Read Karbi 1 RECHO 21 Bible Online

1 RECHO 21 - Karbi bible

1 RECHO 21

¹Ahab arechohem Jezreel arong adung Naboth pu amen amonit adrakharikang aberi dolo.

²Arnisi Naboth aphan Ahab pulo, “Nang drakha aberi nepacherai longtha; la nehem pen tebok-het-lo, lapen laso alongle han aberi aphan ne klem ingtung, Laso alar isi akemenei adrakha aberi ne nangpiji, mate nang jongsi nangning hangte isi mesen ador ta nangpidetji.”

³Nephusar atum pensi ne la chepahemphulo, Naboth thak-lo. “Ne nangphan la pacherai longdetji aphan HEMPHU la paklemkle nang!”

⁴Naboth laphan kepu alam aputhak aning ke-oi lapen aningkethi pen si Ahab hem chedamlo. La amethang ahongplang athak tilailo, lapen an chochesi arpong anat pangnolo.

⁵La apiso Jezebel la along damsi arjulo, “Nang kopi apotsi la-an ning keduk-loma? Kopi athesi an choche-junjeloma?”

⁶La thak-lo, “Naboth nephan nekepu apot. La adrakha-beri ne kenamji aphan hang-lo, kalite laphan akaprek adrakha-beri pidetpo pulo bonta la puthip-lo, ne la cherai un-e!”

⁷Mesenlo! Nang recho kalima mate kelangma? Jezebel thak-lo, “Hongplang pen thurnon, chepangtang non lapen an chonon. Naboth adrakha aberi nangphan nang palongpipo.”

⁸Anke bangpi ajehak aloh Ahab amen pen toksi, la angthek pen halahei aputhak theng-lo, lapen lahei chakri atum lapen Jezreel asanchom asor kethe-keding aphan lolo.

⁹Loh-heihei along tok-lo, “Arnisi an kehum arni pachethang-lo, rat atum aphan hangpetnon lapen Naboth aphan man anghoi pinon.

¹⁰Arnam aphan lapen recho aphan ahirjuno pitang-lo pu amahang angno kebokji abangphu kehingno atum banghini anbak rinon, anke laphan rongsopi angtan pondet ra laphan arlong pen varbopnon.”

¹¹Chakri atum lapen Jezreel asanchom arong kethe-keding atum Jezebel hukum kepi ateng klemlo.

¹²Halatum arnisi an kehum arni pachethang-lo, rat aphan hangpet-lo lapen Naboth aphan aman anghoi pilo.

¹³Banghini ajat kelangno atum rat angno Arnam lapen recho aphan pahirjuno-tang-lo pu laphan bok-lo, lasi laphan rongsopi angtan pondet-lo lapen arlong pen varbop-lo.

¹⁴Laso abirta Jezebel aphan pachinilo; “Naboth aphan pathilot-lo.”

¹⁵Jezebel birta long-lok pen bangpi Ahab aphan pulo, “Naboth thitang-lo. Non damra la nangphan nangkejormo drakharikang aberi cheraidamnon.”

¹⁶Men men la kecherai damjisi Ahab damphit-lo.

¹⁷Anke Elijah Tishbe amontri aphan HEMPHU pulo,

¹⁸“Samaria arecho Ahab along damnon lapen nang Naboth adrakha aberi along thek-longpo, la kecheraiji dokdok-lo.

¹⁹Laphan Ne, HEMPHU-si kepu pule thannon, ‘Amonit aphan pathidet aphi nang la amarta cheraijilangma?’ Laphan thannon Ne lasonsi kepulo: ‘Naboth avi methan kanglek adimthot halahei amethan atum nangvi nang-chonglekpo?’”

²⁰Elijah aphan Ahab thek-longsi la pulo, “Nang nelong tong kevang loma, hotur?” Kalang-lo, nanglong-lo, Elijah thak-lo. “HEMPHU amek angden kehingno akam aputhaksi nangke nangmethang chehodai parsik-lo.

²¹Lasi HEMPHU nangphan pulo, ‘Ne nangphuthak akevir nangvanpo, Ne nangpavedet khangjangpo lapen nanghemtun pinso amonit an pavedetpo, risotame, kesar tame.

²²Nanghemtun ke Nebat asopo Jeroboam Recho lapen Ahijah asopo Baasha Recho ahemtun asonpo, pima Israel atum aphan pap anat kejapon pen ajok nang nening papung-lo.’”

²³Lapen Jezebel aphuthak HEMPHU lasonsi pulo, Jezreel arongsopi along bangpi abang arpum methan atum pachodetpo.

²⁴Nangdon nangrap angbong mane jongsi rongsopi angbong thilote, methan atumsi la chopo, lapen rong angtan kethi atum aphan ke takunsi chopo.

²⁵(Apiso Jezebel kepaklemtoi an HEMPHU amek angden kehingno akam keklem parsik Ahab ason baduta avelang.

²⁶Kumlin-heihei karcho, Israel arat atum kethebom ahut HEMPHU kephlungtang Amor atum keklemtang asonthakthak-lo.)

²⁷Elijah kepu, kepajut ahut Ahab amethang achoi chingsek-lo lapen lahei chephlok-lo, lapen pethoila che-umlo. La an kechojimolo lapen pethoila pensi amekjang-lo, lapen amahang ikkui lapen aningkeduk pensi damlo.

²⁸Elijah montri aphan HEMPHU pulo,

²⁹“Nang thek-long-loma Ne ingno Ahab ko-an chepabiloma? La laso keklem apot, la akai isi la aphuthak akevir Ne vanvelo; Ahab ahemtun aphuthak ke la asomar akai ahutsi akevir vanpo.”