nepahailo lapen kephangno amonit arideng pen nang nerailo.

⁵⁰Lapen det-heihei angbong ne nangroji; nangphan ne nanglunji.

⁵¹Amethang arecho aphan Arnam kepahai pathepik kangvaitang abangphan la akanghon kaike paklangver, David aphan lapen la aso-asu aphan kaiketa paklangver.