Read Karbi 1 RECHO 8 Bible Online

1 RECHO 8 - Karbi bible

1 RECHO 8

¹Anke Israel akhei ajalin kedo-an aphan Solomon Recho la along Jerusalem kevangpet pen HEMPHU Kechejok Asinduk kepaponji aphan hangpet-lo. La Zaion, David Arongsopi pensi Kardomhemthepi anat pon nangji.

²Halatum throksi achiklo mate Ethanim achiklo Chepachong arong-aje ahut chingrumpet-lo.

³Kedo-an ajalin atum chetongpet ahut kurusar atum Kechejok Asinduk rung-lo,

⁴lapen la Kardomhemthepi anat ponlo. Levi lapen kurusar atum HEMPHU kedo A-pehem rungponlo lapen la ajohton kedo-an ta Kardomhemthepi anat pon et-lo.

⁵Solomon Recho lapen Israel arat kedo-an Kechejok Asinduk angno chingrumpet-lo lapen ongdung abiresak lapen achainong lakha un-epin an athok pilo.

⁶Anke kurusar atum Kechejok Asinduk Kardomhemthepi arlo ponsi Kangthirnei Adim la avengkong kedo api-heihei aber bat-lo.

⁷Halatum kejarham a-arveng-heihei Sinduk lapen kepon-i phangki akaibong aphan dipthip-lo.

⁸Keparphang phangki akaibong angchun ke baduta thek-longji jongsi Kangthirnei Adim angno arjapdamthor lote, bonta along kaprek pen ke baduta la thek-longle. (Nonputa keparphang phangki akaibong hadak dolang.)

⁹Ijip pen Israel arat kevang ahut HEMPHU pen rat atum Sinai Anglong along Kechejok Aloh kechetok ahut Moses kebi arlong plangni pen apar Kechejok Asinduk arlo thangnatta ave.

¹⁰Kurusar atum Kardomhemthepi ke-o ahut men men amat la inghun pen plengsetsi

¹¹HEMPHU adak atur turbong-lo, lapen halatum keklem nangji arpu cheklem dam thu thekthedet-lo.

¹²Ansi Solomon ardomlo: “Nang HEMPHU nangsi sining angsong arni bilo seta Nangsi inghun lapen kangting ajo kedoji chongvailo!”

¹³Non langmesen Nangphan Kardomhemthepi nangkimpilo. Nang kaike kedover adimlo.

¹⁴Rat atum hadak karjapver un ahut Solomon Recho halatum anat chetevarsi pangnolo, lapen halatum aphuthak Arnam ahirjume kedojisi hangpilo.

¹⁵La pulo, “Israel a-Arnam HEMPHU aphan chorolo! La nepo David aphan kechak ason papleng-lo, lapen halaso ahut la pulo,

¹⁶‘Nerat atum aphan Ijip adet pen vandet aphi seta Israel adet angbong rongsopi elongnat ta nephan Karcho adim Kardomhemthepi kepakimji aphan ingvaivedet-lo. Bonta Ne nangphan ingvailo, David nerat aphuthak kepangriji aphan.’ ”

¹⁷Solomon ningjebomlang, “Nepo David ta Israel a-Arnam HEMPHU kar-choji aphan Kardomhemthepi kekimji mang-lo,

¹⁸bonta la aphan HEMPHU pulo, ‘Nephan nang Kardomhemthepi kekimji nangningkehang lake mesenlo, bonseta

¹⁹nang la kaita kim papleng un-edetji. La nangsopo apok-et asosi Nephan Kardomhemthepi kimpo.’ ”

²⁰Lapen non HEMPHU amethang kechechak alam klemtang-lo. Nepo alar nesi Israel arecho cholo, lapen Israel a-Arnam HEMPHU aphan karchojisi ne Kardomhemthepi kimlo.

²¹Ephusar atum aphan HEMPHU Ijip adet pen kevan un ahut Kechejok Asinduk arlo arlong plangni kedo Akechejok Asinduk kebi adim ta Kardomhemthepi arlo adim sikpilo.

²²Anke rat angno Solomon damsi dovan athengno arjap damtherlo, hadak la ari chirungsi

²³Arnam ardomlo, “Israel Arnam HEMPHU, sining angsong mate pirthe athak nangsonthot Arnam avelo! Nang rat aphan kechechak alam nang chebilo lapen halatum nangphan aning aklong akekroi pen reng-lote Nang kanghon paklang-lo.

