Read Karbi 1 RECHO 2 Bible Online

1 RECHO 2 - Karbi bible

1 RECHO 2

¹David kethipo pu ahut, la asopo Solomon aphan hang-lo, lapen la aphan kejut alam la pinkhat-lo:

²“Ne kethiji apor nangkelelo. Nangning chepathirthip-ra mathathip non,

³lapen nang Arnam HEMPHU hukum nangkepi nang-paklemtoi alingle klemnon. La aron kedo-an kroinon, lapen ahukum an Moses aron aloh ketok an ta kroinon, lasi nang keklem kedam aling seta chingthurpo.

⁴Nang jongsi La aphan kroilote nephan kepu, neso-nesu atumsi halatum kechere pen aning lapen karjong kedo-an pen ne hukum kroithipthetik an Israel aputhak pangripo pu kechechak ateng la klempo.

⁵Ako dothulang, nangning dotahai, Joab banghini Israel aron-armu ahemphu atum Abner, la Ner asopo Amosa, la Jether asopo atum aphan pathisi lason nephan klemlo. Nangning dotahai, ron ahut halatum keklem apot la kethi alar kehuijisi det ingsamri ahut halatum aphan la kopuson apran armut-loma la adaikave amonit atum aphan pathilo, lapen la keklem athesi ne parpunang-lo athe ne kesung chechak nang-lo.

⁶Nang chinilo, kopisi keklem nangjima? Nang la aphan lapu amat pathi longjoiri.

⁷Bonta Gilead pen Barzillai asomar atum aphan kangjinso paklang nangji lapen halatum aphan lang nangji, pima nang-ik Absalom arideng pen ne kekat un ahut halatum nephan kangjinso paklang-lo.

⁸Benjamin alongri Bahurim arong pen kevang Gera asopo Shimei la inut-lo. Ne Mahanaim kedam un ahut halaso arni la nephan ahirjuno nepilo, bonta Jordan Aroi akung la aphan ne kechetong ahut ne la aphan HEMPHU amen pen pathithelo pu jasemet semetang-lo.

⁹Bonta nang laphan adukpipe pin pen padamlongri. Nang chinilo, kopisi keklem nangjima, lapen laphan pathithetik nang langding nangne.”

¹⁰David thilot-lo lapen David arong-sopi alongsi pip-lo.

¹¹La Israel aputhak ningkan 40 recho cholo, ningkan 7 Hebron along lapen ningkan 33 Jerusalem along.

¹²Apo David alar Solomonsi recho cholo, lapen la recho ajakong thirpamelo.

¹³Anke Adonijah, la apei ke Haggith, la Solomon apei Bathsheba along damlo. “Nangli jirpo-jirpi kechehumri akevangma” bangpi arjulo. “Kalang,” la thak-lo,

¹⁴lapen la pulo, “Neli nangli pen eson kehangji alam do.” “La kopi?” bangpi arjulo.

¹⁵La thak-lo, “Nangli chini nelisi recho kechonangji abang lapen la Israel atum abangphutinta la aning chethelo. Bonta la prekdak-lo, lapen nemusi recho chorong-lo, pima la HEMPHU aningkehang-lo.

¹⁶Non neli ethe alam kechoningriji ninghang, kanghon pen la kroimorinon.” “La ke kopilo?” Bathsheba arjulo.

¹⁷La thak-lo, “Kanghon pen Solomon Recho aphan arju iktha, neli chini la nangliphan kroimome, Shunem pen a-arloso Abishag aphan nelipa-enlongtha.”

¹⁸Mesen alamlo, bangpi thak-lo. “Nanglipharman neli recho aphan thanpo.”

¹⁹Lasi Adonijah apharman Bathsheba kethandamjisi recho along damlo. Recho thurphlutsi apei aphan kardom pilo lapen angphun bangpi anat patongkilo. Ansi la anghoi chongnilo lapen anghoi kaprek la ar-e bangpi aphan vanpilo.

²⁰Bangpi pulo, “Neli eson alam nanglipen chohang ingtung; kanghon pen nekroimori.” “La kopi alamlo pei?” Alangli arjulo. “Ne nangliphan kroimome.”

²¹Bangpi thak-lo, “Nangli-ik Adonijah, Abishag aphan pangrilongtoinon.”

²²Nangli kopisi Abishag la aphan kehangpilo? Recho arjulo, “Nangli neliphan recho anghoita nehang tamele. Jat seta la ne-ik anat Abiathar kurusar, lapen Joab atum anat kroidunlo! ”

²³Ansi HEMPHU amen pen Solomon semetang-lo, “Adonijah ne pen kehang apot ne alar apran en thekthe pulote, HEMPHU neparburop lonang!

