Read Karbi 1 RECHO 22 Bible Online

1 RECHO 22 - Karbi bible

1 RECHO 22

¹Ningkan hini an Israel lapen Siria atum angbong ingsamjin pen dolo.

²Bonta kethom aningkan Judah arecho Jehoshaphat, Israel arecho Ahab aphan langdamlo.

³Ahab la kepangri atum aphan arjulo, “Siria arecho pen Gilead alongri Ramoth kebengthuji aphan kopisi eli thangta klemkledet-lo? La etum alongleke!”

⁴Lapen Jehoshaphat aphan Ahab pulo, “Ramoth ketengkhengji aphan nangli nangdunjima?” Nangli damlote neli chesikvensi kedolo, Jehoshaphat thak-lo, “Lapen ne ron-aso atum lapen losei kardon atum antalo.

⁵Bonta eli HEMPHU aphan arju nangji”

⁶Lasi Ahab bang 400 anbak amontri atum aphan hang-lo lapen halatum aphan arjulo, “Ne Ramoth tengkheng dam nangjima nangnema?” La tengkhengnon, pusi halatum thak-lo. “Nangliphan HEMPHU nang pahaidetpo.”

⁷Bonta Jehoshaphat arjulo, “HEMPHU aphan karjuji anut kaprek amontri aveloma?”

⁸Ahab thak-lo, “Inut dolang, Imlah asopo Mikaiah. Bonta ne laphan hijimlo, pima la nephan kaita akeme alam montritre; la kaita akehingno saide.” Lason nangli pu nangne! Jehoshaphat thak-lo.

⁹Ansi kangsaihem kepangri atum aphan Ahab phasi Mikaiah aphan non amat pavandetji aphan toilo.

¹⁰Recho banghinita recho apesi chingthang-lo lapen halatum amethang anghoi sarnung angsong Samaria pai anghap angtanchot chongnilo. Lapen halatum angno kedo-an amontri atum montri bomlo.

¹¹Halatum angbong Chenaanah asopo Zedekiah ingchin anu selamsi pulo: “La pensi nangli Siria atum pen chedanpo lapen halatum aphan parempamepo.”

¹²Kadokave amontri atumta ethenatsi pulo, “Ramoth abethurra barnon lapen nangli haiji,” halatum pulo, “HEMPHU nangliphan pahaidetpo.”

¹³Halaso ahut amat Mikaiah aphan kepahangdam achakri abang laphan pulo, “Kedo-an amontri atum Recho kehaiji alamsi montri pet-lo, lapen nanglita lason akeme alamsi thanpo.”

¹⁴Bonta Mikaiah thak-lo, “Kereng-et a-HEMPHU pen neli semetang-lo la kopisi nethanjima lasi neli puji!”

¹⁵La Ahab Recho angno kecheklang ahut laphan recho arjulo, Mikaiah, Jehoshaphat Recho lapen ne Ramoth tengkhengdam nangjima nangnema? Tengkhengnon! Mikaiah pulo, “Lapen nangli haiji, HEMPHU nangliphan pahaiji.”

¹⁶Bonta Ahab thak-lo, “Nang HEMPHU amen ningjelo pulote ahok alamle nethantu! Laso alam ne nangphan bataihini ko-ansi nangthan nangjilangma?”

¹⁷Mikaiah thak-lo, “Biresak ahur kevibang avedet ason-thak-thaksi Israel aron-armu inglong-heihei adang pratsei ne thek-long-lo, lapen HEMPHU pulo, ‘Lahei amonit kejabang ave; latum ingsamjin pen ahem pachedam lonang!’”

¹⁸Ahab, Jehoshaphat aphan pulo, “Neli nangpuloke la akeme ason nephan kaita montritre! La kaita kehingno saidelo!”

¹⁹Mikaiah pubomlo, “Non HEMPHU kopisi kepuloma arjutha! Sining angsong HEMPHU amethang anghoi chingnisi apherangke atum la adung karjap ne thek-long-lo.

²⁰HEMPHU arjulo, ‘Ahab aphan Ramoth padamra kethilotji aphan komatsi laphan pachobeidam poma?’ Ajehak apherangke atum eson pulo, lapen akaprek atum ason kaprek pubomlo,

²¹Isi akarjong HEMPHU anat vangpen akengkam nang chejorjetik ke, lapen pulo, ‘Ne laphan pachobeipo.’

²²‘Kosonlo?’ HEMPHU pulo. Karjong thak-lo, ‘Ne damsi Ahab amontri atum an kechobei alam kethanji paplangpo.’ HEMPHU pulo, ‘Damra laphan pachobeinon. Nangkam chunji.’”

²³Lapen Mikaiah pajut-lo: la helo keplangjilo. Lahei nangli montri atum nangliphan kepachobeijisi HEMPHU paplang-lo. Bonta la amethangsi nangli virji putang-lo!

²⁴Anke Zedekiah montri Mikaiah along damhamsi akecheng ardepphrat-lo, lapen arjulo, “Komantu pensi HEMPHU akarjong nephan osi nangphan ningjelo?”

