Read Karbi 2 RECHO 2 Bible Online

2 RECHO 2 - Karbi bible

2 RECHO 2

¹Mongve atomon pen Elijah aphan Sining kepondetji apor HEMPHU nangletang-lo. Elijah lapen Elisha atum Gilgal anat kedamjisi barlo,

²lapen tovar kedambom ahut Elisha aphan Elijah pulo, “Non dak donon; HEMPHU nephan Bethel anat kedamji aphan hukum pilo.” Bonta Elisha thak-lo, “Ne kekroi HEMPHU amen pen nangliphan semetang-lo neli nangliphan o-un-e.” Lasi halatum Bethel anat dambomlo.

³Hadak kedo montri esong atum Elisha along damlo lapen laphan arjulo, “Nangli hemphu aphan HEMPHU pini nangli pen pondetpo pu chininema?” Kalang, ne chini, Elisha thak-lo. “Bonta laso alam elitum chingki nangne.”

⁴Anke Elisha aphan Elijah pulo, “Non ladak donon; HEMPHU nephan Jeriko kedamji hukum nepitang-lo.” Bonta Elisha thak-lo, “Neli kekroi HEMPHU amen pen nangliphan seme-tang-lo neli nangliphan o-elo.” Lasi halatum Jeriko anat dambomlo.

⁵Hadak kedo montri esong Elisha long damsi laphan arjulo, “Pini nang-lipen nangli hemphu aphan HEMPHU pondetpo pu nangli chininema?” Kalang, neli chini, Elisha thak-lo, “Bonta laso alam elitum chethan nangne.”

⁶Anke Elisha aphan Elijah pulo, “Non ladak dotha; HEMPHU nephan Jordan Aroi anat kedamjisi hukum nepilo.” Bonta Elisha thak-lo, “Neli kekroi a-HEMPHU amen pen nangliphan semetang-lo, neli nangliphan o-elo” lasi halatum dambomlo,

⁷lapen bang 50 amontri atum Jordan an halatum aphi phi dunlo. Langroi along Elijah lapen Elisha sakok-lo, lapen bang 50 amontri atum asap-o chepahelochotsi arjap-lo.

⁸Anke Elijah keche-um ape chephloksi, la arhet-lo lapen lang theng-ilo, lang chephlakdak-lo lapen Elisha pen la longle krengtai ajo hatsi ha parai kap-lo.

⁹Hadak Elisha aphan Elijah pulo, ‘Nephan nepondetde ako nethannon ne nangphan kopisi nangklempi nangjima?’ “Neli, nangli dular keplangji aphan nanglijakong phanni neliphan nethak tekangtha,” pusi Elisha thak-lo.

¹⁰“Lake kepi kesungkrung akecho-ningrilo,” Elijah thak-lo. “Bonta nang la deng longji jongsi nangpen nephan nekepon ahut nangthek dunlong lote; jongsi nang nethekdun longle pulote la nang chodeng longlelo.”

¹¹Latum dambom ahut seta chingki-bomlo; anke menmen amat ehum me alosei pen kevang me ahemkonglong halatum angbong vang-lo lapen Elijah aphan mongve atomon pen sining pondet-lo.

¹²Elisha la thek-longsi Elijah aphan hangserlo, “O po, O po! Israel aphan keraitheknei abang! Nang damtang-lo!” lapen la Elijah aphan puthot thek-longledet-lo. Aningduksi, Elisha amethang keche-um ape achitim ingsekdak-lo.

¹³Anke la Elijah pen keklo ape-um humsi chevoithulo lapen Jordan akung arjaptherlo.

¹⁴La Elijah ape-um pen lang athak theng-lo, lapen pulo, “Elijah a-Arnam HEMPHU konat-lo?” ako la lang theng thulo lapen la chephardak-lo, lapen la ha parai an damlo.

¹⁵Jeriko pen bang 50 amonit atum laphan thek-long-lo lapen pulo, “Elijah ajakong Elisha aphuthak satang-lo!” La aphan kechetongjisi halatum damlo lapen la angno angphun patongkilo,

¹⁶lapen pulo, “Ladak netum bang 50 do, kadokaveta ingtangrak amonit saide. Netum aphan padamlongra nangli hemphu aphan paridam longnon. HEMPHU akarjong laphan ponsi konatne inglong athak mate arlok-heihei otekangbup-lo mene.” Kali, nangtum dam nangne, Elisha thak-lo.

¹⁷Bonta halatum la aphan padam longletik choningrilo. Bang 50 amonit atum damlo lapen nithom inglong kangtui kangdai Elijah aphan ridamlo, bonta laphan longledet-lo.

¹⁸Anke latum Elisha anat chevoilo, la Jeriko along inghongding-lo, lapen halatum aphan la pulo, “Ne dam nangnepu nangtum aphan nangpupe langma?”

¹⁹Jeriko pen ajehak amonit atum Elisha along damlo lapen pulo, “Nangli chinilo, akehai, la isi mesen arongsopi bonta alang meme lapen alongle ta meme.”

²⁰Harlung kemi along ajehak ingti binon, lapen la nelong vannon, la hukum pilo. Halatum la along lahei vanlo,

²¹lapen la ha lang amek along damlo, ingti lang along varlo lapen pulo, “Lasonsi HEMPHU pulo, ‘Laso alang Ne pangthirlo, lapen la along kaike seta kethi mate kephangno vangvelo.’ ”

²²Halaso arni pen nonpu anta laso along ingthirverlo, Elisha plangji pu kepu ateng la plang-lo.

²³Bethel anat kedamjisi Elisha Jeriko olo, lapen isi arongso pen ajehak pinsomar atum vang-lo lapen la aphan chongthuilo, “Ladak pen damnon, O phukoi!” pusi halatum hang-lo.

²⁴Elisha adung arei chelang-lo, halatum aphan lang-lorlo, lapen HEMPHU amen pen halatum aphan ahirjuno hang-lo. Anke jonni athokvam api thengpi arong pen vangsi bang 42 apinsomar atum aphan ingsek-ilo.

²⁵Karmel anglong anat Elisha dambomlo lapen aphi Samaria anat chevoithulo.