Read Karbi 1 RECHO 7 Bible Online

1 RECHO 7 - Karbi bible

1 RECHO 7

¹Solomon amethang aphan rechohem ehum chekimlo, lapen laphan la ningkan krekethom enlo.

²Lebanon anampi pu ahem keding ingrup 100 lapen arpan ingrup 50, lapen kangtui ingrup thomkep.

³La kedar anujok renthom do, aren tin hong 15, kedar apengdang halahei athaksi bat-lo. Sarnung aden ta kedar athengpi anujok karchak ahormu angdeng an paledamlo.

⁴Arpong-heihei ta renthom anghapso do.

⁵Kedam anghap lapen anghapso asitin ta pu pu arpong aren chepangno chomlo.

⁶Hongkup ahem keding ingrup 5o lapen arpan ingrup 30, la hongkup do, la anujoksi archak-lo.

⁷Recho anghoi angdeng, ke kangsai ahem pusi irlo, hadak Solomon lam-heihei ingsailo, lapen aklong pen angsong an ta kedar athengpi si enlo.

⁸Solomon amethang angdeng, atikup kaprek kangsaihem anung ta akaprek ahem asonsi kimlo. Ijip arecho asopi amethang apiso aphan akaprek ahem ateng isinatsi kimpilo.

⁹La kedo-an ahem-heihei lapen tikupthepi anta aputa pen angsong anta arlongkeme pensi kimlo. Arlong-heihei ketuk adimsi apun ateng pen rok-lo, arlo lapen angtan arangso kedo ajohton pen.

¹⁰Aputa-heihei ke arlong ketuk adim arlong thepi ensi selamlo, ajehak ke keding ingrup nerkep an dolo, lapen ajehak ke ingrup kep an dolo.

¹¹Halahei athaksi ke akaprek arlong kedar ajarbop apun pensi rok-lo.

¹²Rechohem atikup, Kardomhemthepi atikup, lapen Kardomhemthepi angdeng amangho-heihei arpong ke kedar ajarbop kerok a-arlong pharthom lote jokdunpo.

¹³Huram pu amonit aphan Solomon Recho hang-lo, la inut bipan kethekser amonit Tair arongsopi si kedo, lapen tam angchin akam keklem thekpame abang-lo.

¹⁴La apo thi-et-lo, Tair asor, lapen Tam angchin akam thekpamelo; la apei ke Naphtali akhei. Huram inut kereset lapen kethektang bipan amonit. La Solomon Recho kepha Tam angchin akam kechepahemphuji aphan deng-lo.

¹⁵Huram Tam angchin archok hongni pachorlo, ahingtin ta keding ingrup krenerkep lapen kebong-long ingrup krehini lapen lahei Kardomhemthepi amangho elo.

¹⁶La anujok hongni athak kebatji aphan aphu hini pachorlo, asitin ta ingrup 5 pangtuilo.

¹⁷Archok athaksi lek arri asang selamsi hing-lo,

¹⁸lapen tam angchin adalim athe renni selamlo.

¹⁹Archok aphu-heihei pindong amir nangnak arjan selamlo, la keding ingrup phli,

²⁰lapen lek arri asang athaksi kebong-longdir arjan alongsi bat-lo. Archok aphu ahongtin along dalim athe arjan renni pen the 200 padolo.

²¹Huram lahei tam angchin archok hini Kardomhemthepi amangho athengno si e-lo: nitur anat amen ke Jakin pusi irlo, lapen nirep ahin anat ke Boaz pusi amen irlo.

²²Pindong amir nangnak tam angchin aphu-heihei archok athaksi bat-lo. Lasonsi, archok akam patang pamelo.

²³Anke alangli kecho atalo amangkui pen amangkui anta ingrup kep selamlo. Lake bong-longdir. Lake ingrup-pho ingtuilo, lapen la pakomchem ingrup thomkep akeding arri nangkok-lo.

²⁴Lapen amangkui arum komchensi alangbong dolo; ingrup isi bongkep do, talo kompet lo. La talo kechor ahut chorrappet-lo.

²⁵Lapen la jonkrehini tam achainong athak bat-lo; jonthom nirep anat chepangnolo; jonthom nichi anat chepangnolo; jonthom nitur anat chepangnolo lapen jonthom nihang anat chepangnolo. Lapen talo la athak bat-lo. Lapen akengber arlo anat-lo.

