Read Karbi 1 RECHO 1 Bible Online

1 RECHO 1 - Karbi bible

1 RECHO 1

¹David Recho nonke inut arlengkesar-lo, lapen la aban atum laphan pe-kar-om-heihei pa-um seta, la ar-om-edet-lo.

²Lasi la kepangri atum laphan pulo, “Recho, elitum inut arloso kangduk nangliphan pa-orajile ri-ra nanglilong padolonang. Bangpi nanglilong dosi nangliphan par-ompo.”

³Israel adang bithe inut arje kemesen a-osopi parilo, lapen Abishag pu inut halatum Shunem along lason a-osopi long-lo, lapen bangpi aphan recho along vandet-lo.

⁴Bangpi arjemesen, lapen recho aphan honlo, lapen alangliphan lanalo, bonta bangpi pen la che-en-e.

⁵Nonke Absalom thi-et-lo, David pen Haggith kedobomlang aso-akleng ke Adonijah helo. La athok dojot. La aphan ajat asonta David ingchekche, lapen la recho kechoji aphan aninghangpik-lo.

⁶La amethang aphan ron ahemkonglong-heihei, losei-heihei, lapen bang 50 kethon-kevan amonit atum chebilo.

⁷La Joab (Zeruiah asopo) lapen Abiathar kurusar pen chingkilo, lapen laso aputhak kerapji halatum anta chedondunlo.

⁸Bonta Zadok kurusar, Jehoiada asopo Benaiah, Nathan montri, Shimei, Rei lapen David angphun kerai atum Adonijah aphan chedondunde.

⁹Arnisi Adonijah Enrogel alangjeng adung Pherui Arlong along biresak, chainong alo-heihei, lapen chainong aso kangtu-heihei pen athok thok-lo. La David Recho asopo atum aphan lapen recho kepangri aban atum aphan Judah pen la kethok amei along kevangji aphan phalo,

¹⁰bonta la abong-pabeng Solomon mate Nathan montri, mate Benaiah, mate recho angphun kerai atum aphan phaphedet-lo.

¹¹Anke Solomon apei Bathsheba along Nathan damlo, lapen bangpi aphan pulo, “Haggith asopo Adonijah amethang recho chebattang-lo pu nangli arjulonglelangma? Lapen David rechota labangso alam thangnat chinidunde!

¹²Nangli jongsi nangli kai lapen nanglisopo Solomon akai pajokji ninghang pulote,

¹³neli nangliphan David recho along non amat dam serakji aphan parelo, lapen alangliphan arjunon, ‘Recho, nangliphi nesopo Solomon aphansi recho batpo pu nangli chechakpamelo kalima? La tangte Adonijah kopusonsi recho kecholongpo?’

¹⁴Lapen Nathan pulo, ‘Lapen nangli David recho pen kechingki ahut neli arlo vangsi nangli tomo alam pathirpo.’ ”

¹⁵Lasi Bathsheba ke recho ahong-plang angdeng arlo kechetongjisi damlo. La sarpik-lo, Shunem pen a-arloso Abishag la aphan lanabomlo.

¹⁶Recho angno Bathsheba angphun patongkilo, lapen la arjulo, “Nang kopisi kenangpo?”

¹⁷Bangpi thak-lo, “Recho nangli Arnam HEMPHU amen pen Solomonsi nangliphi recho pachojipu nangli neli ingno seme tang pamelo.

¹⁸Bonta Adonijah ke recho plang-et-lo, lapen laso alam nangli thangta chinidundelang.

¹⁹La ongdung achainong, biresak, athuke-ong achainong aso-heihei athok pilo, lapen la nanglisomar aphan lapen Abiathar kurusar, lapen Joab, ron-armu ahemphu atum aphan kecho-kejun amei along phalo, bonta la nanglisopo Solomon aphan phaphe.

²⁰Recho, nangliphi komatsi recho kecho longjima halatum nanglipen kechiniji aphan kedo-an Israel arat atum nang cholangding-lo.

²¹Nangli la klemkle pulote, nangli kethi pen nesopo Solomon lapen nephan chobeichot atum pusi lakhapo.”

²²Bangpi keningjebomlang ahut rechohem along Nathan nangledunlo.

²³Montri do pu alam recho aphan thanlo lapen Nathan arlo lutdamsi recho angno angphun patongkilo.

²⁴Anke alangli pulo, “Recho, Adonijah recholo pu nangli pachethang-loma?

²⁵Non malom la ongdun, achainong, abiresak lapen athu kedo achainong aso-heihei pen athok kepijisi arkli damlo. Nanglisomar kedo-an aphan la phalo, nangli ron-armu ahemphu Joab aphan lapen Abiathar kurusar, lapen non latum pen pen chobomlo lapen hang-lo, ‘Recho Adonijah achethe padingnang!’ pu.

²⁶Bonta la neliphan phaphelo, akehai mate Zadok kurusar lapen Benaiah lapen Solomon aphanta phaphe.

²⁷Nangli rat kepangri atum aphan komatsi nangliphi recho kechopoma thanthelang lapen lahei nangli bida tho loma?”

