Read Karbi 2 RECHO 11 Bible Online

2 RECHO 11 - Karbi bible

2 RECHO 11

¹Ahaziah Recho apei Athaliah asopi apran karmut alam arjulongsi, recho ahemtun abangphu kedo-an aphan bangpi kepathiji hukumpilo.

²Ahaziah asopo Joash inutvetsi jok-longchot-lo. Akaprek atum along lata thidunlotjong-lo, bonta la ani Jehoram Recho asopi lapen Ahaziah angjir aron Jehosheba si laphan raidet-lo. Bangpi lapen a-obok laphan ponsi Kardomhemthepi mekkejang angdeng arlo ponlo lapen laphan Athaliah arideng pen patujoilo, lalote laphan pathilongledetpo.

³Oso aphan Jehosheba ningkan throk lanalo lapen Athaliah Rechopi kepangri ahut laphan Kardomhemthepi arlosi patujoilo.

⁴Bonta throksi aningkan Jehoiada Kurusar recho angphun kerai atum an ahemphu lapen rechohem tonbang ahemphu aphan hang-lo lapen halatum aphan Kardomhemthepi along pavangtoisi hadak la halatum aphan la kemang akam aputhak pachedonsar jisi semepatang-lo. Halatum aphan la Ahaziah Recho asopo Joash paklang-lo,

⁵lapen aber ahukum-heihei halatum aphan pilo: “Nangtum kesang arni kehonji kevang ahut phanthom pen ephan rechohem hon nangji;

⁶akaprek ephan atum ke Sur Anglong along honding nangji lapen kaprek ephan atum ke inghap along kedo akaprek kehon atum anung honding nangji.

⁷Kesang arni kesanglong akam kave pasongni atum ke kardomhem along hondingsi recho aphan rai nangji.

⁸Nanglitum Joash Recho aphan nokjir otdongsi hon nangji lapen la kedam aling dunkri nangji. Nangtum adung kevang aling abangphan pathilot nangpo.”

⁹Jehoiada kepinkhat alam chakri atum kroilo lapen halatum amonit kesang arni kesanglong atum lapen kehon atum la along vangpet-lo.

¹⁰Kardomhemthepi along kebitang David Recho achir lapen achong la chakri atum aphan pilo,

¹¹lapen recho aphan keraijisi nokjir ke-ot amonit atum Kardomhemthepi athengno patonthip-lo.

¹²Anke Joash aphan Jehoiada ingtan japonsi la aphu athak recho aphutup kup-lo lapen laphan epak recho kecho aron-heihei aloh pilo. Anke Jehoiada jangthu patipsi recho kebat pachethang-lo. Rat atum halatum ari chardepsi hang-lo, “Recho achethe padingnang!”

¹³Kehon atum lapen rat atum kehangjo arki Athaliah Rechopi arjulongsi bangpi Kardomhemthepi along armu kechingprom anat damlo.

¹⁴Jutang ateng recho kemi Kardomhemthepi athengno anujok adung karjapding bangpi thek-long-lo. Laphan chakri atum lapen pong-ut kebut atum kompet-lo lapen rat atum aning cheparongsi pong-ut but-lo lapen hangjolo. Aning chepa-oisi Athaliah amethang ape chingsek-lo, lapen hangserlo, “Pachobei! Pachobei!”

¹⁵Kardomhemthepi angkang arlo Athaliah aphan kepathiji Jehoiada aninghanghe, lasi ron-armu achakri aphan la hukumpilo, “Kehon atum renni angbong bangpi aphan ingtan pondetnon lapen bangpi aphan keraiji kebor-i abangphan badutame pathilotnon.”

¹⁶Halatum bangpi aphan phlungsi ha rechohem anat pondet-lo, lapen hadak Losei Anghap along halatum bangpi aphan pathilot-lo.

¹⁷Jehoiada kurusar Joash aphan recho bat-lo lapen rat atum HEMPHU pen HEMPHU arat aso plangpo pu aloh chejok-lo; lapen la kechejok aloh pathik-lo.

¹⁸Anke rat atum Baal kardom ahem damsi la ingsek dam-et-lo: halatum dovan-heihei lapen kumlin-heihei pangje-ilo, lapen Baal akurusar Mattan, dovan athengno pathilot-lo. Jehoiada Kardomhemthepi along kaita pahonver,

¹⁹lapen la, chakri atum recho angphun kerai atum, lapen rechohem kehon atum pen pen recho aphan Kardomhemthepi pen rechohem anat thondunlo, lapen aphi aphi rat atum dunlo. Joash Tonbang Anghap pen lut damlo, lapen amethang recho anghoi chongnilo.

²⁰Kedo-an arat atum aning arong pensi plengset-lo, lapen rongsopi ingsamjinlo, athema Athaliah aphan rechohem along pathitang-lo.

²¹Ningkan throksi arta ahut Joash Judah arecho plang-lo.