²⁶La karthat munphli lapen amangkui harlung amangkui asonsi selamdet-lo, pindong amir nangnak. La lang mon suri isira pharo isi anbak jang-lo.

²⁷Huram tam ahemkonglong humkep selamlo, ahumtin keding ingrup phli, lapen kangtui ingrup kethom do.

²⁸Halahei anophli padosi hop kreilo,

²⁹ahop along hingho, chainong, arveng kedo api-heihei arjan hong-lo, lapen ahop-heihei along hingho lapen chainong-heihei athak, aber ta mir alek asang hing-lo.

³⁰Ahumtin akongtelong phli do lapen tam ajor bilo. Anophli alongta phumang aphan tam anujok dolo, lahei anujok along pu pu ta mir alek chordunlo.

³¹Phumang aphan angsongsi isi avaikang ahop padolo. La angsong pa-utarsi ronhemkonglong athak pen kangtui ingrup isi lapen la aber echak do. La akung kung kehong padolo.

³²Akongtelong kangtui tengkup hini, lahei abom abersi bilo lapen ajor ke ahemkonglong pen pacherap-het-lo.

³³Akongtelong-heihei ke ronhemkonglong akongtelong ason, lahei ajor, adang, adang archok lapen akroi-heihei anta tam angchin saidelo.

³⁴Ahumtin ahemkonglong aber ano archok hongphli do, lahei ronhemkonglong ahum pen pacherap-het.

³⁵Ahumtin ahemkonglong athaksi echak anbak kangtui angkui do; la archok lapen aden-heihei avengkong kedo api-heihei, hingho-heihei,

³⁶lapen sotele arong-heihei arjansi chordunlo, adak adim kedo aling mir alek asang bilo,

³⁷lasonsi ronhemkonglong selamlo; ahumtin ta kethe-kebi, lapen aboron isinat.

³⁸Huram phumang kep selamlo, aphutin ehum ahemkonglong aphanlo. Aphutin angbong chitim pen kepun ingrup phli lapen lin 800 alang jang.

³⁹La ronhemkonglong humpho kardomhemthepi anitur anat bilo, lapen akaprek humpho abang nirep anat bilo, langpen abang ke la nitur-nihang anatsi bilo.

⁴⁰Tibuk, bevuk, harlung-heihei Huram selamlo. Alang kam an la HEMPHU Akardomhemthepi Solomon Recho aphansi klem patangpilo. Lahei helo la keklemtang ason:

⁴¹Archok hongni, lapen la archok-heihei athak kebat harlung nangnak aphu-heihei.

⁴²Lapen aphu-heihei athak komchen kebu pacherop arri chardon, lapen aphu athak alon kepijisi tam adalim athe asitin along renni pharo isi.

⁴³Hemkonglong humkep, phumang kep,

⁴⁴Langpen isi, lapen la aphan karchak jon krehini achainong alo,

⁴⁵Phule-heihei, bevuk-heihei lapen harlunghei hei. La kadokave Kardomhemthepi aphan si Huram kenaibot atam pensi Solomon Recho aphan selampilo.

⁴⁶Lahei kedo-an ta Jordan Arlok Sukkoth lapen Zarethan along adaksi Recho paselamlo.

⁴⁷Lahei tam angchin amar Solomon lin jokphlot lo, pima lahei ongpik, lapen ardi kaita lin nodak.

⁴⁸Kardom ahemthepi ajohton-heihei Solomon ser pen paselamlo. Dovan, Arnam aphan him kehodai atebul,

⁴⁹Kangthirnei Adim kebi amelur archok hongkep, nitur ahin anat pho lapen nirep ahin anat pho; mir-heihei melur-heihei munghep-heihei anta ser saidelo;

⁵⁰harlung-heihei, melur ade kangtip ajohton, harlung-heihei, mephik akasu-heihei, koila akri kepon-i aharlung; lapen Kangthirnei Adim anghap-heihei, lapen Kardomhemthepi anghap-heihei akobja anta ser pensi selamlo. La hei anta ser pen selamlo.

⁵¹Kardomhemthepi aputhak keklem nangji akam an Solomon Recho patangsi lahei amar an apo David HEMPHU aphan kehodaitang arup, ser, kaprek amar Kardomhemthepi apuru alongsi bidamvet-lo.