Read Karbi 2 RECHO 18 Bible Online

2 RECHO 18 - Karbi bible

2 RECHO 18

¹Israel arecho Elah asopo Hoshea recho kecho kethom aningkan ahut, Ahaz asopo Hezekiah Judah arecho plang-lo,

²la ningkan 25 arta ahut, lapen la Jerusalem along ningkan 29 pangrilo. La apei Abijah, Jekaariah asopi.

³Aphusar David Recho arjan ensi la kopima HEMPHU aning padokkhak ason klemlo.

⁴La ahok-he karchotap adim-heihei pavirlo, arlok archok beng-lo, lapen Asherah arnampi akumlin-heihei beng-et-lo. Nehushtan pu Moses keselam tam apheruita la beng-ilo. Halaso ahut an Israel akhei arat atum man kepi pensi mephik thorlo.

⁵Hezekiah Israel Arnam HEMPHU aphan chikilo; la asonthot akaprek arecho Judah atum longlelang, aphrang seta, laso aphi seta longlelo.

⁶HEMPHU aphan la kroithip-lo, lapen laphan kaiketa kekroimo avelo, bonta Moses aphan HEMPHU kepi ahukum-heihei an kroi pamelo.

⁷Lasi la along HEMPHU dolo, lapen la keklem aling la chunlo. La Assiria Arechokethe abethurlo lapen laphan chehodaimolo.

⁸La Philistia atum aphan paremdet-lo, lapen halatum kedo adim rong pen rongsopi anta phangnolo, Gaza lapen la adung arei alongri anta phangnolo.

⁹Hezekiah recho kecho phli aningkan ahut ke Israel arecho Hoshea recho kecho throksi aningkanlo. Assiria Arechokethe Shalmaneser Israel ketengkhengjisi Samaria kompet-lo.

¹⁰Ningkan kethom aphi Samaria cheraidet-lo, la Hezekiah Recho kecho throk aningkan lapen Hoshea recho kecho sirkep aningkan ahut-lo.

¹¹Assiria Arechokethe Israel aso atum aphan Assiria adet ban pon-et-lo, lapen halatum angbong ajehak atum Hala arongsopi, ajehak atum Habor Aroi adung, la Gozan alongri lapen ajehak atum aphan Media arongsopisi donang-lo.

¹²Samaria virtang-lo pima Israel aso atum halatum a-Arnam HEMPHU aphan kroikre bonta latum HEMPHU pen la kechejok aloh phrilo lapen Moses, HEMPHU aban pen kepi Aron-heihei an kroikrelo. Halatum ano chevarvedet-lo lapen kroithekthe det-lo.

¹³Hezekiah recho kecho krephli aningkan ahut, Assiria Arechokethe Senacherib, Judah apaisong kedo arongsopi-heihei tengkheng-lo, lapen chepahaidet-lo.

¹⁴Senacherib aphan Hezekiah isi abirta lolo, la Lakish alongrisi do: “Nesi kechokchelo, lasi kanghon pen nangli ketengkheng ington iknon, lapen nangli kehang aling neli nangpipo.” Rechokethe akethak-ke Hezekiah la aphan lin surikep arup lapen lin suri isi aser thondam nangji.

¹⁵Kardomhemthepi lapen rechohem khipuru along kedo-an arup Hezekiah aphan pilo;

¹⁶lapen la Kardomhemthepi anghap-heihei pen amethang anghap anujok along ketopvek aser heksi la kedo-an Senacherib aphan thon-damlo.

¹⁷Assiria Arechokethe Hezekiah aphan ketengkhengjisi Jerusalem along isi ongdung aron-armu Lakish pen nangtoilo; laso asong along la achakrikethe bang kethom atum jalo. Latum Jerusalem nanglesi latum athak alangteng pen kevang alang adong akung pe kechok atum kam keklem atovar dothip-lo.

¹⁸Anke latum Hezekiah Recho aphan pahang-lo, lapen la achakri atum bangkethom halatum aphan kechetongjisi damlo; Hezekiah asopo Eliakim, la Rechohem ahemphu; Shebna, Kangsaihem achunbang, Asaph asopo Joah, la ketok kelang ahemphu,

¹⁹halatum angbong inut a-Assiria achakri abang halatum aphan pulo, “Rechokethe kechiniji aninghang, kopisi Hezekiah Recho lapu-an aning chepathir loma.”

