Read Karbi 2 RECHO 1 Bible Online

2 RECHO 1 - Karbi bible

2 RECHO 1

¹Israel arecho Ahab thilot aphi Moab aso atum Israel abe thurkrap-lo.

²Israel arecho Ahaziah, Samaria along amethang rechohem asarnung angsong pen nangchingthulo lapen areng jasemet sodak-lo. Lasi la ajehak apherangke atum aphan Baalzebub, la Philistia arongsopi Ekron a-arnam aphan karjujisi toilo, la mejima memema karjuji aphan lo.

³Bonta HEMPHU apherangke Tishbe amontri Elijah aphan hukumpilo, Ahaziah Recho apherangke atum aphan pachetong damtoi lapen parjutoilo, “Kopisi nangtum Ekron a-arnam Baalzebub aphan karju damlo? Pine Israel adet Arnam avelo putong nangtum kemathama?

⁴Recho aphan thannon HEMPHU lasonsi pulo, ‘Nang keso pen memelo; nang thipinpo!’” HEMPHU hukum kepi atengsi Elijah klemlo,

⁵lapen pherangke atum recho along chevoijuilo. “Nangtum kopisi nangchevoijui loma?” la arjulo.

⁶Halatum thak-lo, “Nelitum inut amonit chetong-lo lasi nelitum aphan pachevoitoilo lapen nangliphan HEMPHU kepu alam paputoilo, ‘Nangtum kopisi Ekron a-arnam Baalzebub aphan karjura pherangke atum aphan ketoi-loma. Pine nangtum Israel adet Arnam avelo putong nangtum kemathama? Nangli keso pen memelo; lapen thipinpo!’”

⁷Laso amonit kelang kopusonlo? Recho arjulo.

⁸La pi areng pen keselam apesi kechingthang, lapen ok-reng avamkok pen cheperhet, pusi halatum thak-lo. La Elijahlo! recho puserlo.

⁹Anke la inut achakri along bang 50 amonit toidunsi Elijah aphan pahang damlo. Inglong athak kangnilun laphan chakri abang thek-longsi laphan pulo, “Arnam Amonit, arum nangkesunji aphan recho nangphan hukum nangpilo.”

¹⁰Ne jongsi Arnam Amonit pulote, Elijah thak-lo, “Sining pen me pavang-ra nang lapen nang monit atum an pathi-etnang!” Menmen amat me vangsi chakri lapen la amonit atum aphan pathi-et-lo.

¹¹Recho puthot anut kaprek achakri along bang 50 amonit toithulo, latum angsong arludamsi Elijah aphan pulo, “Arnam Amonit, recho kepu non amat nangsunnon pusi nangphan hukum pilo!”

¹²Ne Jongsi Arnam Amonit, pulote; Elijah thak-lo, “Sining angsong pen me pavang-ra nang lapen nang monit atum an pathi-etnang!” Menmen amat Arnam ame vangsi chakri lapen la amonit atum an aphan pathi-et-lo.

¹³Puthot inut achakri lapen bang 50 amonit Recho toithulo. La inglong angsong arlu damlo, Elijah angno akengphu patongruisi choningrilo, “Arnam Amonit, neli lapen nelimonit atum aphan ingjingsotha. Nelitum achethe nepajoktha!

¹⁴Banghini achakri atum lapen halatum amonit atum aphan sining ame pen thi-et-lo; bonta kanghon pen neliphan ingjinsotha!”

¹⁵HEMPHU apherangke Elijah aphan pulo, “La along dunnon, lapen phereri, “ Lasi chakri along Elijah recho anat dunlo,

¹⁶lapen laphan pulo, “HEMPHU, lasonsi pulo, pima Ekron a-arnam Baalzebub aphan nang karjujisi pherangke atum aphan ketoi apot lapen Israel adet karjuji aphan Arnam avedet ason paplang apot nang keso memelo; thipinpo!”

¹⁷Elijah pen HEMPHU kepu asonthotsi Ahaziah thilot-lo. Ahaziah asopo ave, lasi la akorte Joramsi la alar recho cholo. Judah arecho Jehoshaphat asopo Jehoram recho kecho hini aningkan ahut.

¹⁸Ahaziah Recho keklem asontin akam an Israel a-Recho atum Aphurkimo alongsi tok-et-lo.