Read Karbi 1 RECHO 15 Bible Online

1 RECHO 15 - Karbi bible

1 RECHO 15

¹Israel arecho Jeroboam recho kecho ningkan 18 ahut Abijah, Judah arecho plang-lo,

²la Jerusalem along ningkan 3 pangrilo. La apai Maakah, Absalom asopi.

³La apo keklem apap asonthotsi lata klemlo lapen la Arnam HEMPHU aphan kroipameme, aphusar David ason kali,

⁴Bonta David ajoine la Arnam HEMPHU sopo Abijah inut la aphi Jerusalem kepangriji aphan lapen Jerusalem keparaiji aphan pilo.

⁵HEMPHU la klemlo, pima la aphan aning kepadok akam David klemlo. Lapen la ahukum kedo-an Hitti aso Uriah alam pen apar ke kekkroikre pu avedet-lo.

⁶Rehoboam lapen Jeroboam angbong ason Abijah akai angbong ta doverlo.

⁷Abijah keklem akam asontin Judah recho atum aphurkimo along tok-et-lo.

⁸Abijah thilot-lo lapen David Arongsopi along pip-lo lapen la asopo Asa si la alar recho cholo.

⁹Israel arecho Jeroboam recho kecho ningkan 20 ahut, Asa si Judah arecho plang-lo,

¹⁰lapen la Jerusalem along ningkan 41 pangrilo. La aphi Maakah Absalom asopi.

¹¹Aphusar David keklem asonsi Asa ke HEMPHU aningkehang atengsi klemlo.

¹²Karchotap adim-heihei along kedo akhat kave apinso lapen a-arloso kedo-an det adang pen la phlung-et-lo lapen la aphrang kepangri atum keselam akumlin kedo-anta var-et-lo.

¹³Aphi Maakah aphan ta Rechopi apei anghoi pen bangpi aphan la pasuntuk-lo, pima bangpi ta isi kekhor arnampi Asherah akumlin paselamlo. Kumlin Asa bengsi Kidron arlok along me phrinlo.

¹⁴Kedo-an karchotap adim-heihei Asa pavir-et-edet seta la akai isi angbong HEMPHU aphansi kroithip-lo.

¹⁵Apo Arnam aphan kehodai amar an la Kardomhemthepi arlosi bilo lapen amethang kehodai amar anta bidunlo.

¹⁶Judah arecho Asa lapen Israel arecho Baasha angbong ron doverlo, latum jakong kelong pen amat.

¹⁷Baasha abang Judah tengkheng-lo lapen Judah adet kedam lapen kevang ke pavedetjisi Ramah arong paisong kim pangcheng-lo.

¹⁸Lasi Asa Recho Kardomhemthepi along lapen rechohem along kedo-an aser arup la ajehak amethang achakri atum ha Damaskas, Siria arecho Benhadad, la Tabrimmon asopo, lapen Hezion asu anat birta lodunsi pathondamlo:

¹⁹“Elitum jalangpet-lonang, nelitum apo atum ason. Laso aser arup ke nangliphan isi anong-elo. Non Israel arecho Baasha pen kejalang che-onon, anke la aron-aso asong ne longri pen chepon nangpo.”

²⁰Benhadad Rechota ta Asa kehang alam anat chedondunlo lapen Israel arongsopi ketengkhengjisi la aron-armu ahemphu lapen halatum arong asong toidunlo. Halatum Ijon, Dan, Abel Beth Maakah, Galili alangbi adung ahavar, lapen Naphtali alongri kangthim cheraidet-lo.

²¹Baasha Recho la kopi plang-loma alam arjulongsi Ramah apaisong kekim la olo lapen Tirjah anat chedamjuilo.

²²Anke Asa Rechota Judah adang an isi hukum pachethang-lo, inutbak aphanta pajokjesi kedo-an amonit atum Baasha kekim a-arlong-heihei lapen athengpi-heihei Ramah apaisong kekim-i amar keroiponji aphan parapdunlo. Laso amar pen Asa ta Mizpah lapen Geba, la Benjamin alongri arongsopi kim ilo.

²³Asa Recho keklem ason an, la angthin kethe akam, lapen rong kekim-heihei an Judah arecho atum aphurkimo alongsi tok-et-lo. Bonta la kesar ahut keng akeso pen amat la kengkokjok-lo.

²⁴Asa thilot-lo, David Arongsopi along recho athiri alongsi laphan pip-lo, lapen asopo Jehoshaphatsi la alar recho cholo.

²⁵Judah arecho Asa recho kecho ningkan 2 ahut Jeroboam Recho asopo Nadab, Israel arecho plang-lo, lapen la ningkan hini pangrilo.

²⁶La aphrang apo asonsi, la HEMPHU aphan langplotsi pap klemlo lapen Israel atum aphan pap keklem anat jalo.

²⁷Ahijah asopo Baasha, la Isaakar akhei, Nadab abe thursi Nadab lapen la aron-aso atum Philistia adet Gibbethon arongsopi kecheraidam ahut laphan pathilot-lo.

²⁸Laso keplang ke Judah arecho Asa recho kecho kethom aningkan ahut-lo. Lapen Baasha ke Nadab alar Israel arecho cholo.

²⁹Lapen amat la Jeroboam ahemtun abangphu aphan kepathi cheng-lo. Laso alam HEMPHU aban Ahijah montri Shiloh kedo abang pen kemontri ateng-lo, Jeroboam ahemtun kedo-anta thi-etpo, inutta reng-relo.

³⁰La plang-lo, pima Jeroboam keklem apap lapen Israel aphan pap kepaklemtoi pen ajok Israel Arnam HEMPHU aphan aning papung-lo.

³¹Nadab keklem asontin akam Israel Arecho aphurkimo alongsi tok-et-lo.

³²Judah arecho Asa lapen Israel arecho Baasha latum jakong kedo un ahut anke lahin lahin ron chedanverlo.

³³Judah arecho Asa recho kecho kethom aningkan, Ahijah asopo Baasha Israel kedo-an arecho plang-lo, lapen la Tirzah along ningkan 24 pangrilo.

³⁴La aphrang Jeroboam Recho asonsi la HEMPHU aphan langplotsi pap klemlo lapen Israel aphanta pap keklem anat jalo.