Read Karbi 1 RECHO 19 Bible Online

1 RECHO 19 - Karbi bible

1 RECHO 19

¹Ahab Recho apiso Jezebel aphan Elijah keklem asontin alam lapen la kosonsi Baal amontri atum aphan pathi-et loma lahei than et-lo.

²Bangpi Elijah aphan isi abirta papitoilo: Montri atum aphan nang keklem asonthotsi penap laso aporchit nangphan nang pathi thekthete arnam atum nephan nepathengbop nang.

³Elijah pherelo, lapen apran chepajokjisi kat-lo. La aban aphan cheponsi Judah adet Beersheba anat damlo. Aban aphan hadak otekangsi,

⁴Elijah kejejangtang ajo arnikangthim damlo. La sangsi erong athengpi abin along chongnilo lapen kethijisi aninghang-lo. “La an sung-ong-lo, HEMPHU,” pu la ardomlo. “Ne chethe pondetnon, ne kethilotsi akemelo!”

⁵La thengpi arum tilaisi amekjang-lot-lo. Menmen amat inut Arnam apherangke laphan abang paphosi pulo, “Mek prangra chonon.”

⁶La adung arei chelang-lo lapen him eplang lapen langbong isi aphutang adung thek-long-lo. La chosi junlo, lapen che-ithujoilo.

⁷Bataihini aphong HEMPHU apherangke nang chevoithusi laphan ingthurlo, lapen pulo, “Thurra chonon, kalite tovar ajak keding kedam nangji nangphan tan-ongpo.”

⁸Elijah thurlo, lapen cholo-junlo, lapen kepi an chosi Sinai, Kangthir Anglong anat ni 40 kedamji ajakong long-lo.

⁹Ajo kepangthang jisi hadak kedo alongku arlo la lutdamlo. Menmen laphan HEMPHU hang-lo, “Elijah nang ladak kopisi keklemlo?”

¹⁰La thak-lo, “Arnam Kethe HEMPHU, Nangphansi ne kaiketa ingduk-lo nangphanchot. Bonta Israel arat atum Nang pen halatum Kechejok Aloh phrilo, Nang dovan-heihei pangjelo, lapen Nang montri kedo-an aphan pathilo. Ne helo kereng longchot lapen nephanta halatum kepathijisi rivung-lo!”

¹¹Damra inglong aphuchong along Ne ingno arjapnon, laphan HEMPHU pulo. Anke HEMPHU damlo lapen tomon langno toisi inglong phardaksi arlong patichelo bonta HEMPHU tomon alongta ave. Tomon ingsamlo, lapen hadak chikli vang-lo bonta chikli alongta HEMPHU ave.

¹²Chikli aphi hadak me akar dolo, bonta me alongta HEMPHU ave. Lapen me aphi isi than-palamso ase nangdolo.

¹³Elijah la arjulongsi ape pen la amahang chedip-lo lapen damsi longku amangho along arjap damlo. Laphan ase pen pulo, “Elijah, nang ladak kopisi keklemlo?”

¹⁴La thak-lo, “Arnam Kethe HEMPHU, ne kaita Nangphansi ingduk-lo Nangphanchot. Bonta Israel arat atum Nangpen halatum Kechejok aloh phritang-lo, lapen Nangdovan-heiheita pangje-et-lo, lapen kedo-an Nang montri atum aphan pathilo. Ne inutnat-lo kereng-long, lapen nephanta halatum kepathijisi rivung-lo.”

¹⁵HEMPHU pulo, “Damaskas adung akejejangtang ajo chevoithunon, anke rongsopi lutdam non lapen Hazael aphan Siria arecho kebat jile jangthu patipnon;

¹⁶Nimshi asopo Jehu aphan Israel arecho kebatjile jangthu patipnon, lapen Abel Meholah pen Shaphat asopo Elisha aphan nangdular montri keplangjile jangthu patipnon.

¹⁷Hazael kepathiji pen kejok atum an Jehu pathipo. Lapen Jehu arideng pen kejok atum an aphan Elishasi pathipo.

¹⁸Seta Israel along bang suri 7 arat Ne pareng-longji la kedo-an atum Nephan kekroithip atumlo lapen Baal aphan angphun patongkike lapen la akumlin aphan kangjupje atumlo.”

¹⁹Elijah osi Elisha aphan chainong pen hai kebai asong thek-long-lo; la aphrang hai kre isi do lapen la kebaike aphisi lo. Elijah ape chephloksi aphang la bat-lo.

²⁰Anke Elisha chainong ahai osi Elijah aphi aphi kat-lo, lapen pulo, “Nelipei nelipo aphan kechekak akangjup nepangjup damlongtha, anke neli nanglilong nangdunpo.” Elijah thak-lo, “Damtame, chedamnon, ne nangphan nang khangkhelo!”

²¹Ansi Elisha la ahai along chedamthulo, halahei thusi, a-ok tunlo, arphang me thekdet-lo. Rat aphan ok pachophruilo, lapen halatum la cholo. Anke la Elijah arapbang cheplangsi aphi phi dunlo.