Read Karbi 1 RECHO 20 Bible Online

1 RECHO 20 - Karbi bible

1 RECHO 20

¹Siria arecho Benhadad aron-asong kedo-an pangrumlo, lapen alosei, ronhemkonglong pen bang 32 kepangri atum rapdunlo, la barlo lapen Samaria ketengkheng jisi damlo, lapen la aputhak tengkheng-lo.

²La rongsopi anat Israel arecho Ahab aphan pherangke atum toisi papulo,

³“Benhadad Recho nanglipen ser, rup, nang arloso atum lapen nangsomar angbong kangtangnei abangphan pachehodai jisi hang-lo.”

⁴Ne hemphu, Benhadad Recho aphan punon, ne kroilo; ne lapen ne chepahemphu asontinta alanglilo, pusi Ahab thak-lo.

⁵Aphi pherangke atum Ahab along vangsi Benhadad pen akaprek hangthulo: “Ser, rup, nangpiso, nangso, nephan nehodai nangji pu nangphan nangpulo.

⁶Non jat seta, ne chakri atum nang rechohem lapen nang chakri atum ahem arlo hormu kepariji aphan nangtoipo, lapen halatum adorkeso amar aling ponpo. Halatum hadak penap nonpu apor nanglepo.”

⁷Ahab Recho det adang kedo-an ajalin atum aphan hangsi pulo, “Nanglitum thek-long-lo, laso amonit ephan epavirji aninghang-lo. La birta nepilo nepiso neso neser, nerup nehang-lo, lapen neta kroidunlo.”

⁸Keja atum lapen rat atum pulo, “Laphan nanglino chedenri; kroidunri.”

⁹Lasi Benhadad apherangke atum aphan Ahab thak-lo, “Ne hemphu recho aphan thannon la aphrang akehang alam ne kroilo, bonta aphi akehang abang ke ne kroithekthe.” Pherangke atum dam et-lo lapen akaprek abirta Benhadad pen vanthulo:

¹⁰“Laso nang-rongsopi kepavirji aphan ne dorphlup amonit vansi halatum arideng arlongso papon-repji. La klemthekthe pulote arnam atum nepathilot nang!”

¹¹Ahab Recho thak-lo, “Benhadad Recho aphan thannon inut ahok aron-aso la ron aphi si chepindakji, la aphrang kali.”

¹²Benhadad lapen la kecherap asong kepangri atum pen hem-heihei along kecho-kejun ahut Ahab pen kethak aloh long-lo. La amonit atum aphan rongsopi kepatengkheng jisi pachesiktoilo, lasi halatum chesiksi adim chedorep-lo.

¹³Halaso ahut inut amontri Ahab Recho along damlo, lapen pulo, “HEMPHU pulo, ‘hala ake-ongpi ron-armu aphan phereri! Pini laso aputhak nang pahailongji, lapen nang chinipo Ne helo HEMPHU.’”

¹⁴Ketengkhengji aphan komat-lo kejapo? Ahab arjulo. Montri abang thak-lo, “Longri a-Govornor ahukum aber kedo riso aron-aso atumsi la klempo pusi HEMPHU pulo.” “Asongpi aphan komatsi japonpo?” recho arjulo. “Nangli” montri thak-lo.

¹⁵Lasi Recho abang riso aron-aso atum aphan hangpet-lo halatum longri anokbe aberlo. Pangrumpet bang 232. Anke la Israel aron-armu aphan hang-lo, pangrumpet bang suri throksi pinso amonit dolo.

¹⁶Anerlo chitim ahutsi tengkheng-lo, halaso ahut Benhadad lapen la bang 32 kejelang ajirpo atum amethang apehem arlo kangri kangkrang pensi dolo.

¹⁷Kechengsi riso aron-aso atum patebok-lo. Benhadad ketoi hotur kelang atum laphan Samaria pen ron-aso asong nangbarlo pu thanlo.

¹⁸La hukumpilo, “Halatum aphan akerengle nepnon, halatum kechedanjile vang tame mate kepangsam aphanle vang setame.”

¹⁹Riso aron-aso atum ketengkheng jalo, aphi Israel aron-aso atum dunlo,

²⁰lapen abangphutinta la kechedan abangphan pathirep-lo. Siria atum kat-et-lo lapen Israel atum kehung padikhrimlo, bonta losei athak ardonlongsi Benhadad kat-longjuilo, la aphi losei kardon atum ta chedunlo.

²¹Rong ahidi kedo losei ronhemkonglong-heihei Ahab Recho cheraisi penang an a-Siria atum aphan areng pasolo.

²²Ansi Ahab Recho along montri damlo lapen pulo, “Hem chedamnon, lapen ron-asong pangtangnon, lapen mang pamenon, pima non kevangji thengpi arvo kechingjok apor Siria arecho nang tengkheng-thuji.”

²³Benhadad Recho achakri atum laphan pulo, “Israel arnam atum ke inglong a-arnam atumlo, la apotsi ephan latum eparemdet-lo. Bonta jongsi eli halatum pen thoi along chedanlote eli parem unvekji.

