Read Karbi 2 RECHO 19 Bible Online

2 RECHO 19 - Karbi bible

2 RECHO 19

¹Hezekiah arecho halatum kepachini alam arjulong-lok pen aning oisi ape chingsek-lo, lapen HEMPHU a-Kardomhemthepi arlo damlo.

²La Rechohem ahemphu Eliakim, Kangsaihem achunbang, Shebna lapen arta kedo akurusar atum aphan, Amoz asopo Isaiah montri along toilo.

³Laso abirta si halatum Isaiah aphan papidamtoilo: “Pini ke isi kesung arnilo; etum aphan aduk epilo lapen elangremlo; etum ke inut a-arloso oso amahang kepathekpo pu kechesik asonlo, bonta mahang kepathekji aphan ajakong chelongle.

⁴Assiria Arechokethe Kereng-et a-HEMPHU aphan kepinremjisi la kethenei achakri nangtoilo. Nangli Arnam HEMPHU lahei kepinrem alam parjuding nang, lapen laphan kepu atum aphan aduk papinang. Lasi etum arat kerenglang atum aphan Arnam ardompitha.”

⁵Hezekiah Recho abirta Isaiah longsi,

⁶laso akethak lothulo: “HEMPHU pulo, nangliphan Assiria atum pen la nangrai un-epu kepu apot phereri.

⁷Rechokethe aphan pini HEMPHU arki parjulongpo lapen lasi laphan amethang adet pachevoipo, lapen hadaksi HEMPHU laphan pathilotpo.”

⁸Assiria achakri atum chinilo Rechokethe Lakish otang-lo lapen adung Libnah pu arongsopi pen chedanbomlang; lasi laphan karjujisi la damlo.

⁹Ijip aron-armu, Sudan arecho Tirhakah nangjasi Assiria atum aphan ketengkhengjisi vang-lo pu latum lam arjulong-lo. Rechokethe la arjulongsi Judah arecho Hezekiah aphan la epak aloh lolo,

¹⁰La aphan papulo, “Nang kechiki Arnamsi nangphan nangpulo nang nerideng dodepu, bonta la nangphan nangpachobei longri.

¹¹Badu adet aphan tame Assiria arechokethe kepavirjipu chesik lote la kopi klemloma la nang arjulong-lo. Nang jok unji putong kemathama?

¹²Nephusar atum Gozan, Haran, lapen Rezeph arongsopi pavirlo, lapen Telassar along kedo Betheden arat aphan pathi-et-lo, lapen halatum arnam inutbakta halatum aphan rai un-edet-lo.

¹³Hamath, Arpad, shepharvaim, Hena lapen Ivvah arecho atum konat-lo?”

¹⁴Pherangke atum pen Hezekiah Recho loh endetsi la porhelo. Anke la Kardomhemthepi arlo damsi la aloh HEMPHU angno bilo,

¹⁵lapen ardomlo, “O, HEMPHU, Israel Arnam, Arveng kedo api angsong kangni nang inutnatsi Arnamchot lapen pirthe adang adet an kepangri abang. Nangsi pirthe lapen sining pinchong-lo.

¹⁶Non HEMPHU, netum kopi plang-loma nanglangtha. Kereng-et Arnam, Nangphan Senacherib kepinrem an arjutha.

¹⁷Netum kedo-anta chini, HEMPHU, Assiria Rechokethe ke ongdung adet aphan pavirlo, halatum alongle-heihei laparongdet-lo,

¹⁸lapen halatum a-arnam-heihei ta phrinpi-et-lo, halahei ke arnam kali, lahei thengpi lapen arlong akumlin monit ari pen keselam amar chot.

¹⁹Non, netum Arnam HEMPHU, Assiria arideng pen nepajoktha, lasi kedo-an adet atum seta chinipo, Nang inutnatsi Arnam chot, O HEMPHU.”

²⁰Anke Hezekiah Recho aphan kepathanjisi Isaiah kethak abirta lolo,

²¹recho akardom aputhak HEMPHU pulo, “Senacherib, Jerusalem arongsopi nangphan ingnekchoilo,

²²lapen kepinrem abang komat lo chininema? Nang Israel Arnam Kangthir Nephan nepinremlo.

²³Nelong nangpherangke atum pachepindakji aphansi nang nangtoilo. Ronhemkonglong kedo-an pen Lebanon anglong-heihei akangtui an aputhak kehai alam lapen kedar arong kangtuinei lapen Saipras akemenei anta pi-et-lo, lapen nang karnuknei anampi-heihei arlo anta lelo pu chepindak-lo.

²⁴Nang langtuk-heihei lo lapen bang adet-heihei along juilong-lo pu, lapen nang ron-aso akeng-ri Nil Aroi pathep-lo pu chepindak-lo.”

²⁵Ne lahei aphrang pen mang-lo pu nang arjulongle pin langma? Lapen Ne nonla papleng-lo. Paisong kekomchen arongsopi-heihei aputhak keparuji ajakong Ne nangphan nangpitang-lo.

²⁶Halahei along kedo arat atum ajakong avedet-lo, halatum pheresi manghulo. Halatum hidi abap ajeng asonlo mate sarnung angsong arong kevang abap aputhak nihang atomon keso kejap asonlo.

²⁷Bonta Ne nanglam chini-et, nang kopisi keklemma lapen nang konatsi kedamma. Nang kopusonsi nephuthak nangning kethilo Ne chini.

²⁸Nang nangning kethi alam lapen nang kechepindak alam Ne arjulong-lo, lapen non Ne nangnokan lapen nangho arhi pen nang krongplutsi, nangkevang atovar thotsi nangphan nangponthuji.

²⁹Anke Hezekiah Recho aphan Isaiah pulo, “Kopisi plangjima la isi angthek lo. Pening lapen moning anta ingnam asokthe si cholongchotji bonta la aphi aningkan anke nangtum sok achili rik longji lapen la chorot longji lapen drakha arong che-esi la athe-heihei cholongji.

³⁰Judah along kedo kerenglang atum an thengpi arong angkur longle arlo an athe kepathepame asonthotsi plangji.

³¹Jerusalem along lapen Zaion Anglong athak rat atum rengji, pima HEMPHU lason paplangji pu mathathip-lo.”

³²Assiria Arechokethe alam HEMPHU lasonsi pulo: “Laso arongsopi arlo la nanglut-lelo, lapen la aphan thai aso ehongta ap-elo. Rongsopi adung ron-aso atum chong pen vangvelo, lapen la kekompetji aphan longle buibelo.

³³Laso arongsopi lut-le pin pen la kevang atovarthotsi la chevoijuipo. Ne, HEMPHU-si keningjelo.

³⁴Ne methang aman lapen Ne ban David aphan kechechak apot Ne laso arongsopi aphan raipo.”

³⁵Halaso aningve HEMPHU apherangke abang Assiria amukam damsi bang suri 185 aron-aso atum aphan pathilap-lo. Puthot arni halatum kedo-an hadak kethi tichelo!

³⁶Anke Assiria Arechokethe Senacherib la salo lapen Nineveh anat chevoijuilo.

³⁷Arnisi la amethang arnam Nizrok aphan kardomhem arlo karchobom ahut, la asopo banghini, Adrammelek lapen Sharezer, anokjir pen laphan pathilot-lo, lapen latum Ararat adet chepachong damjuilo. La asopo anut kaprek Esarhaddonsi la alar Rechokethe cholo.