Read Karbi 2 RECHO 13 Bible Online

2 RECHO 13 - Karbi bible

2 RECHO 13

¹Judah arecho, Ahaziah asopo Joash recho kecho 23 aningkan ahut Jehu asopo Jehoahazsi Israel arecho plang-lo, lapen la Samaria arong ningkan 17 pangrilo.

²La aphrang Jeroboam Recho ason la HEMPHU aphan langplotsi pap klemlo, lapen Israel aphan pap keklem anat japonlo; la akehingno atovar che-o-epinlo.

³Lasi Israel aphuthak HEMPHU aningthilo, lasi la Siria arecho Hazael lapen la asopo Benhadad arideng Israel atum aphong aphongta remnang-lo.

⁴Ansi Jehoahaz HEMPHU aphan ardomlo, lapen Siria arecho Israel arat aphuthak kechenek-ot thek-longsi HEMPHU la akardom thak-lo.

⁵Siria arideng pen kejokji aphan HEMPHU inut keja abang nangtoilo, lapen aphrang ateng Israel atum ingsamjin pen dolong-lo.

⁶Bonta latum Jeroboam Recho Israel aphan keja apap che-o-elang, bonta lahei un-an klemthurong-lo ; lapen arnampi Asherah akumlin Samaria along doverlo.

⁷Jehoahaz aron-asong ave-o khang-jang. Bang 50 losei kardon atum, ronhemkonglong hum kep lapen akeng pen kedam atum bang suri kep vet helo, pima Siria arechosi la ahin an halatum aphan longle aduk kepatekung asonsi pavir-et-lo.

⁸Jehoahaz keklem asontin akam la kedam angthin kethe akam-heihei Israel Arecho atum Aphurkimo along tok-et-lo.

⁹La thisi Samaria along pip-lo, lapen la alar asopo Jehoash si recho cholo.

¹⁰Judah arecho Joash recho kecho 37 aningkan, Jehoahaz asopo Jehoash Israel arecho plang-lo, lapen la Samaria along ningkan 16 pangrilo.

¹¹La ta HEMPHU aphan langplotsi pap klemlo lapen Israel atum aphan pap anat kejapon abang Israel Jeroboam akehingno arjansi charlidunlo.

¹²Jehoash keklem, la Judah Arecho Amaziah pen ron kechedan angthinkethe akam an Israel Arecho Aphurkimo along tok-et-lo.

¹³Jehoash thisi recho athiri Samaria along pip-lo, lapen la asopo Jeroboam-II si la alar recho cholo.

¹⁴Elisha montri padu akeso pen sodet-lo, lapen la kethipo pu ahut Israel arecho Jehoash la along vurdamlo, “O po, O nepo!” hangsi la chirulo. “Nang Israel aphan keraiver abang-lo!”

¹⁵Thai isi lapen ajehak aso ennon, pusi laphan Elisha hukum pilo. Jehoash halahei enlo,

¹⁶la pen laphan ke-apjile chesiknon pusi Elisha pulo. Recho abang la klemlo, lapen Elisha ari recho ari athak bat-lo.

¹⁷Anke montri kepinkhat alam ateng recho abang Siria anat kepangno anghapso ingpulo, “Thai aso ap-non!” Elisha hukumpilo, Recho thai aso apdet aphi montri abang hang-lo, “la pen ajok la Siria aphuthak haidetpo. Aphek along Siria aphan paremretik nangli chedanpo.”

¹⁸Anke recho aphan Elisha akaprek athai aso pa-entoilo, lapen halahei pen longle athak pa-ap toilo. Recho abang longle athak batai kethom ap-lo, lapen ingtonkok-lo.

¹⁹La Elisha aphan aning pathilo, lapen la recho aphan pulo, “Nangli batai pho, throk ap nangji apot-lo, anke nangli Siria aphuthak haiverji apot-lo; bonta non nangli halatum aphan batai kethom anbaksi paremchotpo.”

²⁰Elisha thilot-lo, lapen pipbup-lo. Aningkan-vangta Moab akanghu atum Israel adet tengkhengbom.

²¹Ephong, monit kethi ahut inut amonit aphan kepipji pura halatum angbong kanghu atum aphan thek-lok amat kethi arpum Elisha athiri arlo vartekang chorlo, lapen kat-et-lo . Laso kethi arpum Elisha arrepi-heihei kepho dam pen amat cherengthu-aksi arjap-lunlo.

²²Siria arecho Hazael abong, Jehoahaz recho kecho esek Israel atum aphan chenekpik-lo,

²³bonta halatum aphan HEMPHU jinsopik-lo. La halatum aphan pavirlong-toitedet-lo, bonta halatum aphan rap-lo, pima la Abraham, Isaak, lapen Jakob pen kechejok aloh kechechak apot. La arat aso atum aphan tengnenedet-lo.

²⁴Siria arecho Hazael kethi ahut la asopo Benhadadsi recho plang-lo.

²⁵Anke Israel arecho Jehoash, Benhadad batai kethom paremlo lapen apo Jehoahaz arni Benhadad kecherai arongsopi an che-enthulo.