Read Karbi 1 RECHO 12 Bible Online

1 RECHO 12 - Karbi bible

1 RECHO 12

¹Rehoboam, Sekem anat damlo, hadak laphan recho kebatjisi Nirep a-Israel atum kedo-an chingrumpet-lo.

²Nebat asopo Jeroboam, Solomon Recho pen chepajokjisi Ijip kedam abang laso abirta arjulongsi la Ijip pen chevangthulo.

³La aphan Nirep akhei kedo-an atum pahangtoilo lapen halatum Rehoboam along dampetsi laphan pulo,

⁴“Nangpo Solomon nelitum aphan lang pamemedet-lo, lapen nelitum aphuthak anghor kardiksi bat-lo. Lahei anghor jongsi nangli nelitum aphan parjang muchotji pulote, nelitum nangliphan ingdukverpo.”

⁵Nithom aphi vangthunon lapen neli nanglitum aphan thakpo, la thak-lo. Lasi halatum o-et-lo.

⁶Apo Solomon aphan keparedun akesar atum pen Rehoboam Recho chingvailo. “Laso arat aphan kopi kethak dunsi akemeji, nanglitum kopisi keparejima?” la arjulo.

⁷Halatum thak-lo, Laso arat aphan jongsi nangli langpameji pulote, halatum akehang aningkedok alamle thakdunnon, lapen latum nangliphan kaita kekroi pen ingdukverpo.

⁸Bonta la akesar atum kepare alam ano chedendedet-lo, lapen riso atum la pen ketherap-rap kepare atum alongsi damlo.

⁹“Nanglitum neliphan kopi keklem nangji asonsi nepare poma?” la arjulo. “Halatum anghor karjang nangji pu arat aphan neli kopisi than nangjima?”

¹⁰Halatum thak-lo, “Lahelo nangli halatum aphan kepu nangji: Nepo avam aphan mute neri chimun ingchimmu!”

¹¹Halatum aphan punon, “Nelipo nanglitum aphuthak anghor kardik bat-lo; lahei aputhak ne pardikmuchot jilang. Alangli ok-reng arri pen nangsap-lo; neli ke chehelangbong apivo pen nangsap-po!”

¹²Nithom aphi kedo-an arat pen Rehoboam Recho along alangli latum aphan kepinkhat ateng pen damlo.

¹³Recho abang akesar atum kepare alam bikoksi rat atum aphan riso lamtang pen pulo.

¹⁴La pulo, “Nepo anghor kardik nangtum aphuthak bat-lo; ne ke halaso aphuthak pardik muchotpo. Alangli ok-reng pen si nangsap-lo; neli ke chehelangbong apivo pensi nangsappo!”

¹⁵Lahei Shiloh kevang Ahijah montri Jeroboam aphan kemontri alam pachekokjisi HEMPHU aning kehang pen klemlo. La apotsi rat atum alam Recho ke arjudun long-lo.

¹⁶Rat atum alam recho ano chedendedet-lo pu thek-longsi halatum un an asekethe pen hang-lo, “David lapen la ahemtun pavirnang! Latum kopisi ephan eklempilo? Israel amonit atum hem chedam lonang! Rehoboam le amethang aphan pachelang lonang!” Lasi Israel arat atum thurpak-lo,

¹⁷Rehoboam aphan Judah alongri arecho pusi otekang-lo.

¹⁸Anke Jakong akam ahemphu Adoniram aphan Israel atum along kepadamjisi Rehoboam Recho toilo, seta la aphan halatum arlong pen varbop-lo. Laso amat Rehoboam ronhemkonglong arlo charlu serak-raksi Jerusalem anat kat pen chepajok-lo.

¹⁹Halaso arni pen amat David akhei abe nirep arecho-arat atum thurverlo.

²⁰Jeroboam Ijip adet pen nangchevoi-et-lo pu Israel arat atum arjulongsi la aphan rat atum along hang-lo lapen la aphan Israel arecho bat-lo. Judah akhei atumsi David akhei anat kroidunchot-lo.

²¹Jerusalem along Rehoboam nanglesi la suri 180 akemenei aron-aso Judah lapen Benjamin akhei pen hangpet-lo. La ron chedan kedam pen nirep Israel akhei aphuthak kepangsamji aninghang-lo.

²²Rehoboam lapen Judah, Benjamin akhei arat aphan

²³kepathanjisi Shemaiah aphan Arnam pulo:

²⁴“Nangmethang akorte Israel arat aphan tengkheng-ri. Nangtum kedo-an hem chedam etnon. Kopi plangtang loma la nening kehang-lo.” Halatum kedo-anta HEMPHU ahukum kroisi ahem chedam-et-lo.

²⁵Ephraim Anglong alongri Shekem arong along Israel arecho Jeroboam paisong pen parponghetsi malomso hadak dolo. Hadak osi la Penuel arong kimsi parponghet-lo.

²⁶La amethang chepulo, “Non ateng nerat aso atum Jerusalem damra, hadak HEMPHU aphan Kardomhemthepi along athok pidamver lote,

²⁷halatum Judah arecho Rehoboam aphan kroirongsi nephan pathilotpo.”

²⁸La aputhak mathasi, ser achainong aloso jonni la selamlo, lapen arat aso aphan la pulo, “Karchoji aphan nangtum Jerusalem dam nangpik-lo. Israel arat atum ladak Ijip pen nangkevan a-arnam atum dolo!”

²⁹Ejon aser achainong aloso ke la Bethel along lapen akaprek abang ke Dan alongsi bilo.

³⁰Lasonsi rat atum Bethel lapen Dan along karchodam pen ajok pap klemlo.

³¹Inglong aphuchong-heihei alongta karchoji adim Jeroboam kimlo, lapen la Levi akhei pen kalipin atum aphan kurusar ingvailo.

³²Judah atum arong-aje ason-thakthak Jeroboamta nerkep mate paipai achiklo niphai krepho arni isi dhorom arong-aje seng-lo. Bethel adovan along la keselamtang ser achainong aloso-heihei kekimtang adim lake akurusar atum aphan kepado kangtui adim Bethel alongsi bilo.

³³La kepanongtang a-arni pai-pai achiklo niphai krepho arni Israel arat aphan kesangpi arong-aje ketalonjisi la Bethel along damlo lapen hadak athok pilo.