Read Karbi 2 RECHO 16 Bible Online

2 RECHO 16 - Karbi bible

2 RECHO 16

¹Israel arecho, Remaliah asopo Pekah recho kecho 17 aningkan ahut Jotham asopo Ahaz si Judah arecho plang-lo,

²ningkan 20 arta ahut, lapen la Jerusalem along ningkan 16 pangrilo. La aphusar David Recho akeme a-arjan en-esi; la Arnam HEMPHU aning kedokde akamsi klemlo,

³lapen Israel arecho a-arjansi enlo. Israel atum kethe ahut HEMPHU adang pen kephlungtang arat atum karchotap keseke akam charli dunsi kumlin-heihei along isi kephrin athok amethang asopo aphan la arklidet-lo.

⁴Inglong-heihei along ahok-he karchotap adim-heihei lapen thengpi abin kedo alongtin Ahaz thok-lo lapen mephik thorlo.

⁵Siria arecho Rezin lapen Israel arecho Pekah Jerusalem tengkheng-lo, lapen la kompet-lo, bonta Ahaz aphan parem un-edet-lo.

⁶(Halaso ahut Edom arecho Elath arongsopi che-enthudet-lo, lapen hadak kedo a-Judia atum aphan nangphlung et-lo. Elath along Edom aso atum dothipsi nonpu anta hadak dobomlo.)

⁷Laso abirta hadak Ahaz, Assiria arechokethe aphan lolo: “Neli nangli kangduknei abanlo. Vang-ra neliphan Siria lapen Israel arecho atum arideng pen nepajoktha, latum neliphan tengkheng-lo.”

⁸Kardomhemthepi lapen rechohem khipuru pen ser, rup Ahaz ponsi Rechokethe aphan isi adan lolo.

⁹Ahaz Recho kechoningri thaksi Tiglath Pileser, Damaskas abethursi aron-aso pen barlo, lapen la cheraidetsi Rezin Recho aphan pathilot-lo, lapen rat aso aphan Kir anat ponsi beng-lo.

¹⁰Rechokethe Tiglath Pileser aphan kechetong damjisi Damaskas anat Ahaz Recho kedam ahut, hadak la dovan thek-long-lo, lapen Uriah kurusar aphan pachevoisi la asonthot arjan (angrup achak) aboron alirchi-alircha anta palang-et-lo.

¹¹Lasi la asonthot Uriah isi adovan selamlo lapen Ahaz kechevoi aphrang la selampatang-lo.

¹²La Damaskas pen nangkecherui ahut dovan kekimtang Ahaz thek-long-lo,

¹³lasi la pi athok phrinlo lapen la athak sok-sang athok pajirlo, lapen drakha-ahorlang athok dung-lo lapen la athak isi kejelang avi athok pilo.

¹⁴HEMPHU aphan kehodaitang akemi lapen Kardomhemthepi angbong kedo tam adovan la akemi adovan anirep ahin anat Ahaz ponlo.

¹⁵Anke la Uriah aphan hukum pilo: “Adap lapen arnikangsam kephrin athok-heihei aphan lapen recho, rat sok-sang athok-heihei, lapen rat adrakha ahorlang athok-heihei aphan laso nedovan thepile ennon. La athak pi avi dovan athak dungnon. Bonta tam adovan ke ne sang kelangji aphanle binon.”

¹⁶Recho ahukum kepi ateng Uriah klemlo.

¹⁷Kardomhemthepi arlo kerim tam ahemkonglong-heihei ebeng Ahaz Recho enlo, lapen lahei athak kedo aphumang-heihei pasun-et-lo; lapen la jon krehini tam achainong alo anung kedo tam alangpen ta enlo, lapen la isi arlong aputa along bat-lo.

¹⁸Lapen Assiria Arechokethe aphan aning kepangsamjisi Kardomhemthepi apharla along kedo recho anghoi pavedet-lo lapen Kardomhemthepi arlo Recho kelut atovar ingkir chek-lo.

¹⁹Ahaz Recho keklem asontin akam an Judah Arecho Aphurkimo aloh along tok-et-lo.

²⁰Ahaz thilo lapen recho athiri David Arongsopi along pip-lo, lapen la asopo Hezekiah si la alar recho cholo.