²⁸David recho thak-lo, “Bathsheba aphan arlo pavangthutha,” lapen bangpi vang-lo, lapen la angno arjaptherlo.

²⁹Ansi bangpi aphan la pulo, “Nephan kedo-an akesung pen kepajok abang kereng-et a-HEMPHU amen pen ne semetang-lo,

³⁰pini ne nangphan kechechak ateng Israel a-Arnam HEMPHU amen pen paplengpo, la ke lahelo, nangsopo Solomonsi nephi recho chopo.”

³¹Bathsheba angphun patongkisi pulo, “Nehemphu recho kaike parengver nang!”

³²Lasi Zadok, Nathan lapen Benaiah aphan David Recho pahangtoilo. Latum arlo vang-lo,

³³latum aphan la pulo, “Kangsaihem kepangri atum aphan nanglitum along cheponra nesopo Solomon nelosei aloso athak pardonnon lapen la aphan Gihon alangso an thondun-non,

³⁴hadak Zadok, lapen Nathan la aphan Israel arecho kebat ajangthu patippo. Anke pong-ut butnon, lapen asekethe pen hangnon, ‘Solomon Recho achethe padingnang!’

³⁵‘La ne inghoi athak kangniji kevang ahut dak an laphan vanthunon. Nelar lasi recho chopo, pima laphansi Israel lapen Judah aputhak recho pachoji aphan ne ingvaitang-lo.’ ”

³⁶La klemvekpo, Benaiah thak-lo, “Lapen nangli Arnam HEMPHU la aputhak pathirlonang.

³⁷Nanglilong HEMPHU kedodunver ason thakthak, Recho, Solomon along seta alangli padodunver lonang, lapen la recho kecho ahut nangli an sose pachingthur lonang.”

³⁸Lasi Zadok, Nathan, Benaiah lapen recho angphun kerai atum Solomon aphan David Recho alosei aloso athak pardonlo lapen ha Gihon alangjeng adung la aphan thondunlo.

³⁹Zadok jit ajangthu abong ponlo, la alangli HEMPHU kedo apehem along pensi vanlo, lapen Solomon aphan patip-lo. Halatum pong-ut butsi kedo-an arat atum hang-lo, “Solomon Recho achethe padingnang!”

⁴⁰Anke halatum kedo-anta la aphi aphi chevoidunthulo lapen aning cheparongsi pongsi-heihei but-lo, asepathesi longle paklemhurlo.

⁴¹Adonijah lapen kedo-an la alohi atum kecho-kejun pajut-lo, lapen halatum kehangjo arki arjulong-lo, lapen Joabta pong-ut arki arjulongsi la arjulo, “Rongsopi along lahei kehangjo arki athe kopi?”

⁴²La keningje jutje ako, Abiathar kurusar asopo Jonathan nanglelo. “Vangnon” pusi Adonijah hang-lo. “Nang mesen amonit apot kemesen abirtasi vanji!”

⁴³Neli phere ason ave, Jonathan thak-lo. “David Recho ke Solomon aphan recho bat et-lo.

⁴⁴Alangli Zadok, Nathan, Benaiah, lapen recho angphun kerai atum alangliphan pathon duntoilo. Halatum la aphan recho alosei aloso athak pardonlo,

⁴⁵lapen Zadok lapen Nathan la aphan Gihon alangjeng along recho kebat ajangthu patip-lo. Anke latum rongsopi damsi aning arong pen hang-lo, lapen rat atum non hangjolo, lahei ase helo nonjong nanglitum karjulong arkilo.

⁴⁶Solomon non recholo.

⁴⁷Kopisi dojilang, kangsaihem kepangri atum anta David Recho aphan man kepijisi dampet-lo, lapen pulo, ‘Nangli Arnam nangliphan apar Solomon aphan anong pathelonang, lapen nangli kepangri apar Solomon kepangri ahut pachingthur lonang, ‘pu. Anke David Recho ahongplang athak karchojisi angphun patongkilo

⁴⁸lapen ardomlo, ‘Elitum HEMPHU aphan rolonang, Israel a-Arnam aphan, lasi nephi recho kechoji aphan inut ingvailo, lapen la kethek-longji aphan nepareng-lo!’ ”

⁴⁹Anke Adonijah alohi atum pherelo, lapen halatum thur-etsi ojap-lo, abangphutinta amethang atovarsi chedamrep-lo.

⁵⁰Adonijah, ke Solomon aphan phere-ongsi HEMPHU kedo apehem arlosi damlo lapen dovan ano otthip-lo.

⁵¹Solomon Recho aphan thanlo Adonijah ke alangliphan pherelo pu alam lapen dovan ano otthipsi hangkong-lo, “Kechengsi Solomon, nephan pathithelo pura semetang nangji la nening hang-lo.”

⁵²Solomon thak-lo, “La jongsi nephan kroiver pulote achu ejengta paphophe, bonta la jongsi nephan kroithekthe pulote la thinangji.”

⁵³Adonijah aphan Solomon Recho pahangdamlo, la aphan dovanpen pavandet-lo. Adonijah, recho along damsi la angno angphun patongkilo, lapen laphan recho pulo, “Non nang nanghem chedamtamelo.”