Read Karbi 2 RECHO 14 Bible Online

2 RECHO 14 - Karbi bible

2 RECHO 14

¹Israel arecho Jehoahaz asopo Jehoash recho kecho hini aningkan ahut, Joash asopo Amaziah Judah arecho plang-lo,

²ningkan 25 arta ahut, lapen la Jerusalem along ningkan 29 pangrilo. Apei Jehoaddin, Jerusalem pen.

³La HEMPHU aphan aning kepangsam akam an klemlo, bonta la aphusar David Recho ason kali; la kalilesi apo Joash kopisi keklemma la klemlo.

⁴La karchotap adim-heihei parure, lapen monit atum halahei along athok ajir pibomlo lapen mephik thorbomlo.

⁵Amaziah ajakong chepathesi la apo Recho aphan kepathi abangphu atum aphan pathilot-lo.

⁶Bonta, halatum asomar atum aphan la pathithe lapen Moses Aron aloh ahukum atengsi klemlo: “Asomar keklem apap apot api apo aphan pathi nangnelo lapen api apo apap apot asomar atum aphan pathi nangnelo! Inut amonit amethang keklem kepathi apap apotsi la thinangji.”

⁷Ingti Arlok along Amaziah bang surikep Edom aron-aso atum aphan pathilo, la ron chedansi Sela arongsopi cheraisi laphan Joktheel amen irlo, la nonputa dolang.

⁸Anke Israel arecho Jehoash aphan Amaziah apherangke atum chetoilo, hala pen kechedanji aphan.

⁹Bonta Jehoash Recho lasonsi thak-lo: “Ephong Lebanon Anglong kedo bapsudo kedar athengpi aphan isi abirta pilo; ‘nesopo aphan nangsopi penan nangchopinon.’ Marat api hapu anat damsi bapsudo aphan dong-ilo.

¹⁰Amaziah non nang Edom aso aphan paremlongdet apotsi nangning kechepindak pen plengset-lo. Nang non kelongtang an pen nangning chepangsam non lapen hem dojoinon. Kopisi nang lapen nangrat aphuthak kevirji aphan kesung chonghongbom langma?”

¹¹Bonta Amaziah karjujimolo, lasi Jehoash Recho la pen ron kechedanjisi amethang amonit pen pen barlo ha Beth Shemesh, pu Judah along.

¹²Amaziah aron-armu remdet-lo, lapen la aron-aso kedo-anta halatum ahem anat chekat-et-lo.

¹³Amaziah aphan Jehoash bengchek-lo, Jerusalem anat damsi Ephraim Anghap pen atok Anghap an rongsopi apaisong parulo, la ajak-keding ingrup 400 an dolo kephri.

¹⁴La kedo-an aser, arup kelong an, Kardomhemthepi amar kedo-an, recho akhipuru along kedo-an lahei Samaria pon-et-lo. La ban nepponlo.

¹⁵Jehoash keklem asontin akam lapen la Judah arecho Amaziah pen ron kechedan angthinkethe alam anta Israel Arecho Aphurkimo along tok-et-lo.

¹⁶Jehoash thilot-lo lapen recho athiri Samaria along pipbup-lo, lapen la asopo Jeroboam II si la alar recho cholo.

¹⁷Israel arecho Jehoash thilot aphi Judah arecho Amaziah ningkan krepho an renglang,

¹⁸Amaziah keklem akam an Judah Arecho aphurkimo aloh along tok-et-lo.

¹⁹Amaziah aphan kepathiji aphan Jerusalem along abethurlo, lasi la Lakish arongsopi anat kat-lo, bonta la ahotur laphan hungdunsi laphan pathilot-lo.

²⁰La abang arpum ejon alosei athak arthangsi Jerusalem vandet-lo, lapen recho athiri David Arongsopi along pip-lo.

²¹Ansi Judah arat atum la ningkan krethrok arta asopo Uzziah aphan recho bat-lo.

²²Apo thidet aphi Uzziah puthot Elath cheraithusi kimthulo.

²³Judah arecho Joash asopo Amaziah recho kecho krepho aningkan ahutsi Jehoash asopo Jeroboam-II Israel arecho plang-lo, lapen la Samaria along ningkan 41 pangrilo.

²⁴La HEMPHU aphan langplotsi pap klemlo, la aphusar Nebat asopo Israel aphan pap anat kejapon abang Jeroboam Recho kehingno arjansi endunlo.

²⁵La Israel alongri an che-enthulo, Hamath atovar nirep anat pen Talo Kethi anat anitur an. Bangso alam Gath Hepher pen Amittai asopo Jonah montri pen ajok Israel a-Arnam HEMPHU kepu alam pachekok-lo.

²⁶Israel arat aso atum kesungpik kechechaknang HEMPHU thek-long-lo; baduta halatum aphan kerapdunji abang avedet-lo.

²⁷Bonta Israel kaike aphan pavirdetji la HEMPHU aninghanghe, la apotsi latum aphan alangli Jeroboam-II pen ajok latum aphan pajok-lo.

²⁸Jeroboam-II keklem akam an lapen la angthinkethe aron-heihei kechedan lapen la kopusonsi Damaskas lapen Hamath Israel adet parlo thuloma lahei kedo-an Israel arecho Aphurkimo along tok-et-lo.

²⁹Jeroboam II thilot-lo lapen recho athiri alongsi pip-lo, lapen la asopo Jekaariah la alar recho cholo.