Read Karbi 1 RECHO 17 Bible Online

1 RECHO 17 - Karbi bible

1 RECHO 17

¹Inut amontri amen Elijah pu Gilead alongri Tishbe pen Ahab Recho aphan pulo, “Nekangduk Israel Arnam HEMPHU, kereng amen pensi, ne nangpulo, ne ningjejetik ningkan hini mate ningkan kethom an ar-e mate arve avedetji.”

²Anke Elijah aphan HEMPHU pulo,

³laso adim o-ra nihang anat damra Kerith alangjeng akung chepatu damnon.

⁴Langjengsi kejunji aphan lang nangphan nangpadorpo lapen vo-akpi nangphan an kepavanjisi Ne hukum pitang-lo.

⁵HEMPHU ahukum Elijah kroilo, lapen damsi Kerith alangjeng pen la lang junlo,

⁶lapen vo-akpisi adap arnikangsam apor arnivang laphan him lapen ok vanpilo.

⁷Aphi arve kavedet ajok langjengta krenghak-lo.

⁸Anke Elijah aphan HEMPHU pulo,

⁹“Non Zarephath arong, la Sidon adung anat damnon, lapen hadak donon. Hadak ahemepi nangphan kepangkrangjisi Ne hukum pitang-lo.”

¹⁰Lasi Elijah Zarephath anat damlo, lapen la rong anghap an nanglesi inut ahemepi theng kepangrum la thek-long-lo. “Kanghon pen lang harlung isi nelipi iktha.” Bangpi aphan la pulo.

¹¹Bangpi la ke-endam ahut la hangthulo, “Kanghon pen neliphan ajehak ahimta nelivan pi iktha.”

¹²Bangpi thak-lo, “Nangli Arnam HEMPHU kereng amen pen semetang-lo, him aplang nerideng ave. Neli harlung along kedo chekip isi athengthe aduk lapen jit ajangthu abong along alingtai asap-o do la an helo. Neli ladak ajehak theng kepangrumjisi kevang, lapen hem cheponsi nelilong kedo-an asap-o nelisopo lapen nelipharman an chotun dampo. La nelitum aphan kejutsi asan a-an po, anke kangchir pensi nelitum thinangpo.”

¹³Mathari, bangpi aphan Elijah pulo. “Damra klem dambomnon lapen an chotun damnon. Bonta nangli kedo ason an pen asap-o ahim selamra nelilong van iktha, anke aphile ahin an nangli lapen nanglisopo aphan selampinon.

¹⁴Athe lasonsi Israel Arnam HEMPHU pulo: ‘Harlung thengthe aduk ik-e mate abong ajangthu, Ne HEMPHU arve pajangjetik arni an ik-elo.’”

¹⁵Hemepi damsi bangpi aphan Elijah kepu ateng klemlo, lapen halatum kedo-an aphan ongdung arni anta an dorphlup-lo.

¹⁶Elijah aphan HEMPHU kechechak asonthotsi harlung athengthe aduk ik-edet-lo, lapen bong ajangthuta ik-edet-lo.

¹⁷Penang arni aphi hemepi asopo sodet-lo; la keso tanbomlo, lapen padu ke thilot khangjang-lo.

¹⁸Elijah aphan bangpi pulo, “Arnam amonit, la nangli neliphan kopisi keklem loma? Ladak nangli nelipap-heihei Arnam aphan kepachiniji-tong kevangma lapen la apotsi nesopo aphan kepathiloma?”

¹⁹Oso neliphan nepitha, Elijah pulo, bangpi ari pen la oso enlo, laphan angsong angdeng pondet-lo, lapen laphan hongplang along pa-i-joilo.

²⁰Anke la asekethe pen ardomlo, “O ne Arnam, laso ahemepi aphan lason kepherememe akam Nang kopisi keklemloma? Bangpi nephan ingjinsosi ne-oralo, lapen non Nang laphan pathilot-lo!”

²¹Anke laso a-oso aphuthak Elijah ari chephajeng-lo batai kethom ardomlo, “O ne Arnam, laso a-oso aphan parengtha!”

²²Elijah akardom HEMPHU thak-lo; oso achethe vangphunsi cherengthulo.

²³Oso aphan Elijah arum apei along pondetsi bangpi aphan pulo, “Langtha nanglisopo rengtang-lo!”

²⁴Bangpi thak-lo, “Non neli chinilo nangli inut Arnam amonit lapen HEMPHU nanglipen ningje binong-lo!”