Read Karbi 1 RECHO 13 Bible Online

1 RECHO 13 - Karbi bible

1 RECHO 13

¹HEMPHU ahukum pen inut amontri Judah pen Bethel anat damlo, lapen Jeroboam hadak dovan along kethokjisi karjap ahut ledunlo.

²HEMPHU ahukum atengsi montri abang dovan aputhak ningjelo: O Dovan, O Dovan, HEMPHU lasonsi pulo: Josiah pu amen inut a-oso David ahemtun pen mahang thekji. Nangthak kekroikre athok kethok akurusar atum aphan pathipo, lapen nangthak monit arrepi thorpo.

³Lapen montri abang pubomlo, “Laso adovan krepphakji, lapen la athek-lo-heihei chehijikjamji. Anke nang chinipo HEMPHU-si ne pen ningjelo.”

⁴Jeroboam Recho la arjulongsi laphan la jong-lo lapen hukumpilo, “Laso abangphan phlungjuitha!” Halaso amat recho ari thi-klak-lo lasi la ari chirungthu un-edet-lo.

⁵Menmen amat dovan krepphak-lo lapen montri abang HEMPHU amen pen kemontri asonsi athek-lo anta longle athak chehijikjamlo.

⁶Montri aphan Jeroboam Recho pulo, “Kanghon pen HEMPHU nangli Arnam aphan ne ardompitha, lapen neri kemejile laphan hangnon!” Montri abang HEMPHU aphan ardomlo, lapen recho ari mesenlo.

⁷Anke montri aphan recho pulo, “Nelilong hem nangdun iknon lapen pine chodam lonang. Nangli keklem apot nangliphan nong-e nangpipo.”

⁸Montri abang thak-lo, “Nangli jongsi nanglikhi achitim an nepidetpo seta neli nanglilong kecho-kejunji aphan dundelo.

⁹Eson-natta chojun dunri pusi HEMPHU hukum nepilo, lapen neli kevang atovar thot ta chedam longle.”

¹⁰Lasi la kevang atovarthot chevoithuthesi akaprek atovar pensi damlo.

¹¹Halaso ahut Bethel along inut montri kesar dolo. Asopo atum vangsi Judah pen kevan amontri Bethel along halaso arni kopi klemtang-loma lapen la Jeroboam recho aphan kopi plang-loma laso alam laphan thanlo.

¹²“La kedam ahut kopu atovarsi kedamlo?” halatum aphan montri kesar arjulo. Laphan halatum tovar paklang-lo,

¹³lapen halatum la aphan gadha pardonsi pari pontoilo. Halatum lasonsi klemlo, la ardomsi

¹⁴Judah pen kevang amontri aphi phi hirdunlo lapen Tarabinth athengpi arong arum kangni thek-long-lo. “Nangli Judah pen kevang amontrima?” la arjulo. Neli helo, bangso amonit thak-lo.

¹⁵Hem nangdunra nelitum pen an chodam lonang, la pulo.

¹⁶Bonta Judah pen kevang amontri thak-lo, “Neli nanglilong hem nangdundelo, lapen nangli keru-kethai chodundelo. Ladak nanglilong jat asonta cho jun ingtungte,

¹⁷pima HEMPHU neliphan chori-junri lapen kevang atovarthot chevoiri pusi neliphan hukum pilo.”

¹⁸Ansi Bethel amontri kesar la aphan pulo, “Nelita nangli sonsi inut amontrilo, lapen HEMPHU ahukum pen pherangke neliphan pulo, nangliphan hemponsi keru kethaiji aphan.” Bonta montri kesar abang pachobeilo.

¹⁹Lasi Judah pen kevang amontri ta montri kesar along dunlo lapen an esan chodunlo.

²⁰Halatum tebul along kechongni ahut montri kesar aphan HEMPHU alam vang-lo,

²¹lapen Judah pen kevang amontri aphan hangserlo, “HEMPHU pulo, nang laphan kroimolo lapen alangli paklemtoi akam klemkledet-lo.

²²La kalilesi, nang la-thot chevoilo lapen chonangne pu alangli kepu adim an esan cholo. Laso apotsi nangphan pathilotpo, lapen nangbang arpum nanghemtun athiri along nangpippe detpo.”

²³Halatum kechotangdet aphi, Judah pen kevang amontri aphan montrikesar abang gadha athak arthang-lo,

²⁴la ardonsi damlo. Tovar hingho ejon la pen chetong-lo, lapen pathilot-lo. La abang arpum tovar athaksi tilailo lapen la agadha lapen hinghota la adungsi arjaptherlo.

²⁵Ajehak amonit tovar kedam atum abang arpum tovar athak thek-long-lo, lapen hinghota adung arjapding thek-long-lo. Halatum Bethel an damsi kethek-long alam thanlo.

²⁶Montri kesar abang laso alam arjulongsi la pulo, “La HEMPHU alam kekroikre amontri abang-lo! Lasi HEMPHU hingho toisi patengkheng-lo lapen laphan pathilot-lo, lason plangji pu HEMPHU kepu asonthotsi plang-lo.”

²⁷Anke la asomar atum aphan chepulo, “Ne gadha siktha,” Halatum kepu ateng klemlo,

²⁸lapen la ardonsi lapen montri abang arpum tovar athak agadha pen pen tilai thek-long-lo lapen hinghota la adung arjapding-lo. Hingho ke abang arpum choche mate gadha aphanta tengkhengkhe.

²⁹Montri kesar bang arpum humsi agadha athak la arthang-lo, lapen la aphuthak keningri lapen kepipjisi la Bethel vanthudet-lo.

³⁰La amethang ahemtun athiri along pip-lo. La lapen la asomar atum la aphuthak aningduksi pulo,

³¹“Ne thilote laso athiri along le nepipnon lapen laso arnam amonit kepip athiri adungle nepipnon! Lapen nerrepi alangli repi akungle nebinon.’

³²HEMPHU ahukum pen Bethel adovan lapen kedo-an Samaria along along kedo karcho adim-heihei aputhak la keningje alam an chekokvekji.”

³³Israel arecho Jeroboam amethang kehingno pen suiselang, bonta la kekimtang adovan-heihei along kepangdukjisi jung-jung ahemtun-heihei aling abang aphan kurusar akam bat-lo.

³⁴Laso apap la ahin pen keklem apotsi la amethang ahem akeru lapen akevir chevanlo.