Read Karbi 1 RECHO 16 Bible Online

1 RECHO 16 - Karbi bible

1 RECHO 16

¹Hanani asopo Jehu montri aphan HEMPHU pulo, lapen Baasha aphan laso abirta pathantoilo.

²“Nangthangta kali, bonta Ne nangphan Nerat Israel aputhak jalin nangbak-lo. Non nangta Jeroboam asonsi pap klemtang-lo, lapen Nerat aso aphan pap anat jalo. Halatum apap Nephan Nening pasulo,

³lasi Ne nang lapen nanghemtun Jeroboam aphan Ne keklem asonthot pavedetpo.

⁴Nanghemtun asor rongsopi along kethi aling abangphan methansi pachopo, lapen rong angtan kethi aling abangphan takunsi pachopo.”

⁵Baasha keklem ason an lapen la angthinkethe akam an Israel Arecho Aphurkimo alongsi tok-et-lo.

⁶Baasha thilot-lo lapen Tirzah alongsi pip-lo, Lapen asopo Elah si la alar recho cholo.

⁷HEMPHU pen Baasha lapen la ahemtun aphan Jehu montrisi halaso abirta pilo, pima HEMPHU aphan Baasha langplotsi pap klemlo. Jeroboam Recho keklem kehingno ason keklem apot HEMPHU aning papungchot kali bonta la Jeroboam ahemtun asor kedo-an aphan kepathi apot.

⁸Judah arecho Asa recho kecho 26 aningkan, Baasha asopo Elah Israel arecho plang-lo, lapen la Tirzah along ningkan 2 pangrilo.

⁹La inut achakri ronhemkonglong achitim an ahemphu Zimra, laphan kephangnoji rilo. Tirzah along arnisi Elah abang Arza, la rechohem ahemphu ahem hor ingripik-lo.

¹⁰Zimri arlo lutsi Elah aphan pathilot-lo, lapen la alar recho cholo. Laso keplang ke Judah arecho Asa recho kecho 27 aningkan ahut-lo.

¹¹Zimri recho chodet pen Baasha ahemtun asor kedo-an aphan pathilo. Adon lapen ajirpo pinso an aphan pathilo.

¹²HEMPHU alam montri Jehu pen kepu atengsi Baasha ahemtun asor kedo-an aphan Zimri pathi-et-lo.

¹³Pima halatum kumlin ardomlo, lapen halatum Israel aso aphan pap keklem anat jalo, Baasha lapen Elah atum Israel Arnam HEMPHU aning papung-lo.

¹⁴Elah keklem asontin akam Israel Arecho Aphurkimo along tok-et-lo.

¹⁵Judah arecho Asa recho kecho 27 aningkan ahut, Zimri Tirzah along Israel aputhak ni throksi pangrilo. Israel aron-aso atum ke Philistia adet Gibbethon arongsopi tengkheng bomlang,

¹⁶lapen Zimri ke recho abe thursi laphan apran armuttang-lo pu arjulongsi latum hadak amat halatum ron apinpo Omri aphan Israel arecholo pu pachethang-lo.

¹⁷Omri la aron-asong Gibbethon osi Tirzah cheraidamlo.

¹⁸Rongsopi cheraidet-lo pu Zimri thek-longsi rechohem akut arlo chepachong adim damlo, rechohem me keidut-lo, lapen amede pen thilot-lo.

¹⁹Lason plang-lo pima la HEMPHU aphan langplotsi pap klemlo. La aphusar Jeroboam ason amethang apap lapen Israel aphan pap keklem keja apot la HEMPHU aphan aning padokdelo.

²⁰Zimri keklem asontin akam an, la kephangno akam alakha-heiheita Israel Arecho aphurkimo alongsi tok-et-lo.

²¹Israel arat atum chethakdak-lo: Ajehak atum Ginath asopo Tibni aphansi recho kebat kangtung, lapen kaprek atum ke Omri aphansi aningkehang.

²²Kejut ke Omri aphan aningkehang atumsi hailo. Tibni thilot-lo lapen Omrisi recho cholo.

²³Lasi Judah arecho Asa recho kecho 31 aningkansi Omri Israel atum arecho plang-lo, lapen la ningkan 12 pangrilo. Tirzah along ningkan 6 Omri kepangri cheng-lo.

²⁴Laso aphi Shemer pen Samaria anglong la rup 6000 pen namdet-lo. Inglong Omrisi parpongchenlo, hadak rong kimlo, lapen aphrang ahemphu Shemer amen irsi Samaria pu amen irlo.

²⁵Aphusar atum apar Omri ke HEMPHU aphan langplotsi pap klemlo.

²⁶La aphrang Jeroboam asonsi la amethang apap-heihei lapen Israel arat aphan pap lapen kumlin kardom keja pen ajok HEMPHU aphan aning papung-lo.

²⁷Omri keklem lapen kepachun akam asontin Israel Arecho Aphurkimo along tok-et-lo.

²⁸Omri thilo-lo lapen Samaria alongsi pip-lo, lapen la asopo Ahab si la alar recho cholo.

²⁹Judah arecho Asa recho kecho 38 aningkan ahut, Omri asopo Ahabsi Israel arecho plang-lo, lapen la Samaria along ningkan 22 pangrilo.

³⁰La aphusar atum aparta la HEMPHU aphan langplotsi pap klem muchot-lo.

³¹Jeroboam apap ason ke laphan dordelang; hala an sosesi la aninghang-lang lapen Jezebel, bangpi ke Sidon arecho Ethbaal asopi, Baal aphan karcho, pangrilo.

³²Samaria along Baal kardomhem kimpilo, laphan isi adovan selampilo, lapen la kardomhem arlo bipilo.

³³La Asherah arnampi akumlin isi parjap-lo. La aphrang Israel arecho atum kedo-an apar la Israel Arnam HEMPHU aphan aning papungneilo.

³⁴La recho kecho un ahut Bethel pen Hiel pu abang Jeriko kimthulo. Nun asopo Joshua pen HEMPHU kemontri asonthotsi Jeriko aputa kekim ahut la asopo akleng Abiram thipilot-lo, lapen anghap kekim ahut asopo akebinei Segub ta thipilot-lo.