²⁴Nepo David aphan Nang kechak alam Nang klemlo, pini athetin Nang papleng-lo.

²⁵Non, Israel a-Arnam HEMPHU, Nang nepo aphan kechak akaprek asonta kepaplengji aphan nang choningri lo, halaso ahut Nang nepo aphan inut abang kaita Israel aputhak pangriverpo, jongsi halatum la kekroi asonthot Nephan kroipamera cherelote pusi Nang pulo.

²⁶Lasi non O Israel Arnam, Nangban, nepo David aphan kechak alam ahok paplangnang.”

²⁷Bonta, O Arnam, Nang ahokpet pen pirthe athak do thekjima? Nangphan sining seta kedo adim padorphlup un-e, lasi kopusonsi ne kekimtang laso a-Kardomhemthepi Nangphan padothekpoma?

²⁸Ne Arnam HEMPHU, ne inut Nangbanchot, ne kardom arjutha, lapen pini ne kechoningri ason dengtha.

²⁹Laso a-Kardomhemthepi ajo-nerlo ta langtha, la Nang kangvaitang nangphan karchoji adimlo.

³⁰Laso adim ne lapen nerat aso atum kardomji kehang ahut netum akardom arjutha. Sining angsong Nanghem pen arjutha lapen ne diyatha.

³¹Inut amonit aphan bang aphan kehingno akam keklem keboksi laso a-Kardomhemthepi adovan along vandet-lo lapen la adai ave pusi semetang-lote,

³²O, HEMPHU sining angsong pen arjutha Nangban atum la kelong nangji a-ot aduk palong Nang, lapen adai kave aphan pajoknon.

³³Nangrat atum hotur arideng pen ron kechedan remtang-lo pima halatum nangphan langplotsi pap klemlo, la apotsi latum Nangphan pangnora laso a-Kardomhemthepi along Nang pen chepabihek lote,

³⁴sining angsong pen halatum aphan arjutha. Nangrat apap an diyanon, lapen aphusar atum aphan nang kepi alongle along latum aphan vanthunon.

³⁵Nangrat atum pap keklem pen ajok Nang arve pajangjedet aphi halatum aning chiruisi laso a-Kardomhemthepi anat pangno pen chepabihek pen Nangphan ardomlote,

³⁶sining pen halatum aphan arjutha. Recho lapen Israel arat apap diya non. Ahok akam keme keklem thekjile thannon. Anke O HEMPHU, Nangrat aso atum aphan kaike pacheraitoi nang longle aputhak arve pajangnon.

³⁷Det adang akhim lapen avur nanglelote mate tomonthepi sok-heihei phangno lote mate pholong avur dolote, mate hotur atum Nangrat aphan tengkheng lote, keso ke-un-e halatum angbong dolote,

³⁸halatum akardom arjutha. Badutame Israel arat angbong aning keduk pen ari chirungsi labangso a-Kardomhemthepi anat ardom lote,

³⁹halatum akardom arjutha. Halatum akardom Nanghem sining pen arjutha, halatum aphan diya tha, lapen halatum aphan raptha. Nang inutnatsi monit aning kematha alam chinithekchot. Abangphutin kelongji a-ot ateng pen langcharinon.

⁴⁰Anke Nangrat aso atum nephusar aphan Nang kepi alongle along rengtik an halatum Nangphan kaiketa kroipamethekpo.

⁴¹Dak pen heloving kedo bang adet amonit Nangnong lapen

⁴²Nangrat aso aphan nang kethedung akam keklem alam arjulongra Nangphan karchoji lapen laso Kardomhemthepi along kardomji vang-lote,

⁴³la akardom arjutha. Nang kedo adim sining pen laphan no chedentha lapen Nangphan kechoningri alingle klempinon, anke pirthe adang kedo-an arat atum Nangphan chinipo lapen Nangrat Israel atum keklem ason Nangphan kroithekpo. Ansi ne kekim laso a-Kardomhemthepi ke Nangphan karcho adimlo pu halatum chinipo.

⁴⁴Hotur atum pen ron kechedanji aphan Nang hukum pilote halatum kedo adim laso Nang kangvaitang lapen Nangphan ne kekimpi a-Kardomhemthepi arongsopi anat pangnora ardomlote,

⁴⁵halatum akardom arjutha. Sining pen halatum aphan pahailongnon.