²⁰La hang-lo, “Lamthe chot anta ron abidi lapen ajakong adim cherai unji putong kemathama? Assiria kethur pen mane nangrap dun unji putong kemathama?

²¹Nangtum aphan Ijipsi nangrapdunji pu ning kechethema? Bonta hala ke kedam archak aphan arpik achin ke-en asonpo, la ching-lok si nangri tok-lutpo. Lake badutame Ijip arecho aphan kechiki atum lason plangpo.”

²²Assiria achakri ningjebomlang, “Mate nangtum a-Arnam HEMPHU aphantong nangtum chikilo pu nethanjima? Hezekiah, Judah arat atum aphan kepu Jerusalem along kedo adovan isi aphanchotsi HEMPHU kangthir adim lapen adovan-heihei pavirlo.

²³Rechokethe amen pen ne nangtum aphan pu ingtung. Nangtum angbong kardonthek abang longte, ne jonsuri hini alosei nangtum aphan nangpipo!

²⁴Nangtum Assiria angbong kemanmenei achakri alongrekta avedetji, seta nangtum Ijip atum pen ronhemkonglong lapen losei kardon atum nangketoiji ning chethelo!

²⁵Nangtum adet ne ketengkheng lapen kepavir akam la HEMPHU akerap en-epin pen keklemlo pu nangtum mathama? HEMPHU amethangsi nephan la tengkhengnon pu lapen pavirnon pu nethanlo.”

²⁶Anke Eliakim. Shebna lapen Joah chakri aphan thanlo, “Nelitum aphan Aramaik alam penle nethannon, akehai. Nelitum la chini. Ibri alam ningje nangnelo, paisong along kedo arat atum an nang arjudunding-lo.”

²⁷La thak-lo, “Rechokethe lahei kedo-an nephan keningje nangji nangtum lapen recho aphanchot putong nangtum kemathama? Kali, paisong athak kardon halatum ahi kechecho nangji, lapen halatum aphi-ing kechejun nangji arat atum aphanta ne ningjelo, nangning kehang ason thakthekpo.”

²⁸Anke chakri abang arjapdingsi Ibri alam pen hang-lo, “Nangtum aphan Assiria Rechokethe kepu alam arjutha!

²⁹La nangtum aphan nang pacheretoilo, Hezekiah nangtum aphan nangpachobei longri. Nangtum aphan Hezekiah nangrai un-e.

³⁰Lapen la nangtum HEMPHU aphan pachikitoi longri. HEMPHU nangtum aphan nangraipo pu mathari, lapen nangtum arongsopi Assiria atum kechepahemphu pen la khang unpo pu mathari.

³¹Hezekiah alam arjuri. Assiria Rechokethe nangtum aphan ingtan nangkebar pen kechedanji aphan hukum-heihei nangpilo. Nangtum nangmethang drakha aberi pen drakha athe checho longji, lapen nangmethang athebo arong pen athe checho longji, alangtuk pen lang chejun longji.

³²Nangtum aphan Rechokethe nangmethang adet asonthot kaprek adet nangponpetik an, hadak ta drakha arikang pen alang jun longji lapen him aphan soksang longji; la jit athengpi adet, jit ajangthu lapen pijo alang adet. Nangtum jongsi la hukum kepi ateng klemlote thithe, bonta reng-longji. HEMPHU nangtum aphan nangraipo pu Hezekiah nangpachongthui longri.

³³Assiria Arechokethe arideng pen kaprek adet atum aphan halatum a-arnam adet pen pajok unloma?

³⁴Halatum non konat-lo, Hamath lapen Arpad a-arnam? Shepharvaim, Hena, lapen Ivva a-arnam atum konat-lo? Inutbak Samaria aphan rai unloma?

³⁵Netum Arechokethe arideng pen lahei adet atum a-arnam halatum adet cheraithek-loma? Tangte kopisi Jerusalem aphan HEMPHU rai unpo pu nangtum kemathama?”

³⁶Rat atum Hezekiah Recho halatum aphan kepu ateng doklip-lo; halatum la etheta ningje dundedet-lo.

³⁷Anke Eliakim, Shebna lapen Joah halatum aning ke-oi pen ape-ari chingsek-lo, lapen damsi Assiria achakri atum keningje alam recho aphan than pachinilo.