Read Karbi 1 RECHO 18 Bible Online

1 RECHO 18 - Karbi bible

1 RECHO 18

¹Penang an aphi, kethom akhim aningkan, Elijah aphan HEMPHU pulo, “Damra Ahab Recho angno cheklang damnon lapen Ne arve pajangpo.”

²Lasi Elijah kedam pangcheng-lo. Samaria along akhim khorpik,

³lasi Obadiah aphan Ahab hang-lo, la rechohem kelang abang-lo. (Obadiah ke HEMPHU aphan karcho parsikpi abang-lo,

⁴lapen Jezebel HEMPHU amontri atum aphan kepathi ahut, Obadiah halatum bang 100 aphan ponsi longku ajo pasongni patulo, lapen halatum aphan an lapen lang pilo.)

⁵Obadiah aphan Ahab pulo, “Etum damra langjeng lapen lang aroi alangkungtin det adang langdam-lonang , losei lapen losei aloso kepareng-etji aphan bap longjimene.”

⁶Halatum chekroisi abangphutin along kaprek longle kelangdamjisi suirep-lo.

⁷Obadiah atovar chedambomsi, la menmen Elijah aphan chetong-lo. Laphan alangli pangthek-lo, la angno angphun patongkisi arjulo, “La nangli chenamloma, akehai?”

⁸Kalang, ne Elijahlo, la thak-lo. “Damra nangli hemphu recho aphan than damnon, ne daksi do.”

⁹Obadiah thak-lo, “Neli nanglilam recho aphan thansi nangliphan kepathitoi pen kopisi pap keklem nangjilang?

¹⁰Nangli Arnam HEMPHU kereng amen pen neli semetang-lo, recho nangliphan pirthe adang adet tin paritoilo. Inut det kepangri abang amethang adet nangli ave pu than pachinilote, halaso kepangri abangphan nangliphan longle pu Ahab semepatang-toilo.

¹¹Non neliphan nangli la along damsi nangli ladak do pu pathantoi-loma?

¹²HEMPHU akarjong jongsi nangliphan kechinine pin adim neli damdet aphi pondet-lote kosonpo? Anke neli Ahab aphan ladak nangli kedo alam thanpo lapen la nangliphan nanglongle det-lote, la neliphan pathilotpo. Mathatha, neli HEMPHU aphan karcho parsikpik abang-lo ha neli oso ahut pen.

¹³HEMPHU amontri atum aphan Jezebel kepathi ahut neli halatum pasongni bang 50 bang 50 si bang 100 atum aphan longku ajo patutang-lo lapen halatum aphan lang lapen an padorlopu nangli arjulongle langma?

¹⁴La apotsi nangli kopusi nangliphan hukum kepipo damra recho aphan nangli ladaksi do pu kethanji? La neliphan pathilotpo!”

¹⁵Elijah thak-lo, Ne kangduk HEMPHU Kereng amen pen, ne semetang-lo, pini ne methangsi recho angno cheklangpo.

¹⁶Lasi Obadiahke Ahab Recho along damlo lapen laphan thanlo, lapen La Elijah aphan kechetong damjisi barlo.

¹⁷Laphan Ahab thek-longsi, la pulo, “O nang daksi doma, Israel angbong kepasungtheknei abang!”

¹⁸Nele kepasung abang kali, Elijah thak-lo. “Nang helo, nang lapen nangpo. Nang HEMPHU ahukum-heihei kroikresi Baal akumlin-heihei aphan archorong-lo.

¹⁹Non Karmel anglong along nephan kechetongjile Israel arat kedo-an aphan hukum pinon, lapen Baal amontri atum bang 450 lapen arnampi Asherah amontri atum bang 400 la rechopi Jezebel kerapdun atum ta nangpadunnon.”

²⁰Lasi Israel kedo-an aphan lapen Baal amontri atum Karmel anglong along kechetong damjisi Ahab hangpet-lo.

²¹Rat anat Elijah arludamsi pulo, “Nanglitum aning kepharji aphan ko-an apor enbom jilangma? HEMPHU jongsi Arnam tangte, la aphanle archonon; bonta Baal jongsi Arnam pulote laphanle archonon!” Bonta rat atum etheta thakthedet-lo.

²²Ansi Elijah pulo, “HEMPHU amontri kedolang angbong neli inutnat-lo, bonta Baal amontri bang 450 dolang.

²³Chainong alo jonni vannon; Baal amontri atum aphan ejon pa-ennang, lapen pathira la pangthan-ilonang lapen la theng athak pabat-lonang bonta me thor-ri. Hala ajon kaprek achainong alo aphan ta lasonthotsi neli klempo.

²⁴Anke Baal amontri halatum methang a-arnam aphan pardom lonang, lapen nelita HEMPHU aphan ardompo, lapen kardom thaksi me nangketoi abang helo Arnamlo.” Rat atum chedondunpetsi hangdun-prak-lo.