⁴⁶Nangrat aso atum Nangphan langplot pen pap klem lote, lapen pap keklemkle abang ave pin lote, Nangning kethi pen halatum aphuthak hotur atum Nang pahailongra bang kaprek adet atum ban papon-et-lo lapen halaso adim heloving seta,

⁴⁷Nangrat aso atum keningri-heihei ase arjutha. Jongsi halaso adet along halatum aning chirui dolote, lapen Nangphan ardomlote, lapen halatum ko-an apap kethe, kehingno, chekobir lote halatum akardom arjutha, HEMPHU.

⁴⁸Halabangso adet along ahokpet pen lapen aning aklong pen aning cheruira laso alongle Nang netum aphusar atum aphan kepi lapen Nang kangvaitang laso arongsopi lapen Nangphan ne nang kekimpi laso Kardomhemthepi anat pangno pen ardomlote,

⁴⁹halatum akardom-heihei arjutha. Sining angsong Nanghem pen halatum aphan arjutha lapen halatum aphan jingsotha.

⁵⁰Halatum Nangbe kethurkrap lapen apap anta diyadetnon, lapen hotur atum halatum aphan pangjinsotoi non.

⁵¹Halatum Nangmethang arat-lo, latum aphan Nang me akar ason a-Ijip adet pen Nang vanlo.

⁵²Ning kehang aling keklem un a-HEMPHU, Nangrat aso Israel atum lapen halatum arecho aphuthak kaiketa Nang kangjinso amek penle palangver nang, lapen halatum Nang pen kerap kechohang ahut halatum akardom arjutha.

⁵³Kadokave arat kedo-an angbong Nang halatum aphan nangmethang arat kepaplangjisi ingvailo, netum aphusar atum aphan Nang Ijip pen kevan ahut Moses Nangban pen ajok Nang halatum aphan laso alam pulo.”

⁵⁴HEMPHU aphan Solomon kardom pajutdet aphi, la akengphu kepatongsi ari angsong kechirung adim pen thursi dovan angno arjap-lo.

⁵⁵Ase pathedung pen la arat kechingrum aphuthak Arnam ahirjume hangpilo. La pulo,

⁵⁶“HEMPHU kechechak ateng rat aphuthak ningkangsam kepi apot chorolo. Aban Moses aphan ningkeme kechechak ason an la klemlo.

⁵⁷Ephusar atum along kedo asonthot etum Arnam HEMPHU etum along padonang; etum aphan pa-o-enang mate epavarvenang;

⁵⁸eli La aphan kekroithekjile epaplang lonang, la lote La aning kehang aling etum rengthekpo, lapen ephusar atum aphan kepi La aron-heihei lapen ahukum-heihei an kroithekpo.

⁵⁹Ne la kechoningri akardom-heihei e-Arnam HEMPHU aning arlo kaike apor seta padonang. Israel arat lapen halatum arecho akenang ateng Alangli kaita pajinsonang.

⁶⁰Anke pirthe adang det kedo-anta HEMPHU si Arnamchot pu chinipo- akaprek avelo.

⁶¹La arat atum, e-Arnam HEMPHU aphan kaita kroithip nangji, la aron lapen ahukum-heihei kedo-an pini keklem ason kroinon.”

⁶²Anke Solomon Recho lapen kedo-an arat atum HEMPHU athok ajir-heihei pilo.

⁶³La jon suri 22 achainong aphu, biresak jon suri 120, kejalang athok pilo. Recho lapen rat kedo-an Kardomhemthepi hodailo.

⁶⁴Halabangso arni amat la Kardomhemthepi athengno atikup adang pangthirlo, lapen hadak la arpum athok phrinlo, sok-sang athok-heihei, kejelang athok-heihei aphan pi athu-heihei thok-lo. La lason klemlo, pima tam adovan la hei athok aphan jangjedet-lo.

⁶⁵Hadak Kardomhemthepi along Solomon lapen Israel arat kedo-an chepachong arong-aje ni throksi an talonlo. Hadak Hamath atovar nirep anat lapen nitur anat Ijip ahoi an pen kevang armu ongdung khangjang.

⁶⁶Ni nerkep arni rat atum aphan Solomon hem toi-et-lo. La aphan halatum kedo-an rolo lapen aning arong pen hemchedamlo, pima la aban David lapen arat Israel atum aphan HEMPHU hirjume pitang-lo.