²⁵Kechepatujisi ajehak anung angdeng arlo kedam ahut nang chechinipo, Mikaiah thak-lo.

²⁶Anke inut achakri aphan Ahab hukumpilo, “Mikaiah aphan nepchek-ra Amon anat pondetnon ha rongsopi a-Govornor along, lapen rechoso Joash along.

²⁷Laphan kebeng angdeng arlo pavarthotnon lapen laphan him lapen lang ne nangchevoilong pamemetik pichotnon.”

²⁸Nangli jongsi nangchevoi pamelong pulote HEMPHU nelipen ningjejelo pu chininon! Lapen la puthulo, “Nekeputang alam abangphutinta no chedentha!”

²⁹Anke Israel arecho Ahab lapen Judah arecho Jehoshaphat Gilead alongri Ramoth arongsopi ketengkhengjisi damlo.

³⁰Jehoshaphat aphan Ahab pulo, “Elitum ron kedam ahut, neli arje chepatupo, bonta nanglike recho apesi chingthangpo.” Lasonsi Israel arecho Ahab arje chepatusi ron damlo.

³¹Siria arecho la bang ronhemkonglong-heihei ahemphu aphan hukum pilo badu aphanta tengkheng-ri bonta Israel arecho aphansi tengkhengchot nangji pulo.

³²Lasi halatum Jehoshaphat recho aphan thek-lok pen halatum mathalo, la helo Israel arecholo, pu lapen laphan ketengkhengjisi latum la anat suilo, bonta la hangser amat,

³³halatum la Israel arecho kali pu chinisi halatum ketengkheng ingtonkok-lo.

³⁴Kopusonlone, Siria aron-aso inut thai apsi Ahab Recho bang adip kechechu adak aplut-lo. “Nephan ne apchok-lo!” pusi ronhemkonglong kardon abangphan hangserlo. “Suira ron kechedan adim pen neponnon!”

³⁵Ron kechedan sikchit ahut Ahab Recho amethang ronhemkonglong along chethapsi Siria atum anat pangnolo. Amek pen avi busi ronhemkonglong aklong palidung-lo lapen arnikangsam ahut la thilot-lo.

³⁶Arni chiji dokdok Israel aron-aso ehin pen ahin kaprek an hukum chethang-lo, “Abangphutin amonit amethang ahem arongsopi chedamreppo!”

³⁷Lasonsi Ahab Recho thilot-lo. La abang arpum Samaria pondetsi pipbup-lo.

³⁸La aronhemkonglong Samaria alangteng alongsi pangthirlo, hadak methan atumsi la avi chonglek-rip-lo lapen beisapi atum hadak chechamlo, lasonsi HEMPHU plangji pu kepu ateng nangplang-lo.

³⁹Ahab Recho keklem ason an la rechohem alon kepi ingnar aso alongsi tok-et-lo.

⁴⁰La thidet aphi asopo Ahaziah si la alar recho cholo.

⁴¹Israel arecho Ahab recho kecho phli aningkan ahut Asa asopo Jehoshaphat si Judah arecho plang-lo,

⁴²laso ahut la arta ningkan 35, lapen la Jerusalem along ningkan 25 pangrilo. La apei Azubah, Shilhi asopi.

⁴³Apo Asa asonsi la HEMPHU angno kopisi kechokma lasi klemlo; bonta karchotap adim-heihei pavirve, lapen rat atum halahei along athok lapen mephik kethor-heihei pibomlang.

⁴⁴Jehoshaphatke Israel arecho pen chepameverlo.

⁴⁵Jehoshaphat keklem akam an la angthinkethe lapen la ron kechedan-heihei Judah arecho atum Aphurkimo along tok-et-lo.

⁴⁶Karchotap adovan along kangduk abeisapi, abeisapo atum an la apo ha Asa arni pen kedo atum aphan padolongledet-lo.

⁴⁷Edom adet arecho avedet; la Judah arecho kebat ator abangsi pangrilo.

⁴⁸Ser kepavan Ophir adet kedamji talopi atelong Jehoshaphat Recho selamlo; bonta lahei Eziongeber along rurailo, lapen kai aphan vekvedet-lo.

⁴⁹Aphi Israel arecho Ahaziah la amonit pen Jehoshaphat amonit atum pavek-rappet toilo, seta Jehoshaphat laso alam dengdedet-lo.

⁵⁰Jehoshaphat thilot-lo lapen recho athiri David Arongsopi alongsi pip-lo, lapen la asopo Jehoramsi la alar recho cholo.

⁵¹Judah arecho Jehoshaphat recho kecho krethroksi aningkan ahutsi Ahab asopo Ahaziah, Israel arecho plang-lo, lapen la Samaria along ningkan hini pangrilo.

⁵²La HEMPHU aphan langplotsi pap klemlo, apo Ahab lapen apei Jezebel lapen Israel aphan pap anat kejapon abang Jeroboam akam-heiheisi la klemlo.

⁵³La Baal aphansi archolo lapen ingduk-lo, la aphrang apo asonthot, lapen Israel Arnam HEMPHU aning pakang-lo.