Read Karbi 2 SAMUEL 23 Bible Online

2 SAMUEL 23 - Karbi bible

2 SAMUEL 23

¹Jesse asopo David aphan helo HEMPHU kepathenei amonit-lo, laphan helo Jakob a-Arnam recho ingvailo, lapen la Israel aphan kemesen alunjir ketokpi abang-lo: Lahei helo David akejutsi alamlo:

²HEMPHU akarjong ne pen paningjelo, la abirta ne ingtur alongsi dolo.

³Israel aphan kerai abang nephan ningjelo: “Ahok-akangsai pen kepangri arecho, la Arnam aphan kekroi pensi pangri,”

⁴La inghunkave adap ketur arni ason arve jangdet pen arni bap-bi kepathur ason.

⁵Lapen lasonsi neso-nesu atum aphan Arnam pahirjumepo, pima la ne pen kejutjepin aloh chejok-lo, phri-un-epin isi akechechak, kelar un-epin aseme. Lahelo nening kedokneilo; lasi ne kehai plangpo, lapen Arnamsi la paplangvekpo.

⁶Bonta Arnam kave amonit atum ke kevartang a-ingsu ason; ari angse ke baduta papho un-e.

⁷Nang ingchin arisim kalite chir rim nangji; halahei phrin-et khangjangpo.

⁸David anokbe atum amen lahei helo: Kechengsi ke Josheb Basshebeth, la Takemon pen, la “Bangkethom” atum angbong ajalinlo. La chir pen ron chedansi isivet aron along bangpharo nerkep amonit atum aphan pathilo.

⁹Bangkethom, angbong adun abang anongkedonei ke Eleazar, la Dodo asopo, Ahohi aro pen. Arnisi la lapen David, Philistia keche-pangrumpet atum pen ron aphan chedanlo. Israel atum aphi chiruinang-lo,

¹⁰bonta la alongle along charjapthip-lo lapen ari harjakjetik ke anokjir aripen cherap-het asonsi Philistia atum pen chedanbomlo. Halabangso arni HEMPHU jasemetsi pahailo. La jutdet aphi Israel atum Eleazar kedo adim vang-lo lapen kethitang atum pen kechedan ajohton phlokpon-et-lo.

¹¹Kethomadun anongkedohu abang ke Agee asopo Shammah, la Harar pen. Thepak hidi Lehi along Philistia atum chingrumpet-lo. Philistia atum pen Israel atum bephlung-lo,

¹²bonta hidi along Shammah arjapthip-lo, chedandunlo lapen Philistia atum aphan pathilo. Halaso arnita HEMPHU jasemetsi pahailo.

¹³Soktipli kerot kecheng apor, “Bangthomkep” angbong bang kethom Adullam alongku hirdamlo, hadak David dolo, lapen halaso ahut Rephaim Arlok along esong a-Philistia atum mukam chekimsi tonlo.

¹⁴Halaso ahut David abang ke pairaikom arongsopi alongsi do lapen esong a-Philistia atum Bethlehem cheraidet-lo.

¹⁵David ahem chingtungsi pulo, “Bethlehem anghap alangtuk alang inutbak nephan nevanpi abang do asonte, ne ko-an ning ingsamji apot-lo!”

¹⁶Bangkethom anokbe atum angthin chepathesi Philistia amukam hat ponputsi langtuk pen ajehak alang sok ponlo, lapen la David aphan ponpilo, bonta alangli la junjesi HEMPHU aphan kethokjisi la dung-lo,

¹⁷lapen pulo, “HEMPHU, ne la jun un-e! La kejun ke apran chethongdut pen kevan amonit atum avi kejun nangnakpo!” La apotsi la kejunjimolo. Halahei helo bangkethom angthin kethe anokbe atum anong kedo akam-heiheilo.

¹⁸Joab akorte Abishai (Halatum apei ke Zeruiah) ke anong kedohu “bangthomkep” atum ajalinlo. La achir pen bang 300 amonit thursi chedanlo lapen halatum aphan pathilo, lapen “Bangthomkep” atum angbong pen la anongdolo.

¹⁹La “Bangthomkep” atum angbong pen anong kedoneilo lapen halatum ajalin plang-lo, bonta la hala “bang kethom” atum ason anong chethangthe.

²⁰Jehoiada asopo Benaiah la Kabzeel pen, la ta inut anongkedo anokbelo; la jokta ongdung angthinkethe akam klemlo, laso angbong la banghini kechedanthekpik a-Moab aphan pathilo. Ephong ar-e kelok keklo apor la hilik arlo sundamlo lapen hingho ejon pathilo.

²¹La inut a-Ijip amonit thepo chir pen kechingthang abangphan pathilo. Benaiah la achong pen achir thijoksi la pen la aphan pathilo.

²²Halahei helo Benaiah angthinkethe akamlo, la “bangthomkep” angbong pen inut-lo.

²³Halatum angbong pen la helo kelitdong abang-lo, bonta “Bangkethom” atum ason anong chethang-o-e. David la aphan alang angphun kerai atum angbong ahemphu bat-lo.

²⁴Akaprek abangphu “bangthomkep” atum angbong ke Asahel, Joab amu, Elhanan la Dodo asopo Bethlehem pen;

²⁵Shammah, la lapen Elika, Harod pen,

²⁶Palti pen Helez, Tekoa pen Elkesh asopo Ira,

²⁷Anathoth pen Abiezer, Hushah pen Mebunnai,

²⁸Ahoh pen Zalmon, Netophah pen Maharai.

²⁹Netophah pen Baanah asopo Heleb, Benjamin aro Gibeah pen Ribai asopo Ittai.

³⁰Pirathon pen Benaah, Gaash arlok adung pen Hiddai.

³¹Arabah pen Abialbon, Bahurim pen Azmaveth.

³²Shaalbon pen Eliahba, Jemhen asopo atum Jonathan.

³³Harar pen Shammah, Haras pen Sherar asopo Ahiam.

³⁴Maakah pen Ahasbai asopo Eliphelet, Gilo pen Ahithophel asopo Eliam.

³⁵Karmel pen Hezro, Arab pen Paarai,

³⁶Zobah pen Nathan asopo Igal, Gad pen Bani,

³⁷Ammon pen Zelek, Beeroth pen Naharai,

³⁸Jattir pen Ira lapen Gareb.

³⁹Hitti asor Uriah. Pangrumpet bang thomkep ra throksi anokbe dolo.