Read Karbi 1 RECHO 4 Bible Online

1 RECHO 4 - Karbi bible

1 RECHO 4

¹Israel kedo-an aphuthak Solomon recho cholo,

²lapen la aber helo alangli det kepangri atumlo: Kurusar Azariah. La Zadok asopo.

³Kangsaihem achunbang atum: Shisha asopo Elihoreph lapen Ahijah. Ketok-kebi ahemphu: Ahilud asopo Jehoshaphat.

⁴Ron-armu ahemphu: Jehoiada asopo Benaiah. Kurusar atum: Zadok lapen Abiathar.

⁵Longri a-Govornor: Nathan asopo Azariah. Recho athanparebang: Nathan asopo Zabud kurusar.

⁶Rechohem ban ahemphu: Ahishar. Jakong akam ahemphu: Abda asopo Adoniram.

⁷Israel along bang krehini longri a-Govornor Solomon bat-lo. Halatum alongri pen recho lapen la ahem asor aphan an pador nang-lo. Ningkan isi angbong abangphutin chiklo ejon ejon arpu en nang-lo.

⁸La aber amen anke bang krehini achakri lapen latum longri ahemphulo: Benhur: Ephraim anglong alongri.

⁹Bendeker: Makaz, Shaalbim, Beth-Shemesh, Elon-beth-hanan arongsopi.

¹⁰Benhesed: Aruboth, Sokoh lapen Hepher alongri kedo-an.

¹¹Benabinadab: La Solomon asopi Taphath aphan pangrilo. Dor alongri.

¹²Ahilud asopo Baana: Tanak, Megiddo, lapen Beth shan adung alongri lapen Zarethan arong adung, Zezreel arong anitur anat, lapen Abel Meholah, Jokmeam arongsopi an.

¹³Bengeber: Gilead along Ramoth arongsopi, Gilead along Ja-ir aro arong-heihei. Manasseh aso-asu, lapen Bashan along Argob alongri, kadokave rong 60 anta paisong kedopet arong lapen anghap athak tam angchin abarlon do.

¹⁴Iddo asopo Ahinadab: Mahanaim anglong alongri.

¹⁵Ahimaaz, la Solomon asopi Basemath pen chepangrilo: Naphtali alongri si lang-lo.

¹⁶Hushai asopo Baana: Asher lapen Bealoth arong alongri.

¹⁷Paruah asopo Jehoshaphat: Issakar alongri.

¹⁸Shimei la Ela asopo: Benjamin alongri,

¹⁹Geber: Gilead alongri, Recho Sihon, Amor aso Og recho kepangri adimlo. Latum bang krehini aparta det adang angbong inut a-Govornor dolo.

²⁰Judah lapen Israel arat lapu-an ong-lo la talo akung kerikphrok asangtimili asonlo; latum cholo lapen junlo lapen ning cheparong-lo.

²¹Euphratis Aroi pen Philistia anat lapen Ijip ahoi adet angbong an Solomon adet parloponlo. Halatum la aphan midu pinang-lo lapen akai angbong la abersi donang-lo.

²²Arnivang Solomon kecho-kejunji aphan ateng ke lin suri 6 athengthe-keme aduk lapen an lin surikep;

²³chainong athukedo jonkep, lapen kepachopan achainong jon 20, lapen jon 100 abiresak, la apar thijok, jok-lu, vo lapen vokak-heihei nang-lo.

²⁴Det adang an Euphratis Aroi anichi an, Euphratis athak Tiphsah pen Gaza arongsopi anichi an Solomon pangrilo. Euphratis nichi arecho atum an la aber si donang-lo, lapen adung arei adet atum pen la chepangsamlo.

²⁵La rengtik an Judah lapen Israel adang arat atum jokvansi dolong-lo, adontinta amethang drakha aberi lapen thebo arong-heihei dolo.

²⁶Ron kechedan ahemkonglong, alosei jonsuri 40, lapen bangsuri 12 losei kardon atum Solomon dolo.

²⁷La bang krehini a-Govornor achiklo ajontin latum aphan kepavantoi ateng pen recho hormu Solomon Recho amethang lapen ahem asor aphan kenang ateng lapen rechohem kecho atum an aphan vanpilo; asontin akenang an halatum vanpilo.

²⁸Abangphutin a-Govornor amethang apharman asoktipli lapen sokpun la ron alosei lapen kenangji adim vanpilo.

²⁹Solomon aphan kelitsong abidi lapen arlo-alam karsik lapen akechini lin un-epin ason Arnam pilo.

³⁰Nihang adet athekkere mate Ijip adet athek-kere apar Solomon thekmulo.

³¹La kedo-an amonit angbong kethekneilo: Ezrahi asor Ethan, lapen Heman Kalkol, lapen Darda, Mahol asomar aparta thekmulang, lapen alangli nong adung arei adet anta chethangphlup-lo.

³²La suri kethom asarlamthe tok-lo.

³³Alangli thengpi arong lapen kejir arong-heihei alamta ningje, Lebanon a-Kedar arong pen hyssop pu arpong along kejir alam ta ningje; la marat api, vo, apok pen keklim api, lapen lang-ok alamta ningje.

³⁴Pirthe adang kedo arecho atum anta alangli bidi kedo alam arjulong lapen la along keparjudunji aphan monit atum toilo.