Read Karbi 1 RECHO 11 Bible Online

1 RECHO 11 - Karbi bible

1 RECHO 11

¹Bang adet arloso aphan Solomon aning dok-o-binong. Ijip arecho asopi pen apar Hittipi, Moabpi, Ammonpi, Edompi lapen Sidonpi atum aphanta la enlo.

²Lahei arat a-arloso atum pen Israel atum che-en chedo nangne pu HEMPHU hukum pithuvoiphit seta halatum aphan la endet-lo. Latum pen che-en chedolote, latum Israel atum aphan kaprek a-arnam-heihei anat pangduk-rongpo.

³Solomon bang 700 recho asopi aphan enlo, lapen bang 300 enpangtar apiso dolo. Halatumla aphan Arnam pen pasuilo,

⁴lapen la kesar ahut anke la aphan bang adet a-arnam-heihei aphan parchorong-lo. Apo David keklem ason la HEMPHU a-Arnam aphan kroithipthedet-lo.

⁵La Sidon a-arnampi Astarte, lapen Ammon adet kehijimmeme a-arnam Molek aphan archolo.

⁶La HEMPHU aphan langplotsi pap klemlo lapen apo David ason la aphan ahok chepavedet-lo.

⁷Jerusalem anihang anglong anat Moab adet kehijim a-arnam Kemosh lapen Ammon adet kehijimmeme a-arnam Molek aphan karcho adim la kimpilo.

⁸La bang-adet pen kevan apiso atum amethang a-arnam aphan mephik kethorji lapen karkliji aphan karcho adim hei-hei kimpilo.

⁹Israel Arnam HEMPHU, Solomon aphan bataihini cheklangsi kaprek a-arnam-heihei aphan archori pusi hukum pitang-lo seta HEMPHU aphan Solomon kroikredetsi la pen suitang-lo.

¹⁰Apotsi Solomon aphan HEMPHU ning thihak-lo,

¹¹lapen la aphan pulo, “Pima nang aphong aphong ta Ne pen kechejok alam ingditang-lo lapen Ne hukum-heihei kroikrelo apotsi, Ne semetang-lo, nang pen recho arat pondetsi la nangdet kepangri atum angbong anut kaprek aphan pidetpo.

¹²Tebonseta, nangpo David aphan langsi nangkai angbong Ne la klemklelo, bonta nangsopo recho kecho ahut si klempo.

¹³Hala pen Ne recho arat kangthim amat pon-et-e, seta Ne ban David lapen Ne kangvaitang arongsopi Jerusalem pen apot la along isi akhei padodunlongji.”

¹⁴Edom recho ahemtun asor Hadad aphan HEMPHU-si Solomon abe pathurlo.

¹⁵Ajirding-o alamlo, David Edom kecherai ahut la ron-armu ahemphu Joab hadak damsi kethitang atum aphan pipdamlo.

¹⁶La lapen la amonit atum Edom along chiklo jon 6 dolo lapen halaso ahut latum Edom apinso kedo-an aphan pathilo, seta

¹⁷Hadad lapen ajehak apo aban atum Ijip adet katsi jok-lo. (Halaso ahut Hadad ke inut bihek a-osolang.)

¹⁸Midian, halatum osi Paran anat damsi hadak ajehak amonit atum latum along jalangdunlo. Anke latum ha Ijip anat damlo lapen recho along lelo, recho laphan ajehak longle lapen kedo ahem ehum lapen kecho amar pilo.

¹⁹Recho pen Hadad jirpo chepame-olo lapen recho amethang akorpi, rechopi amu Tahpenes, Hadad pen pachelang-lo.

²⁰Bangpi laphan inut pinso a-oso mahang pathekpilo, Genubath, pu la rechohem rechopisi pathe pading-lo, la hadak recho asomar atum pen dorap-rap-lo.

²¹Ijip along kedo ahut David lapen ron-armu ahemphu Joab thitang-lo pu abirta Hadad arjulongsi, recho aphan Hadad pulo, “Nemethang adet nepadamthu longtha.”

²²Recho arjulo, “Kopi chonghoipo? Ne pine nangphan nangkepipe ason dolangma? La apottong nang hem kechedam-thujima?” Nephan nepadam longchot anta me; recho aphan Hadad thak-lo. Lapen la amethang adet chedamjuilo. Edom arecho plangsi, Hadad inut kehingno, Israel ahotur plang-lo.

