Read Karbi 2 RECHO 15 Bible Online

2 RECHO 15 - Karbi bible

2 RECHO 15

¹Israel arecho Jeroboam II recho kecho 27 aningkan ahut, Amaziah asopo Uzziah arta ningkan krethrok ahut Judah arecho plang-lo,

²lapen la Jerusalem along ningkan 52 pangrilo. La apei Jekoliah, Jerusalem pen.

³Apo arjan ensi kopima HEMPHU aningkedok ason la klemlo.

⁴Bonta karchotap adim-heihei pavirvelang, lapen hadak rat atum athok ajir lapen mephik thordambom-lang.

⁵Uzziah areng si-i akeso pabonsi la akai arjon anta dolo. La amethang ahem chedolo, kedo-an akam pen asopo Jotham det kepangri ahut sang-lo.

⁶Uzziah keklem akam asontin Judah Arecho Aphurkimo along tok-et-lo.

⁷Uzziah thilot-lo, lapen recho athiri David Arongsopi alongsi pip-lo, lapen la asopo Jothamsi la alar recho cholo.

⁸Judah arecho Uzziah recho kecho 38 aningkan ahut Jeroboam-II asopo Jekaariah Israel arecho plang-lo, lapen la Samaria along chiklo jonthrok pangrilo.

⁹La ta la aphusar atum ason HEMPHU aphan langplotsi pap klemlo. La ta Israel aso aphan pap anat keja abang Nebat asopo Jeroboam Recho akehingno arjansi endunlo.

¹⁰Jabesh asopo Shallum la abe thursi Jekaariah Recho aphan Ibleam along pathilot-lo lapen la alar recho cholo.

¹¹Jekaariah keklem asontin ta Israel Arecho Aphurkimo along tok-et-lo.

¹²Lasi Jehu Recho aphan HEMPHU kepachini alam chekok-lo: “Nangso nangsu atum ove phli an Israel arecho chopo.”

¹³Judah arecho Uzziah Recho kecho 39 aningkan ahut Jabesh asopo Shallum Israel arecho plang-lo lapen la Samaria along chiklo ejon pangrilo.

¹⁴Gadi asopo Menahem tirzah pen Samaria damlo, lapen Shallum aphan pathilotsi la alar recho cholo.

¹⁵Shallum keklem asontin la kechorung akam anta Israel Arecho Aphurkimo along tok-et-lo.

¹⁶Menahem Tirzah kecherai ahut Tappuah arongsopi asor laphan chehodai-dedet amat la rongsopi amonit pen pen adung arei alongri anta pavirlap-lo. Aso anghor kedo a-arloso atum aphanta apok siridaksi pathilo.

¹⁷Judah arecho Uzziah Recho kecho 39 aningkan ahut Gadi asopo Menahem Israel arecho plang-lo, lapen la Samaria along ningkan 10 pangrilo.

¹⁸La ta HEMPHU aphan langplotsi paklemlo lapen ha kethi anta Israel aphan thipin an pap kejapon abang Jeroboam Recho kehingno arjansi endunlo.

¹⁹Tiglath Pileser, Assiria arechokethe, Israel tengkheng-lo, lapen det aputhak Menahem ajakong kepangtangji lapen akerap kelongji aphan laphan la rup lin suri 34 pilo.

²⁰Menahem laso atangka Israel angbong keplang amonit atum pen anutin rup dum 50 papi bor-ilo. Lasi Tiglath Pileser amethang adet chevoijuilo.

²¹Menahem keklem asontin akam Israel Arecho Aphurkimo along tok-et-lo.

²²La thilo lapen pip-lo, lapen la asopo Pekaniah la alar recho cholo.

²³Judah arecho Uzziah recho kecho 50 aningkan ahut Menahem asopo Pekaniah Israel arecho plang-lo, lapen la Samaria along ningkan hini pangrilo.

²⁴Israel atum aphan pap keja abang Nebat asopo Jeroboam Recho akehingno arjan endunsi lata HEMPHU aphan langplotsi pap klemlo.

²⁵Pekaniah aron-asong inut achakri Remaliah asopo Pekah Gilead asor, bang 50 amonit pen pen Samaria along rechohem akut chepachong angdeng arlosi along Pekaniah aphan pathilot-lo, lapen la alar recho cholo.

²⁶Pekaniah keklem asontin akam Israel Arecho Aphurkimo aloh along tok-et-lo.

²⁷Judah arecho Uzziah recho kecho 52 aningkan, Remaliah asopo Pekah Israel arecho plang-lo, lapen la Samaria along ningkan 20 pangrilo.

²⁸Israel atum aphan pap keklem kejapon abang Nebat asopo Jeroboam recho akehingno arjan endunsi lata HEMPHU aphan langplotsi pap klemlo.

²⁹Pekah recho kecho ahutsi Assiria Rechokethe Tiglath Pileser, Ijon, Abel Beth, Maakah, Janoah, Kedesh, Hazor arongsopi-heihei lapen Gilead, Galili lapen Naphtali alongri-heihei cheraidet-lo, rat atum aphan Assiria adet neppon-et-lo.

³⁰Judah arecho Uzziah asopo Jotham recho kecho 20 aningkan ahut Elah asopo Hoshea abang Pekah Recho abethursi laphan pathilot-lo, lapen la alar recho cholo.

³¹Pekah keklem asontin akam an Israel Arecho Aphurkimo along tok-et-lo.

³²Israel arecho Remaliah asopo Pekah recho kecho hini aningkan ahut, Uzziah asopo Jotham ningkan 25 arta ahut Judah arecho plang-lo,

³³lapen la Jerusalem along ningkan 16 pangrilo. La apei Zadok asopi Jerusha.

³⁴Apo Uzziah arjan ensi HEMPHU aphan aning kepadok akam Jotham klemlo.

³⁵Bonta ahok-he karchotap adim-heihei pavirve, lapen rat atum hadak athok-ajir pibomsi mephik anta thorbomlo. Jothamsi la Kardomhemthepi Anirep anghap kimlo.

³⁶Jotham keklem asontin akam an Judah Arecho Aphurkimo along tok-et-lo.

³⁷La recho kecho ahutsi Siria arecho Rezin lapen Israel arecho Pekah kechengsi aphong Judah adet patengkheng jisi HEMPHU nangtoilo.

³⁸Jotham thilo lapen recho athiri David Arongsopi alongsi pip-lo, lapen la asopo Ahaz si la alar recho cholo.