²⁵Anke Baal amontri atum aphan Elijah pulo, “Nangtum ongdung apotsi, chainong alo ejon ponra la klem paphrangtha. Nangtum a-arnam aphan ardomnon bonta theng aputhak me thor-ri.”

²⁶Halatum aphan kevanpi achainong alo latum ponlo lapen la sik-lo, lapen Baal aphan anerlochitim an ardomlo. Halatum hang-lo, “Netum aphan nethaktha Baal!” lapen halatum kekim adovan komchensi kanbomlo. Bonta thang akethak angthek vangvedet-lo.

²⁷Anerlo chitim halatum aphan Elijah chongthuilo! “Ase pathe muchot-ra ardomtha! La inut arnamlo! La dojoimene mate kesangmene, mate la konatne damtang-lo mene! Kalite amekjang-lot mene lapen nangtum laphan ingthur nangpo!”

²⁸Lasi montri atum asepathesi ardomlo lapen tariso, nokso-heihei pen amethang abang cherot-lo, halatum ajutang ateng pen, avi bubetik an klemlo.

²⁹Halatum un an hang charbulo lapen pangchamjamsi anerlo chitim anta klemlo; bonta thangnat akethak nangklang-kledet-lo. Ethenat aseta arju longledet-lo.

³⁰Rat atum aphan Elijah pulo, “Nedung vangpetnon,” lapen halatum kedo-an la adung chingrumpet-lo. Kehingnotang HEMPHU adovan la selamthulo.

³¹Arlong krehini enlo, HEMPHU Israel pu amen kepi amonit Jakob asomar amen pen khei krehini aphan isi si arlong pilo.

³²Laso a-arlong-heihei pen la HEMPHU aphan karcho adovan la kimthulo. La dong isi la tuk-lo, la akung kung dovan athak la theng bat-lo, chainong alo ingthan-ilo,

³³lapen la theng athak bat-lo. La pulo, “Tibuk phli lang papleng-ra athok lapen theng athak la dungnon.” Halatum la klemlo,

³⁴lapen la pulo, “Lasonthot klemthutha,” lapen halatum la klemlo. “Puthot ephong klemthutha,” la pulo, lapen halatum la klemlo.

³⁵Lang dovan akung kung anta lesi dong paplengset-lo.

³⁶Anerlo chitim karkli apor Elijah montri dovan adung damsi ardomlo, “Abraham, Isaak lapen Jakob a-Arnam HEMPHU, Nang Israel a-Arnamlo lapen ne Nangbanlo lapen lahei ne Nanghukum atengsi keklemlo pura angthek paklangnon.

³⁷Nethaktha, HEMPHU, nethaktha, lasi laso arat atum Nanghelo HEMPHU Arnamlo lapen halatum aphan Nangmethang adung cheponthulo pu chinipo.”

³⁸HEMPHU me nang-pasunlo lapen la athok, theng lapen arlong-heihei chodetsi longle paprungdopsi dong alang anta pakrenghak-lo.

³⁹Rat atum la thek-longsi halatum longle tongbaksi pulo, “HEMPHU si Arnamlo; HEMPHU inutvetsi Arnam chot!”

⁴⁰Elijah hukum pilo, “Baal amontri atum aphan nepnon, halatum inutbak aphanta padam longri!” Halatum kedo-an aphan rat atum nep-et-lo lapen Elijah halatum aphan Kishon Aroi paponsi halatum aphan pathi-et-lo.

⁴¹Anke Ahab Recho aphan Elijah pulo, “Non damra an chodamnon. Arve kevangji arki ne arjulong-lo.”

⁴²Ahab kechedam ahut Elijah Karmel anglong aphuchong arludamlo, hadak la angphun longle patongkisi aphu akengphu adak chebilo.

⁴³La aban aphan la pulo, “Damra talo anat langdamtha.” Aban abang damlo, lapen nang chevoisi pulo, “Neli jatta thek-longle,” batai 7 la aphan Elijah palangdam toilo.

⁴⁴Batai throksi aphong nangchevoi ahut ke la pulo, “Neli asap-o monit ari apak athek inghun thek-long-lo, la talo anat pensi kevang.” Aban aphan Elijah hukum pilo, “Ahab Recho along damra la aphan thandamnon aronhem-konglong pacharlura arve laphan kekhang aphrang hem pachedamtoi non.”

⁴⁵Malomso aphi sining inghun binthipsi pangting sang-lo, tomon kejap pangcheng-lo, lapen arve kejang pangcheng-lo. Ahab amethang ronhemkonglong athak arlusi Jezreel anat chevoi pangcheng-lo.

⁴⁶Elijah aphuthak HEMPHU ajakong vang-lo; la ape chephalomsi avam chekok-het-lo lapen Jezreel anat atovar soding Ahab aphrang kat undet-lo.