Read Karbi 2 SAMUEL 24 Bible Online

2 SAMUEL 24 - Karbi bible

2 SAMUEL 24

¹HEMPHU puthot Israel aphuthak aning thi-lo, lapen David halatum aphuthak akesung la paplang-lo. Alangli David aphan chorungsi paputoilo, “Damra Israel lapen Judah amonit atum aphan lakhanon.”

²Lasi David la ron-armu ahemphu Joab aphan hukum pilo, “Nang chakri atum penpen Israel akhei kedo-an det kecheng pen kejut an damra rat atum aphan lakhanon. Bang ko-an doma neli chini ingtung.”

³Bonta Recho aphan Joab thak-lo, “Recho, Israel arat-aso aphan nangli Arnam HEMPHU halatum non kedo apar phan pharo pachan nang, lapen nangli kesanglong ahut la klem lonang. Bonta nangli kopi athesi keklemji nanglining hang-loma, Recho?”

⁴Bonta Joab lapen la achakri atum aphan recho alamsi pakroitoilo; la angno pen halatum damjuilo, lapen Israel arat aphan kelakhajisi damlo.

⁵Halatum Jordan hatsi Aroer anitur anat mukam chekimlo, laso arongsopi arlok angbong chitimsi do, lapen la Gad alongri si do. Hadak pen latum Jazer anirep anat damlo,

⁶Gilead lapen Kadesh Hitti alongri anat halatum damlo. Ansi halatum Dan anat damlo, lapen Dan pen halatum Sidon anichi anat damlo.

⁷Aphi halatum Tair arongsopi raikom anitur anat damlo, lapen Hivi lapen Kanan arongsopi kedo-an anat damlo.

⁸Lasi chiklo jon sirkep-ra ni ingkoi aphi halatum det adang dam pachetang-et aphi Jerusalem chevoilo.

⁹Latum recho aphan kelong alam thanlo, lapen ron kechedan un amonit aphai Israel adang bangsuri pharo nerkep lapen Judah adang an bang suri pharopho an aphai long-lo.

¹⁰Bonta David aphai lakha en-et aphi la me-hingno chinisi la sang-lo, lapen HEMPHU aphan la pulo, “La keklem pen ne hingnopik apap klemtang-lo! Kanghon pen nediyatha. Ne kelu akam klemtang-lo.”

¹¹David amontri Gad aphan HEMPHU pulo, “Ne kepi sonthom angbong David aphan thanra pachongvainon. La kechongvai asonsi Ne klempo.”

¹²Puthot adap David thurdet aphi alanglilong Gad damlo.

¹³HEMPHU keputang alam alangliphan than-et-lo, lapen arjulo, “Kolo abang-lo? Ningkan kethom nangdet along akhim, mate chiklo jonthom nanghotur pen kekatnang, mate nithom nangdet along avur? Non la aphuthak mathanon.”

¹⁴David thak-lo, “Ne kesungsi dolo! Bonta monit pen ne aduk chodeng ingtungte. HEMPHU amethang arideng penle ephan aduk epapilonang, pima alangli ingjinsoji.”

¹⁵Lasi Israel aphuthak HEMPHU avur nangtoilo, alangli halaso adap pen chengsi la kemangtang apor an ajirding-lo. Det ehin pen kejut ahin an bang suri throksi kep a-Israel amonit thinang-lo.

¹⁶HEMPHU apherangke Jerusalem kepavirji dok-dok ahut, HEMPHU aning chelarlo, lapen halatum aphan kepathiji pu kechesik apherangke aphan pulo, “Ingtonnon! La-anta chokpo!” Pherangke abang inut a-Jebusi, Araunah pu abang sok kesi adimsi do.

¹⁷Rat-atum aphan kepathi apherangke aphan David thek-longsi HEMPHU aphan pulo, “Ne ta nedo kedo abang-lo. Nesi kehingno akam keklem abang-lo. La keduk atum kopi keklemloma? Nang nephan lapen nehemtun aphansi aduk kepi nangji apot-lo.”

¹⁸Halaso arni amat David along Gad damlo, lapen alangliphan pulo, “Araunah asok kesi adim arludamnon lapen HEMPHU aphan isi adovan buipinon.”

¹⁹HEMPHU ahukum David Kroisi Gad kepu alam ateng damlo.

²⁰Araunah arum langsi recho lapen alangli chakri atum la anat kevang thek-longsi la David angno klithorsi ardomkhrup-lo lapen arjulo,

²¹“Recho, nangli kopisi ladak an kevang nangjima?” David thak-lo, “Nangli sok kesi adim HEMPHU adovan kekim pen ajok avur hampo.”

²²La ennon, Recho! Araunah pulo, “Lapen HEMPHU aphan thok-non, nanglining kehang aling lahei chainong alo dak dolo, dovan athak kephrin nangji aphanlo; lahei arthang dolo, lapen sok kesi ajohton ke me kethor atheng-lo.”

²³La kedo-an Araunah ke recho aphan pi-et-lo, lapen pulo, “Nangli Arnam HEMPHU nangli athok padeng-lonang!”

²⁴Bonta Recho thak-lo, “Kali, laso aphan neli anam nangpiji. Neli anam kave athok Arnam HEMPHU aphan neli thokthe.” Lapen alangli sok kesi adim namlo, lapen chainong alo, rup angkleng dum phokep pen namlo.

²⁵Ansi HEMPHU aphan dovan alangli buipilo, lapen kephrin athok, la kejelang athok-heihei pajirlo. La akardom HEMPHU thak-lo, lapen Israel adang avur hamlo.