Read Karbi 1 RECHO 14 Bible Online

1 RECHO 14 - Karbi bible

1 RECHO 14

¹Halaso ahut Jeroboam Recho asopo Abijah aphu sodet-lo.

²Apiso aphan Jeroboam pulo, “Kaprek arje cheparjenon anke baduta nangphan nangchinine detpo, lapen Ahijah montri kedo adim Shiloh anat damnon, lasi ne recho chopo pu nekethan abang-lo.

³Plang kep ahim lapen ajehak himkarnu lapen pijo alang ebong laphan ponpinon. Esopo kopi plang poma lale arjunon lapen la nangphan nangthanpo.”

⁴Lasi bangpi Ahijah ahem Shiloh along damlo, kesar ongsi la amek checharchedet-lo.

⁵Jeroboam apiso kevangji alam lapen bangpi aso keso alam karjujisi kevangji pu HEMPHU laphan thanlo. Lapen kopisi kepu nangjima Ahijah aphan HEMPHU thanlo. Jeroboam apiso nanglesi bangpi anut kaprek ason chekronglo.

⁶Bonta bangpi inghap along an vangtang-lo pu Ahijah chinisi la pulo, “Arlo vangnon. Neli chini nangli Jeroboam apiso. Kopisi nangli bang anut kaprek ason kechekrong-loma? Nangliphan neli isi birta kehingno do.

⁷Damra Jeroboam aphan lasonsi Israel a-Arnam HEMPHU kepulo pu laphan thandamnon: Ne nangphan rat angbong ingvailo lapen Nerat Israel aphuthak kepangri abang nang paplang-lo.

⁸David aso-asu pen recho-arat Ne thakdetsi nangphan la nangpidet-lo. Bonta nangke Nephan kekroithek, Ne hukum-heihei kekroithek, lapen Ne kepu aling keklem abang Neban David ason kali.

⁹Nangphrang kepangri atum apar pap kethesi nang keklemthulang. Nang Nephan kroimolo, lapen kumlin-heihei lapen ingchin arje selamsi keparcho pen ajok Nephan an sosesi Nening pakang-lo.

¹⁰Laso apot nanghem aphuthak Ne akevir vanpo lapen nangso pinso kedo-an kebi-kesar seta pathilap po. Nanghem pen Ne che-opo; halatum hi asonsi arkok-lor po.

¹¹Rongsopi along nanghemtun abangphu thi lote abang arpum methansi chopo, lapen rong angtan kethi aling abangphan takunsi chopo. Ne HEMPHU-si la kepulo.”

¹²Jeroboam apiso aphan Ahijah ningjebomlang, “Non hem chedamnon. Rong nang kelut pen amat nangsopo thilotpo,

¹³Israel arat kedo-an la aphuthak ningdukpo lapen laphan pippo. Laphansi Jeroboam ahemtun angbong pip pame longchotji, pima la aphansi Israel Arnam HEMPHU aning dokchot-lo.”

¹⁴Israel aputhak HEMPHU inut arecho batpo, lasi Jeroboam ahemtun pavirdetpo.

¹⁵Israel aphan HEMPHU aduk pipo, lapen bangpi langjeng along arpik keklemphler asonsi klemphlerpo. Aphusar atum aphan kepi alongle keme pen Israel arat atum aphan la phu-etpo, lapen Euphratis Aroi apar halatum aphan hijikjampo, pima latum Asherah arnampi akumlin-heihei keselam pen ajok la aning pakang-lo.

¹⁶Israel aphan HEMPHU obubpo pima Jeroboam pap klemlo lapen Israel arat aphanta pap keklem anat jalo.

¹⁷Tirzah anat Jeroboam apiso chevoilo. Bangpi ahem arlo kelut pen amat aso thipilot-lo.

¹⁸Israel arat atum la aphuthak aningduk-lo, lapen laphan pipbup-lo, aban Ahijah montri pen HEMPHU kepu asonthot chekok-lo.

¹⁹Jeroboam Recho keklem akam an, la ron kechedan lapen la kosonsi pangriloma, lahei Israel Recho Aphurkimo along tok-et-lo.

²⁰Jeroboam ningkan 22 an recho cholo. La thi-lo lapen pip-lo, lapen la asopo Nadab si la alar recho cholo.

²¹Solomon asopo Rehoboam Judah arecho kecho ahut arta ningkan 41, lapen HEMPHU Israel kedo-an alongri angbong pen laphan karchoji adim kangvai Jerusalem arongsopi along la ningkan 17 pangrilo. Rehoboam apai Naamah la Ammon alongri pen.

²²Judah arat atum HEMPHU aphan langplotsi pap klemlo lapen aphusar atum keklem apar kehingno latum klemsi Alangliphan aningpakang muchot-lo.

²³Halatum chobei arnam-heihei atum aphan karchoji adim-heihei kimlo lapen Asherah aphan karcho angthek-heihei inglong along lapen thengpi abin arum arlong archok-heihei elo.

²⁴Kehingnonei ke lahei bang kekroitap atum karcho adim-heihei along akhat kave apinso lapen a-arloso ta hadak dolo. Israel atum det arlo kepaphrangbom ahut HEMPHU adang pen kephlungtang amonit atum keklem ketherakmeme akam an Judah arat atum chesekelo.

²⁵Rehoboam ningkan 5 recho kecho ahut Ijip arecho Shishak ke Jerusalem tengkheng-lo.

²⁶La Kardomhemthepi lapen rechohem along kedo-an akhi lapen Solomon keselam ser achong-heiheita pon-et-lo.

²⁷Halahei kepaplengji aphan Rehoboam Recho tam achong-heihei selamlo lapen halahei kelangji aphan rechohem anghap raibang arideng arpu pilo.

²⁸Recho Kardomhemthepi kedam aphongtin, tonbang atum chong-heihei ponpo lapen lahei puthot tonbang angdeng ponthudetpo.

²⁹Rehoboam Recho asontin keklem akam an Judah Arecho Aphurkimo along tok-et-lo.

³⁰La kedo-an ahut Rehoboam lapen Jeroboam atum kaiketa lahin lahin ron chedanverlo.

³¹Rehoboam thilot-lo lapen David Arongsopi recho athiri alongsi pip-lo, lapen la asopo Abijah si la alar recho cholo.