Read Karbi 1 RECHO 3 Bible Online

1 RECHO 3 - Karbi bible

1 RECHO 3

¹Ijip arecho asopi aphan Solomon chepangrisi Ijip pen jalang-lo. Bangpi aphan David Arongsopi along la vandetsi rechohem, kardomhem lapen Jerusalem apaisong kimtangtetik padolo.

²HEMPHU aphan kardomhem non anta kimpi longlelang, la apotsi rat atum bithe-bitha ongdung adovan kaprek kaprek alongsi thokjamlo.

³HEMPHU aphan Solomon chinghonlo lapen apo David kepinkhat alam an arjulo, bonta la kaprek kaprek adovan along pi thusi athok thok-lo.

⁴Mantune ephong la Gibeon along karkli damjisi damlo, pima hadak anong kethenei adovan kedo adimlo.

⁵Halabangso aningve la aphan mang pen HEMPHU cheklang-lo lapen la aphan arjulo, “Ne nangphan kopi nangning kehang ason nangpi nangjima?”

⁶Solomon thak-lo, “Nangli kaita nelipo David Nangliban aphan kanghon paklang-lo, lapen la mesen, kroithip lapen ahokpet pensi Nangli pen cherap-lo. Lapen la aphan kethenei lapen kedover akanghon paklangbomsi alangli dim kepangriji aphan inut asopo pilo.

⁷O Arnam. HEMPHU Nanglisi nelipo adim neliphan recho pacholo, neli bihek seta lapen kosonsi kepangri nangjima la chinine seta,

⁸ladak neli Nangli kangvaitang nangli methang arat pu-an ake-ong lakhata un-e arat angbongsi dolo.

⁹Lasi Nangli rat aphan ahokpet pen kepangri thek akenangsot keme kehingno kethakthek abidi le neliphan nepi iknon. Kalite la ke-ongdung Nanglirat aphan kopusonsi neli kepangri thekpoma?”

¹⁰Solomon laso akehang apot HEMPHU aning ingsampik-lo,

¹¹lasi laphan La pulo, “Nang chethe kedingji aphan, nangmethang keplang-kephiji aphan mate nanghotur kethi nangji aphan nang hanghesi ahokpet pen kepangriji aphan bidi kehang apot,

¹²nang kehangtang ason Ne klemvekpo. Nangphan bidi lapen kechinimuchot ajakong Ne nangpidetpo. Lason aphrang baduta avelang lapen mo aphi seta baduta longledetji.

¹³Lapen nang kehanghe asonta Ne nangpipo: Kaprek arecho atum an sose nangkai isi angbong kelitsong akhi lapen aman nangpipo.

¹⁴Lapen nang jongsi nangpo David ason Nelam kroira Ne Aron-heihei lapen hukum-heihei kroilote nangchetheta padingpo.”

¹⁵Solomon amek prangdaksi Arnamsi la aphan mang pen ningjelo pu chechinilo. Anke la Jerusalem chedamsi HEMPHU Kechejok Asinduk angno arjaptherlo lapen kephrin athok, kejelang athok-heihei HEMPHU aphan pilo. Laso aphi la kedo-an det kepangri atum aphan kecho-kejun pilo.

¹⁶Arnisi banghini abeisapi atum vang-lo lapen amethang Solomon Recho angno arjap-lo.

¹⁷Inut abangpi pulo, “Recho, laso a-arloso pen neli ehumpet ahem alongsi dorap-rap-lo. Bangpi hadak kedo un ahut neli pinso a-oso mahang pathek-lo.

¹⁸Nelisopo mahang kethek nini aphi bangpita sopinso a-oso mahang pathek-lo. Hem arlo nelitum banghini nat bang kaprek baduta ave.

¹⁹Anke ningve isi bangpi chepu thekthepin kechepharlep amat ajo aso cheberbop-lo.

²⁰Bangpi ajo thurphlutsi, nelong pen nelisopo amek kejang ahut, ahongplang along pondet-lo, anke kethitang asopo ke neli hongplang along bangpi nangbikok-lo.

²¹Puthot adap neli mek prangsi oso aphan mok chepachupo pulo, neli thek-long-lo, la thitang-lo. Neli adung lang pamelo la nelisopo kali.”

²²Bonta anut kaprek a-arloso abang pulo, “Kali! Kereng-et a-ososi nelisopo, lapen kethilot abangsi nangsolo!” Aphrangsi a-arloso abang thak-lo, “Kali! Kethilot a-ososi nangsolo, lapen kereng-et abangsi neso!” Lasonsi halatum recho angno chedansailo.

²³Solomon Recho pulo, “Nangtum banghinita kereng-et a-oso ke neso, lapen kethitang a-oso ke bang aso pusi pupet-lo.”

²⁴La nokjir pavantoilo, lapen la pavandet aphi la pulo,

²⁵“Kereng-et a-oso aphan achitim bengpetnon lapen latum aphan ebeng-beng pinon.”

²⁶Apei binong abang amethang aso aphan kechinghon pensi plengset apotsi recho aphan pulo, “Kanghon pen Recho, oso aphan pathi nangnelo! La bangpi aphanle la pidet khangjangnon!” Bonta anut kaprek a-arloso abang pulo, “Nelitum banghini aphan ta pinangnelo, klem ik bomnon, la pabengni detnon.”

²⁷Ansi Solomon pulo, “Oso aphan pathirinon! La aphrang a-arloso aphanle pinon, bangpi ke la apei apok-lo.”

²⁸Solomon kephar alam Israel arat atum arjulong pen la aphan aning aklong pen man kepijisi halatum aning arlo plengset-lo, pima halatum chinilo, Arnamsi ahokpet pen kesung alam kepangsaiji aphan Alangli la aphan bidi pilo.