Read Karbi 1 RECHO 6 Bible Online

1 RECHO 6 - Karbi bible

1 RECHO 6

¹Ijip adet Israel arat atum ke-o ningkan 680 aphi, Solomon Israel aphuthak recho kecho ningkan phli aningkan, hini achiklo, lake Ziv achiklo Solomon Kardomhem aphuthak kam keklem pangcheng-lo.

²La arlo keding ingrup 60, arpan ingrup 20, lapen kangtui ingrup ingkoira throksi,

³kelut angdeng ingrup kep karnuk lapen ingrup ingkoi arpan, la hem kangthir arpan ateng-lo.

⁴Kardomhem arpong-heihei along inghapso dolo arlo abang ingtan aphan mute chekom muchot.

⁵Ingtan arpong anat, pu pu Kardomhemthepi arep lapen anung anat ingdeng kethom ahemchardon amaro kimlo, angdeng tin ingrup pho kangtui padolo.

⁶Abersi angdeng ke ingrup pho arpan, adun angdeng ingrup throk arpan lapen angsongsi angdeng ke ingrup throksi arpan padolo. Kardomhemthepi arpong aklong asitin ta abersi aklong aphan pen pang-armuchot-lo, lasi angdeng tinta ajarbop adai en-epin seta arpong athak sa unpo.

⁷Kardomhemthepi aphan arlong-heihei kerok atum kam arlong ketuk adimsi klem et amat Kardomhemthepi kekim adim kebu, cho-heihei arki pado jokphlot-lo.

⁸Abersi amaro angdeng anat kedam atovar ke Kardomhemthepi anitur anat, hadak hemchardon hini lapen kethom angdeng kedam-i adongkam do.

⁹Lasonsi Solomon Recho Kardomhemthepi kekim patang-lo. Kedar athengpi pen keselam ajarbop lapen aplang aphar-heihei sarnung aber aden bat-lo.

¹⁰Ahemchardon amaro angdengtinta kangtui ingrup pho la la ingtan Kardomhemthepi arpong pen ha kedar athengpi ajarbop pen pen lahei pacherap-lok-lo.

¹¹Solomon aphan HEMPHU pulo,

¹²“Nang jongsi Ne aron-heihei lapen Nehukum-heihei kroi pulote nangpo David aphan Ne kechak ason an nangphan nangklem piji.

¹³Nang kekim laso a-Kardomhemthepi along Nerat aso Israel atum angbong Ne dopo, lapen halatum aphan Ne kaike seta o-elo.”

¹⁴Lasi Kardomhemthepi Solomon kekim patang-lo.

¹⁵Hem arpong arlo kedar akapat pensi aklong pen ha sarnung aden an ta top-lo, lapen aklong ke theng-jangthu akapat pensi selamlo.

¹⁶Arlo angdeng, ke Kangthirnei Adim pusi irlo, la Kardomhemthepi anungsi kimlo. La keding ingrup ingkoi lapen kedar athengpi aplang aphar pensi aklong pen sarnung adeng tutsop an pangdengpet-lo.

¹⁷Kangthirnei Angdeng athengno angdengpi ketop akapat ke hongsi bonglang lapen mir-heihei arjan padolo;

¹⁸arlo anke kedar pen top-het amat arpong a-arlong-heihei aphan binthip-lo.

¹⁹Kardomhemthepi anung, ingdeng isi arlo kimlo, hadak HEMPHU Kechejok Asinduk bilo.

²⁰Laso arlo angdeng keding ingrup 20, arpan ingrup 20, lapen kangtuita ingrup 20, kedo-anta ajukave aser pensi top-lo. Dovan ke kedar akapat pensi top-lo.

²¹Kardomhemthepi arlo ser pensi top-lo, lapen arlo angdeng kelut ajakan angsong ser arihing pensi hingpet-lo, kelut ajakan jokta ser pensi top-lo.

²²Kardomhemthepi arlo kedo amar anta ser pensi top-lo, lapen Kangthirnei Adim adovan ta ser top-lo.

²³Avengkong hini kedo api jit athengpi pensi selamlo lapen Kang-thirnei Adimsi bilo, ajontin ta ingrupkep an ingtuilo.

²⁴Jonnita kethi lapen akrom isinat.

²⁵Ajontin ta avengkong hini do, isi si avengkong keding ingrup pho,

²⁶lasi ehin angchun pen akaprek angchun an ingrupkep do.

²⁷Kangthirnei Adim along pu pu akungsi halatum aphan bilo, anke jonni kechephajeng avengkong angdeng angbongchitim lahin lahin chepholo, lapen akaprek avengkong ke arpong papholo.

²⁸La avengkong hini api aphanta ser pensi top-lo.

²⁹Angdengpi arpong hei hei lapen arlo angdeng-heiheita arveng kedo api-heihei, sotele arong-heihei, mir arong-heihei arjansi hong-lo.

³⁰Lapen aklongta ser pensi top-lo.

³¹Isi inghap-cherop jit athengpi pen selamsi Kangthirnei Adim amangho along bilo.

³²Inghap atovar angsong-heihei along arveng kedo api-heihei sotele arong-heihei lapen mir-heihei arjan along ser topdunlo.

³³Angdengpi amangho anghap ke jit athengpi pensi anophli kechingbarchit anghap adai selamlo.

³⁴Hini inghap duphlop thengjangthu athengpi pen selamlo,

³⁵lapen arveng kedo api-heihei sotele arong-heihei lapen mir-heihei arjan hongsi ser pen top-lo.

³⁶Kardomhemthepi athengnosi arlo atikup kimlo, arpong pen pacherap-lo, la arlong pharthom aling kedar ajarbop ephar jokdunlo.

³⁷Kardomhemthepi aputah ke hini achiklosi pangnilo, lake Ziv achiklo, Solomon Recho kecho phli aningkan ahut.

³⁸Chiklo jon nerkep achiklo lake Bul achiklo, Solomon Recho kecho 11 aningkansi kemang ateng Kardomhemthepi la patang pamelo. La kekim kepatang Solomon aphan ningkan 7 endet-lo.