Read Karbi 1 RECHO 10 Bible Online

1 RECHO 10 - Karbi bible

1 RECHO 10

¹Solomon anong alam Sheba a-Kungripi arjulong-lo, lapen la aphan akesung kesung alam karju pen asat kelangjisi bangpi Jerusalem damlo.

²Bangpi along ongdung ke-ora atum chevanlo, lapen mosala aduk-heihei, kechingthang adorson-heihei, lapen ongdung aser ta ka-ut athak arthang pamesi vang-lo, bangpi Solomon pen kechetong ahut bangpi karjuji pu aning kedo-an alam arjulo.

³La halahei alam anta thak-et-lo; la aphan kethakji ason thangnata akesung avedet-lo.

⁴Sheba Arechopi, Solomon abidi alam arjulong-lo, lapen la kekim rechohem ta thek-long-lo.

⁵An kecho ahut kecho ason kevanpi la bangpi thek-long-lo, la kepangri atum aphan kedohem-heihei ta thek-long-lo, Rechohem kedo asong lapen amonit, halatum ejatpet apindeng, kecho-kejun amei along laphan kanghong aban atum lapen Kardomhemthepi along la kethok kepajir-heihei ta thek-long-lo. Lahei thek-longsi bangpi achethepi vangphunsi kemanghu si mong-loilo.

⁶Solomon Recho aphan bangpi pulo, “Nelidet along nangli lam lapen nangli bidi karjulongke ahok-lo.

⁷Bonta lahei nelimethang mek hini pen lapen vangpen thek-longletik ke neli kroithekthedet-lo. Lapen la kethek-long angbong pen achitim anchot-lang karjulong; nangli bidi lapen nangli khi neli karjulong pen apar thethulang.

⁸Nanglipiso atum ko-an akopai keme! Lapen nangliban atum ko-an akopai keme! Latum nangli ingno kedo pen nangli kere alam karju ko-an akeme!

⁹Nangli Arnam HEMPHU aphan rolo! Nangliphan Israel arecho kepaplang pen ajok la nangliphan ko-an aning dok-loma la paklang-lo. Pima la Israel aphan akanghon ke kaike aphanlo, la nangliphan halatum arecho paplang-lo, anke nangli aron lapen ahok-kangsai pangri thekpo.”

¹⁰Bangpi kevan adan-heihei Solomon Recho aphan pilo: Lin suri 4 an sose aser lapen ongdung amosala pen kechingthang adorson-heihei. Bangpi kevanpi amosala ke la akai angbong kedeng-long angbong akemeneilo.

¹¹(Ophir pen ser kevan Hiram atelongpi ta hadak pen ongdung Juniper akapat lapen kechingthang adorson-heihei vanpilo.

¹²Lahei athengpi Solomon Kardomhemthepi lapen rechohem akung aden lapen lunse atum aphan kumbeleng, kumbeleng chongdeng-heihei keselam aphan enlo. La Israel adet along kevan angbong akemenei Juniper athengpi lo; lapen baduta aphrang thek-longlepin lang.)

¹³Sheba Arechopi kehang alingsi Solomon Recho pidunlo, la apar ta alangli recho ajakong aron pen kedo-an adanta pidunlo. Anke bangpi lapen la aphan kelang atum an pen Sheba adet chedamthulo.

¹⁴Solomon Recho linsuri 23 anbak aser aningkanvang ta deng-long, la aparta

¹⁵beha atum amidu , beha keklem ale, lapen Arob arecho atum kepi amidu lapen Israel alongri a-Govornor atum pen ta midu long-lo.

¹⁶Solomon 200 achongpi selamlo, lapen achongtin along lin 7 anbak aser top dunlo.

¹⁷Lapen 300 bimuchot achong ta la selamlo, la achongtin along ta lin 2 aser topdunlo. Lahei achong Lebanon a-Nampi pu ahem arlosi bilo.

¹⁸Kethedung recho anghoita la paselamlo. La ajehak ke ingnar aso lapen ahin an ke kemenei aser pensi selamlo.

¹⁹Recho anghoi karludamji anat adongkam throk do, adongkam tin kejut angchun kechor ahingho do,

²⁰kadokave hingho jon krehini do. Recho anghoi anung anat kechor achainong alo aphu do, lapen ari ar-e lapen ari arvi anat ejon jon kechor ahingho do. Akaprek adet along lapuson recho anghoi avepinlang.

²¹Solomon kejun aharlung kedo-anta ser pensi keselam saide, lapen Lebanon a-Nampi pu ahem along kedo aphule phukok an ta ajukave aser pensi keselam. Rup ke en edet-lo, pima Solomon arni ahut lake anam thedung pu lakhakhelang.

²²La telongpi-heihei Hiram atelongpi pen talopi kedam rap-rapji atelongpita la do. Ningkan kethom lote la atelongpi nangchevoipo, ser, rup, ingnar aso, armekave athero, thero-heihei vanpo.

²³Solomon Recho ke kaprek archo apar plangmu, remu,

²⁴lapen pirthe adang atum la along vangsi Arnam laphan kepi abidi alam arju ingtung-lo.

²⁵Kevang abangphutin ta la aphan ser, rup arri-heihei, ron arisim-heihei, mosala, losei lapen gadha-heihei vanpilo. Lason aningkanvang ta nangdobomlo.

²⁶Ronhemkonglong hum pharo krephli lapen ron alosei jon suri 12 ajakong asong Solomon seng-lo. Halatum ajehak la Jerusalem alongsi bilo lapen ahin an ke la along kaprek arongsopi alongsi bilo.

²⁷La recho kecho ahut rup ke arlong asonsi Jerusalem along rikphrok-lo, lapen kedar athengpi ta Judah anglong akeng-ri kerikphrok a-ingle arong ason dothip-lo.

²⁸Recho amonit atum Musri adet adet lapen Silisia adet pen losei lapen

²⁹Ijip pen ronhemkonglong kevan langdunlo. Halatum Hitti lapen Siria arecho atum aphan losei lapen ronhemkonglong chojordunlo, ronhemkonglong ehum anam rup dum 600 lapen losei ajontin rup adum 150 an.