²⁴Non bang 32 kepangri atum aphan pavedet-ra halatum adim hidi aron ahemphu atum bi iknon.

²⁵Anke hala keremdet aron-armu an thakthak, aphrang ateng ke-ongdung alosei lapen aronhemkonglong-heihei hangpetnon. Thoi along Israel atum pen eli chedan lonang lapen non aphong abang ke halatum aphan eli paremlongpo.” Benhadad Recho kroisi halatum kepare ateng klemlo.

²⁶Thengpi arvo kechingjok apor la amonit atum hang-lo lapen Israel atum aphan ketengkhengjisi Aphek arongsopi anat halatum pen pen nangbarlo.

²⁷Israel atumta chehangpet-lo, lapen chesik pamelo; halatum barsi palongni Siria atum aphan pangnosi mukam kimlo. Rong ahidi bithe kehijikjam a-Siria atum pen pangbarlote Israel atum ke bi asomar ahurhini ason plang-lo.

²⁸Inut amonit Ahab Recho along damsi pulo, “La helo HEMPHU kepu alamlo; ‘Siria atum kepu Ne ke inglong a-arnam lapen thoi a-arnam kali pu apot halatum ke-ongdung aron-armu aputhak nangphan Ne nangpahaiji, lapen nang lapen nangrat atum anta Ne HEMPHU-lo pu chinipo.’”

²⁹Siria lapen Israel atum ni 7 an pupu chepangno-phrongsi amukam-heihei along chedonang-lo. Throksi arni halatum ron kechedan pangcheng-lo, lapen Israel atum Suri 100 a-Siria aphan pathilo.

³⁰Ahin kerenglang atum Aphek arongsopi anat katsi hadak bang suri 27 aputhak rongsopi arpong krep-lo. Benhadad ta rongsopi anat chepachong damlo, lapen hem anung angdengsi chepachong-lo.

³¹La achakri inut damsi laphan pulo, “Neli arjulong-lo Israel arecho atum kangjinso the-o. Nelitum Avam bithe pe-thoila lapen chethok bithe arri pen chekok-ra Israel arecho along nepadam longtha la nangli pran pareng-long tahai mene.”

³²Lasi halatum avam bithe pethoila chekok-lo lapen halatum achethok bithe arri chekoksi Ahab along damlo lapen pulo, “Nangliban Benhadad achethe kereng-longji aphansi nangli choningrilo.” Ahab thak-lo, “La reng-et-langma? Mesenlo! La nephan nekorte asonlo!”

³³Benhadad achakri atum ahut kemesi cholangding-lo, lapen Ahab “Korte” kepu ahut latum men men puphit-lo, “Nangli kepu asonthotsi Benhadad ke nangli kortelo!” “Lapen nelong vantha, “ Ahab hukumpilo. Benhadad nanglesi, Ahab laphan ahemkonglong along karlu rap-rapji aphan hang-lo.

³⁴Laphan Benhadad pulo, “Nanglipo pen nelipo kepon arong-heihei nangliphan nangvoi-etpo, lapen Damaskas along beha keklemji adim cheselamtame, la nelipo Samaria along keklem asonthot.” Ahab thak-lo, “Lahei akechejok ajok neli nangliphan pajok-lo.” La pen kechejok aloh chetoksi laphan la padamlong-lo.

³⁵HEMPHU ahukum pen esong amontri atum pen inut abangphu ajirpo montri aphan parbutoilo. Bonta la kroikredet-lo,

³⁶lasi laphan la pulo, “Nang HEMPHU ahukum kroikredet apotsi nephan odet aphi hingho ejon nangphan pathilotpo.” La obup aphi hingho ejon vangsi laphan pathilot-lo.

³⁷Anke laso amontri amat anut kaprek amontri along damsi pulo, “Neliphan arbutha.” Laso amonit la klemlo, la jasemet arbulo, lapen laphan pasodak-lo.

³⁸Montri abang pen amahang chephung-lo, chepachinine pin si tovar akung arjapdam-therlo, lapen Israel arecho tovar anat kevangji aphan chonghong-ding-lo.

³⁹Recho vang-lo, montri abang alangliphan hangsersi pulo, Recho neli elong arong chedamlo, lapen keneptang ahotur aron-aso nelilong vangsi pulo, “Laso amonit langtha; la jongsi katjui lote nangpran chepinangpo kalite rup dum suri kethom adai tu nangpo.”

⁴⁰Bonta neli kaprek akam klemrong amat laso amonit katjuilo. Recho thak-lo, “Nangmethangsi nangho pen chepuvek-lo apot nang adai tu nangpo.”

⁴¹Amahang pen montri abang pe ingsekdaksi menmen laphan recho pangthekdet-lo.

⁴²Montri abang anke recho aphan pulo, “Ne nangphan pathinonpu hukum nangkepi amonit aphan nang pajokphlot apot nang ron-armu pavirdetpo, halaso aron-armu aphan kelangding apot.”

⁴³Aningke-oi lapen ning kerun pen Recho Samaria anat chevoilo.