Read Karbi 2 RECHO 10 Bible Online

2 RECHO 10 - Karbi bible

2 RECHO 10

¹Samaria arongsopi along Ahab Recho aso-asu bang 70 do. Jehu loh toksi rongsopi pangribang aphan sanchom asor ajalin lapen Ahab aso-asu ahemphu atum aphan la loh pilo. Loh lasonsi tok-lo:

²Nanglitum recho aso-asu ahemphulo lapen nanglilong losei, ronhemkonglong, risim-heihei, lapen pairaikom arongsopi cheparideng-lo. Lasi laso aloh long-lok pen,

³nanglitum recho kebatjile recho aso-asu angbong apun abangphan ingvainon lapen laphan keraijile chedandun non.

⁴Samaria pangribang atum kephere thirikjok-lo, “Kopusonsi eli Jehu aphan khamkhedunpoma,” halatum chepulo, “Joram Recho lapen Ahaziah Recho amatta khang un-etang-lo?”

⁵Lasi rechohem ahemphu lapen rongsopi ahemphu sanchom asor ajalin lapen osomar kelang ahemphu atum pen pen chepangrumpetsi Jehu aphan laso abirta lolo; “Nelitum nanglibanlo, lapen nanglining kehang akam nangketoi alingsi klempo. Bonta badu aphan nelitum recho batbelo; nanglining kematha akeme alingle klem iknon.”

⁶Halatum aphan Jehu akaprek aloh tokthulo; “Nanglitum jongsi nelinat lapen neli hukum-heihei keklemji chesik-lo pulote, Ahab Recho aso-asu aphu kedo-an nelilong Jezreel penap laso apor van nangji.” Ahab Recho aso-asu bang 70 inut Samaria asanchom asor ajalin aridengsi lapen alanglisi lanalo.

⁷Jehu aloh longdet aphi, Samaria ajalin atum Ahab aso-asu kedo-an bang 70 pathi-et-lo, lapen aphu-heihei khangra arlo thap-lo lapen Jehu along Jezreel halahei lophlot-lo.

⁸Ahab aso-asu atum aphu-heihei Jezreel along van-et-lo pu Jehu aphan than pachinilo, lapen la puthot adap an rongsopi anghap adung pabuini angsom hadak kepipji aphan la halatum aphan hukumpilo.

⁹Adapprang la inghap anat damlo, lapen hadak kedo arat atum aphan la pulo, “Neli helo Joram Recho abe thursi laphan pathilo; laso apot nanglitum thang adai ave. Bonta komatsi lahei pathi-et-lo?

¹⁰Lapen ajok chini iknon HEMPHU kepu Ahab aso-asu alam ahok chekoktang-lo. Elijah montri pen ajok HEMPHU aseme ateng cheklemtang-lo.”

¹¹Anke Jezreel along kedo Ahab adon arap atum aphanta Jehu pathi-et-lo, lapen la achakri atum kechini ajirpo lapen akurusar atum an aphanta pathi-et-lo; inutbak aphanta pareng-longledet-lo.

¹²Jehu Samaria anat kedamjisi Jezreel olo. Tovar ebeng “biresak kevi Amukam” pu adim,

¹³Judah kethitang arecho Ahaziah ajehak adon arap atum aphan la chetong-lo, lapen halatum aphan arjulo, “Nanglitum komat-lo?” Ahaziah adon-arap-lo, pusi halatum thak-lo, “Nelitum ha Jezreel anatsi kedamji Jezebel rechopi asomar lapen ahin kedo-an recho ahemtun aphan kelangdamji.”

¹⁴Amonit atum aphan Jehu hukumpilo, “Latum aphan akereng nepnon!” Latum halatum aphan phlung-lo, lapen hadak isi ahilik adung halatum aphan pathi-et-lo. Kadokave bang 42 an do lapen inutbak aphanta akereng bibedet-lo.

¹⁵Jehu puthot barthulo, lapen tovar along Rechab asopo Jonadab pen la chetong-lo. Laphan Jehu kardompisi Jehu pulo, “Nang pen ne isivet tahai! Nang nelong nangdunjima?” Nangdunji, Jonadab thak-lo. Tangte eri che-ot lonang, Jehu thak-lo. Halatum pupu ari che-otthip-lo lapen laphan Jehu aronhemkonglong athak parlulo,

¹⁶lapen pulo, “Nelong nangdunnon, lapen ne ko-an HEMPHU aphan kekroithip loma nangmek hini pen thek-longpo.” Anke latum Samaria anat banghini damrappet-lo.

