Read Karbi 2 RECHO 12 Bible Online

2 RECHO 12 - Karbi bible

2 RECHO 12

¹Israel recho Jehu recho kecho throksi aningkan ahut, Joash Judah arecho plang-lo lapen la Jerusalem along ningkan 40 pangrilo. La apei Zibiah, Beersheba arongsopi asor.

²La akai arjon kopisi HEMPHU aphan aning padok-loma la klemlo, pima Jehoiada kurusar si laphan pinkhat-lo.

³Tebonseta karchopangtar adim-heihei pavirvelang, lapen halahei along rat atum athok ajir pibomsi methek thorbomlang.

⁴Kurusar aphan Joash hangsi Kardomhemthepi along kaike athok lapen ninghang adan-heihei kepi atangka halatum aphan hukum pisi pabirtitoilo.

⁵Abangphutin akurusar atum la kangduk abangphu kevan atangka arpu ensi laso atangka akenang ahut Kardomhemthepi keselam aphan rim nang-lo.

⁶Bonta Joash Recho kecho ningkan 23 anta kurusar atum Kardomhemthepi selamlelang.

⁷Lasi Jehoiada lapen akaprek akurusar atum aphan hangsi halatum aphan arjulo, “Nanglitum kopi athesi Kardomhemthepi selam-ledet-loma? Non pen apar nanglitum kedeng atangka nanglitum bi longlelo; la nanglitum hodai nangpo, lalote selam longpo.”

⁸Laso alam along kurusar atum chedondunlo lapen Kardomhemthepi selamlelo pu halatum chedondunlo.

⁹Anke Jehoiada isi Asinduk ponlo, adip athak angkok bilo, lapen la dovan adung Kardomhemthepi kelut ar-e anat bilo. Karcho atum kepi atangka an kelut along kedo akurusar atum sinduk arlo thap-etpo.

¹⁰Sinduk arlo tangka ongdung lote recho achunbang lapen kurusar kethe vangsi rup kedo-an pangjirpo lapen la linpo .

¹¹Aphai tokdet aphi halatum Kardomhemthepi akam keklem abangphu aphan rup hodaipo, lapen ajok thengpi akam keklem lapen kekim abangphu atum aphan

¹²arlong kepangni lapen arlong kehong, thengpi kenam, arlongso lapen akaprek kaprek kenangsot aphan an pilo.

¹³Rup aharlung-heihei mate melur kangtip-i ajohton, mate akaprek rup, ser ajohton-heihei aphan laso atangka en-edet-lo.

¹⁴La kedo-an kam keklem atum aphan lapen keselam along kenangsot ason amung kenangji aphansi enchot-lo.

¹⁵Kam keklem ahemphu abang angthikpet pensi kepi apot halahei aphai hangjokphlot-lo.

¹⁶Kechetu adan-heihei lapen pap adan-heihei ke sinduk arlo jokje det-lo; la kurusar atum apharmanlo.

¹⁷Siria arecho Hazael Gath arongsopi tengkhengsi la kecherai ahut; la Jerusalem ketengkhengji aphan mathalo.

¹⁸Judah arecho Joash kedo-an la aphusar Jehoshaphat, Jehoram lapen Ahaziah atum lapen lahei along amethang kepidun HEMPHU aphan kehodai adan-heihei lapen Kardomhemthepi lapen rechohem khi-puru along kedo aser an lahei Hazael Recho aphan isi adan pisi la aron-armu Jerusalem pen pachevoilo.

¹⁹Joash Recho keklem akam an Judah Arecho atum Aphurkimo along tok-et-lo.

²⁰Joash Recho achakri atum la abethurlo, kepathiji mang-lo, lapen halatum banghini Shimeath asopo Jozakar lapen Shomer asopo Jehozabad atum laphan Silla kehirdam atovar Jerusalem anihang anat kepapleng alongle along kekim ahem along pathilot-lo.

²¹Joash aphan David Arongsopi recho athiri alongsi pip-lo, lapen la alar asopo Amaziah si recho cholo.