Read Karbi 1 RECHO 9 Bible Online

1 RECHO 9 - Karbi bible

1 RECHO 9

¹Solomon Recho Kardomhemthepi lapen Rechohem lapen la kekimji pu aning kehang an kim patang et aphi,

²HEMPHU alangliphan Gibeon along ason puthot cheklangthulo.

³La aphan HEMPHU pulo, “Nang kardom Ne arjulong-lo. Nephan karchover adim nang kekim laso a-Kardomhemthepi Ne pathirtang-lo. La aputhak Ne langpo lapen kaiketa raipo.

⁴Nangpo David keklem ason nang ahokpet lapen chingripet pen Nephan ingduk lote, lapen jongsi nang Ne Aron-heihei lapen Ne nangpaklemtoi ahukum-heihei kekroi pen klemlote,

⁵Israel aputhak nangso-nangsusi pangriverpo pu Ne nangpo David aphan kechak ateng klempo.

⁶Bonta nang lapen nangso-nangsu, Nephi phi dun-mo lote, lapen nang jongsi nangphan nangkepitang Aron-heihei lapen Ne hukum-heihei kroikrera kaprek arnam-heihei aphan archorong lote,

⁷halatum aphan kepi alongle along pen Nerat aso atum aphan Ne phlungjuipo. Nephan karchoji adim kepangthirtang laso a-Kardomhemthepi ta Ne obubji. Alongtin kedo arat atum Israel aphan hiringjopo lapen langrempo.

⁸Laso a-Kardomhemthepi ke isi kerutang angsom plangpo, lapen kedamput abang aling la thek-longsi thirikjokpo lapen manghupo, ‘Laso alongle lapen Kardomhemthepi aputhak HEMPHU kopisi la klemloma?’ halatum arjupo.”

⁹Rat atum thakpo, “Lake pima halatum aphusar atum aphan Ijip pen kevan a-Arnam HEMPHU aphan keche-o apot-lo. Halatum bang kaprek a-arnam aphan rimsi halatum aphan archo-rong apot-lo. La apotsi latum aphuthak HEMPHU laso akevir pavang-lo.”

¹⁰Kardomhemthepi lapen rechohem kekim Solomon aphan la ningkan 20 endet-lo.

¹¹Tair arecho Hiram la aphan kenangji an kedar athengpi lapen thengjangthu lapen laso akam aphan la kenangji an aser padorlo. La tangdet aphi Hiram aphan Galili ahavar rong 20 Solomon pilo.

¹²Halatum aphan Hiram langdamlo lapen halatum aphan la aning dokdedet-lo.

¹³La apotsi la Solomon aphan pulo, “Lahei heloma ik nang nephan nekepiji arong-heihei?” Laso apotsi alangli nonputa Kabul mate amovangve pusi hang-lo.

¹⁴Solomon aphan Hiram lin suri phli ansose aser pitang-lo.

¹⁵Kardomhemthepi lapen rechohem kekimji aphan lapen rongsopi nihang anat alongle kepaplengji lapen rongsopi apaisong kekimji aphan Solomon Recho jakong akam paklemtoilo. Lahei pen la Hazor, Megiddo, lapen Gezer arongsopi ta kim-ilo.

¹⁶(Ijip arecho Gezer arongsopi tengkheng-lo lapen la cheraidet-lo. La along kedo-an atum aphan pathisi rongsopi me keidut-lo. Aphi asopi Solomon aphan asopi penan kechopi ahut laso arongsopi dan pidet-lo.

¹⁷Lapen Solomon la kimthumilo.) Jakong akam pen Aber Beth Horon,

¹⁸Baalath, Judah akejejangtang ajo Tamar arongsopi-heihei Solomon kimthumilo,

¹⁹lapen la kecho amar kebi arongsopi-heihei la alosei lapen ronhemkonglong aphan rongsopi-heihei, lapen la aningkehang arongsopi an ke Jerusalem along, Lebanon along, lapen la adet along kaprek kaprek alongsi kekimji aning hang-lo.

²⁰Jakong akam aphan Israel atum longle kecherai ahut kepathithe Kanaan arat aso-asu atum aphansi Solomon chotoilo.

²¹Lahei angbong Amor aso, Hitti aso, Perizi aso, Hivi aso, lapen Jebusi aso-asu atum non anta ban kemanbom atum an la parlo ponlo.

²²Israel aso aphan ke Solomon ban en-edet-lo; latum ron-aso, chakri, ron ahemphu, ronhemkonglong ahemphu lapen losei kardon amonit atum plangsi ingduk nang-lo.

²³Kadokave bang 550 jakong akam Solomon hem kekim kemang akam-heihei kelang ahemphu dolo.

²⁴Apiso Ijip arecho asopi, David Arongsopi pen Solomon bangpi aphan kekimpi arechohem an kedam aphi Solomon rongsopi anihang anat longle papleng-lo.

²⁵Ningkan isi angbong batai kethom Solomon kephrin athok -heihei lapen kejelang athok-heihei HEMPHU aphan la kekimpi adovan athak la thok-lo. Lasonsi la Kardomhemthepi kekim patang-lo.

²⁶Solomon Recho, Eziongeber arong telongpi-heihei ta kimlo, la Edom adet Akaba atalo chekom akung Elath adung-lo.

²⁷Solomon Recho amonit aphan kerapjisi kethektang talo amonit atum aphan amethang telongpi keselam adim pen Hiram Recho amonit toilo.

²⁸Ophir adet an halatum vek-lo, lapen Solomon aphan lin suri 14 an sose aser vanpilo.