²⁴HEMPHU-si nepo David anghoi along nephan pangni pathirtoilo; alangli la kechechak ateng klemlo. Nephan lapen neso-nesu aphan det nepitang-lo. HEMPHU amen pen ne semetang-lo, pini amat Adonijah thinangji.”

²⁵Lasi Solomon Recho, Benaiah aphan hukum-heihei pilo, la damsi Adonijah aphan pathilo.

²⁶Anke Abiathar kurusar aphan Solomon Recho pulo, “Nanglirong hem Anathoth anat chedam iknon. Nangliphan neli pathithelo, pima nangli nelipo David along kedodun ahut nangli HEMPHU Kechejok Asinduk chepahemphulo, lapen nelipo akesung along nanglita sungdunlo.”

²⁷Ansi Abiathar, HEMPHU akurusar akam kangdukji pen pache-olo, lasi Shiloh along Eli kurusar lapen aso-asu aphan HEMPHU kepu alam pachekok-lo.

²⁸Kopi plangtang-loma, Joab arjulong-lo. (La Adonijah abe dunlo, bonta Absalom abe dunde.) Lasi la HEMPHU kedo apehem along kat-lo, lapen dovan ano ot-het-lo.

²⁹Joab pehem along katsi dovan along dolo pu alam Solomon Recho arjulongsi Joab kopi athesi dovan along kekat-loma laso alam keparjudamjisi Solomon pherangke inut toilo. Solomon aphan kephere-ongsi HEMPHU along kat-lo pu Joab thak-lo. Lasi Joab aphan kepathijisi Solomon Recho Benaiah aphan toilo.

³⁰La HEMPHU kedo a-Pehem along damlo lapen Joab aphan pulo, “Recho nangliphan nangpavangtoiji aphan hukum pilo.” “Kali,” Joab thak-lo, “Ne ladaksi thipo.” Benaiah recho along damthusi Joab kethak alam thanlo.

³¹Joab kepu aling klemnon! Solomon thak-lo. “Laphan pathira pipbupnon.

³²Lahei nepo David aphan pachininepin pen pran-karmut apot Joab aphan HEMPHU aduk pivekji. Joab banghini adaikave alang apar kememu amonit atum aphan pathilo: Abner, la Israel aron-armu ahemphu lapen Amosa, la Judah aron-armu ahemphu.

³³Halatum apran-karmut aduk Joab lapen aso-asu aphuthak padovernang. Bonta amethang anghoi athak kangni David aso-asu aphuthak HEMPHU kaiketa kam pachunpiverpo.”

³⁴Lasi Benaiah ke HEMPHU kedo apehem anat damsi Joab aphan pathilo, lapen amethang arong ahem alongsi pip-lo.

³⁵Joab adim ron-armu ahemphu Benaiah aphan rechosi bat-lo lapen Abiathar adim Zadok kurusar aphan padolo.

³⁶Anke Shimei aphan Recho pahangdamlo, lapen la aphan pulo, “Jerusalem along nanglimethang aphan hem chekimnon. Ladak donon lapen rongsopi orinon.

³⁷Nangli jongsi o-ra Kidron alangroi parai kap-lote nangli thivekpo lapen nangli methangsi adai chedin nangpo.”

³⁸Mesenlo, Recho, Shimei thak-lo. “Nangli kepu alingsi neli klempo.” Lasi la Jerusalem along ajirdingklui an dolo.

³⁹Ningkan kethom aphi Shimei aban atum banghini Gath arecho Akish Kaakah asopo along kat-lo.

⁴⁰Laso alam Shimei arjulong-lo, halatum Gath alongsi do, lasi amethang agadha ardonsi Gath arecho Akish along la aban cheridamlo. Halatum aphan la longsi hem chevandet-lo.

⁴¹Shimei keklem alam Solomon arjulongsi

⁴²la aphan pahang damtoilo lapen pulo, “HEMPHU amen pen Jerusalem ori pu neli nangliphan semepadengtoilo, lapen nangli la klemlote nangli thivek nangji pu nangliphan pacheretoilo. Nangli la kroikreloma lapen nephan kroipo pu ningjejema?

⁴³Tangte nangli kopi athesi nangliseme kechak ateng klemklesi neli hukum kroikredet-loma?

⁴⁴Nangli nelipo David aphan keklem kehingno ason an nangli chechini pame. Laso apot HEMPHU nangliphan adukpipo.

⁴⁵Bonta la neliphan pahirjumeji lapen David arecho-arat kaike aphan pathirji.”

⁴⁶Anke recho, Benaiah aphan hukum-heihei pilo, la damsi Shimei aphan pathilo. Nonke Solomon aridengsi rat do pathirlo.