¹⁷Latum hadak lesi Ahab adon-arap kedo-an aphan Jehu pathilap-lo, inutbak aphanta akereng bibedet-lo, lasonsi plangpo pu Elijah pen ajok HEMPHU pulo.

¹⁸Samaria arat kedo-an aphan Jehu hangpet-lo, lapen pulo, “Ahab Recho Baal arnam aphan asap-o si ingdukchot-lo, bonta neli ke un ansi archoji.

¹⁹Baal amontri kedo-an lapen laphan karcho an atum aphan lapen la akurusar kedo-an aphan hangpetnon. Baduta chepajok longle; neli Baal aphan isi thedung athok karkliji lapen nangkedunde atum an aphan ke pathilap-po.” (Lake Jehu ahin pen isi Baal karcho atum an aphan kepathilongji aphan kechongthuilo.)

²⁰Anke Jehu hukumpilo, “Baal aphan man kepijile karcho arni pachethangnon!” Pachethang akam tang-lo,

²¹lapen det adang an Jehu lamthe pachethang-lo. Baal aphan karcho atum an vangpet-lo. Halatum kedo-an ta Baal kardomhem arlo dampet-lo, kecheng ahin pen kejut ahin anta plengchenlo.

²²Anke karcho atum aphan pe-ri keron ahemphu kurusar aphan Jehu hukum pilo.

²³Laso aphi Jehu amethang ta kardomhem arlo Rechab asopo Jonadab pen lutdamlo, lapen hadak kedo arat atum an aphan pulo, “Baal aphan karchoji atumsi vangchot-lo pu chinipame nangji lapen HEMPHU aphan karcho atum vangvedet nangji.”

²⁴Anke la lapen Jonadab Baal aphan athok kepijisi damlo, la bang 80 amonit atum aphan kardomhem ingtan padotoilo lapen halatum aphan pinkhat-lo: “Latum angbong inutbakta pakat longpopte la apran chepi nangji!”

²⁵Jehu athok pajirdet aphi la tonbang lapen achakri atum aphan pulo, “Arlo damra halatum kedo-an aphan pathidamnon; inutbakta pakat longri!” Halatum kesantang anokjir pen damsi kedo-an aphan pathilo, lapen abang arpum an ingtan chethur pon-et-lo. Anke halatum arlo kangthir adim damlo,

²⁶hadak kedo kangthir anujok ingtan vandet-lo lapen la me thordut-lo.

²⁷Lasonsi latum kangthir anujok lapen kardomhem pavirlo, lapen kardomhem barpi kedo adim pinchongdet-lo, la non puta dolang.

²⁸Lasonsi Israel adet Baal aphan karcho Jehu pavirlo.

²⁹Bonta la Jeroboam Recho apap charlidunlo, atheke la Bethel lapen Dan along keparjap ser achainong aloso akumlin aphan archosi Israel aso aphan pap anat japonlo.

³⁰Jehu aphan HEMPHU pulo, “Ahab aso-asu aphan nening kehang ateng nang klemlo. Lasi Ne nangphan chak-lo, nangso-nangsu atum ove phli an Israel arecho plangpo.”

³¹Bonta Jehu aning aklong et pen Israel Arnam HEMPHU aron kroikrelo; la kalilesi Israel aphan pap anat kejapon abang Jeroboam arjansi endunrong-lo.

³²Israel adet adang HEMPHU kepabi ahut, Siria arecho Hazael Israel alongri kedo-an cheraidet-lo,

³³Jordan anihang pen, nitur Aroer arong ha Arnon Aroi an, laso arlo Gilead lapen Bashan alongri hadak Gad, Reuben lapen nihang a-Manasseh akhei atum dolo.

³⁴Jehu keklem akam lapen la angthin kethe akam-heihei Israel Arecho atum Aphurkimo along tok-et-lo.

³⁵La thisi Samaria along pip-lo, lapen la asopo Jehoahaz la alar recho cholo.

³⁶Jehu Samaria along ningkan 28 Israel arecho plangsi pangrilo.