²³Eliada asopo Rezon aphanta HEMPHU-si Solomon abe pathurlo. Rezon ke ahemphu Zobah arecho Hadadezer pen kekat abang-lo,

²⁴lapen kethiparohum atum ajalin plang-lo. (Laso abang ke Hadadezer aphan David keparem ahut lapen la Siria atoi aphan kepathi-et ahut.) Rezon lapen la amonit atum Damaskas damlo, lapen hadak la amonit atum laphan Siria arecho bat-lo.

²⁵Solomon akai dotik an la Israel ahotur plang-lo.

²⁶Solomon Recho abekethur anut kaprek abang ke alangli methang kepangribang atum angbong Nebat asopo Jeroboam, la Ephraim alongri Zeredah pen. La apei hemepi amen Zeruah.

²⁷Kethur-i-khrap atomo lahelo. Jerusalem anihang alongle Solomon kepapleng lapen rongsopi apaisong kekimthubom ahut,

²⁸Jeroboam inut keklemthek arisolo lapen la aphan Solomon kam keklem chepaduk-o thek-longsi, la jakong akam ahemphu Manasseh lapen Ephraim alongri aputhak bat-lo.

²⁹Arnisi Jerusalem pen Jeroboam kedambom ahut, Shiloh pen Ahijah montri rong angtan atovar along inutvet laphan chetong-lo.

³⁰Ahijah athak achoi chephloksi la beng krehini ingsek-lo,

³¹lapen Jeroboam aphan pulo, “Nanglimethang aphan beng kep ponnon, pima Israel a-Arnam HEMPHU nangliphan pulo, ‘Ne Solomon pen recho-arat pondetpo, lapen nangphan khei kep nangpidetpo.

³²Solomonke khei isi si chekhang longchotpo, athe Neban David lapen Israel alongle angbong pen Ne kangvaitang Jerusalem arongsopi pen ajok.

³³Ne la klemji pima Solomon Nephan kroimolo lapen bang adet arnam-heihei Astarte, Sidon arnampi, Moab arnam Kemosh, lapen Ammon arnam Molek aphansi archorong-lo . Solomon Nephan kroikretang-lo ; la kechokchesi klemtang-lo, lapen la apo David keklem ason Ne aron-heihei lapen hukum-heihei klemkledet-lo.

³⁴Bonta Solomon arecho-arat kedo-an Ne pon-et-e, la rengtik an Ne laphan jakongpiji. La Neban David, Ne kangvaitang abang Ne aron an lapen hukum an kekroi apot Ne klemji.

³⁵Solomon asopo pensi Ne recho-arat ponji lapen nangphan khei kep nangpiji.

³⁶Bonta Solomon asopo aphan isi akhei an si pachebi longchotji, lasi Neban David aso-asu atum Ne kangvaitang Ne keparchoji adim Jerusalem along kaita pangri longverpo.

³⁷Jeroboam, nangphan Ne Israel arecho nang paplangpo lapen nang ninghang an kedo-an alongrita pangrilongpo.

³⁸Nang jongsi Nephan kroipame lote, Ne aron-heihei ateng pen reng-lo, lapen Ne hukum kepi ateng pen klemra Neban David keklem ason Nening padok-lote, Ne nanglong kaita nangdodunji. Israel aputhak Ne nangphan recho nang paplangji, lapen David aphan asonthotsi nangphi seta nangsomarsi pangri longverpo.

³⁹Solomon apap apot David aso-asu aphan Ne adukpipo, bonta kaike aphan kali.’ ”

⁴⁰Lasi Jeroboam aphan Solomon kepathiji bor-i-lo, bonta la Ijip arecho Shishak along damsi chepajok-lo, lapen Solomon thithetik hadak dokok-lo.

⁴¹Solomon keklem asontin, la kethek lapen abidi-heihei Solomon Aphurkimo pu along tok-et-lo.

⁴²Jerusalem along la ningkan 40 recho cholo.

⁴³La thi-lo lapen David Arongsopi alongsi pip-lo, lapen la asopo Rehoboam la adim recho pacholo.