Read Karbi 2 RECHO 20 Bible Online

2 RECHO 20 - Karbi bible

2 RECHO 20

¹Lason apor ahut Hezekiah Recho sodet-lo lapen thiji dokdok-lo. Amoz asopo Isaiah montri laphan langdamlo, lapen laphan pulo, “HEMPHU nangliphan pulo, nangli kadokave akam kedo-an chesai nangpo, pima nangli keso memelo. Kethiji aphan chesik nangpo.”

²Hezekiah arpong anat pangnosi arnam ardomlo:

³“Chemathatha, HEMPHU, ne nangphan kroithipsi ahokpet pen nang ingduk-lo, lapen nang nephan nangpaklemtoi akam ansi ne kaike keklemji aphan bor-iverlo.” Lapen la aning kerun pen chirulo.

⁴Isaiah montri recho aphan obup-lo, bonta la kangsaihem angbong chitimlele ako laphan

⁵HEMPHU arat kepangribang, Hezekiah along padamthutoilo, lapen laphan pulo, “Ne HEMPHU, nangphusar David a-Arnam, nang kardom arjulong-lo lapen nang mekkri nangthek-long-lo. Ne nang pamepo, lapen nithom aphi nang Kardomhemthepi dam unpo.

⁶Ne nangphan ningkan 15 nangpareng longjilang. Ne nangphan lapen laso Jerusalem arongsopi, Assiria Arechokethe pen nangpajokpo. Ne laso arongsopi, Ne man lapen neban David aphan kechak apot Ne raivekji.”

⁷Anke recho aphan kelang aban aphan Isaiah pulo, “thebo athe koi-ira la angthum athak hi non lapen la medetpo .”

⁸Hezekiah recho arjulo, “Neli keso HEMPHU nangpamepo, lapen neli nithom aphi Kardomhemthepi along dam unpo pu angthek kopilo?”

⁹Isaiah thak-lo, “HEMPHU kechechak alam ateng klemlo pu la angthek nangliphan nangpipo. Non nangli apor kelang archok aphrang anat kengkam kep padamnangjima, mate aphi anat kengkam kep padam nangji ning hangma?”

¹⁰Hezekiah thak-lo, “Abin kengkam kep aphrang kepadam ke joikeji! Aphi anat-le kengkam kep padamnon.”

¹¹HEMPHU aphan ardomlo lapen HEMPHU kengkam kep Ahaz Recho kesak apor kelang archok abin aphi anat padamlo.

¹²Halaso ahut Bebilon Arecho Merodak Baladan, Baladan asopolo. La Hezekiah sodet alam arjulongsi la loh epak lapen dan nang chelolo.

¹³Hezekiah pherangke atum aphan la akhi, aser, arup, amosala, jangthu nempru, lapen la aron arisim-heihei kedo-an paklang-lo kerim apuru-heihei lapen det adang nahokta halatum aphan kepaklangkle adim avelo.

¹⁴Anke Hezekiah Recho along Isaiah montri damlo, lapen arjulo, “Lahei amonit konat pensi kevang-lo, lapen halatum nangliphan kopisi keningjelo?” Hezekiah thak-lo, “Latum heloving adet Bebilon pensi kevang.”

¹⁵Halatum Rechohem along kopipi lang tekang-lo? Latum kedo-anta lang-et-lo. Halatum aphan ne kepaklangkle apuru avelo.

¹⁶Recho aphan anke Isaiah pulo, “Jakongkethe HEMPHU pulo,

¹⁷nangphusar atum kebitekang amar kedo-an Bebilon adet kepon etji apor nangnelo. Thangnatta bi tekangkelo.

¹⁸Nangso nangsu ajehak atum aphan pondetpo, lapen Bebilon arecho aphan kepangdukjisi kasi endetpo.”

¹⁹Hezekiah laso alam chinilo, la akai arjon ingsamjin lapen akejokvan pen dolong-lo, lasi la thak-lo, “Nang HEMPHU pen neliphan kevan abirta mesenlo.”

²⁰Hezekiah Recho keklem asontin akam, la angthinkethe akam-heihei lapen kosonsi la lang alangteng selamloma lapen rongsopi arlo lang kevan aphan lang adong hut-loma lahei Judah Arecho Aphurkimo aloh along tok-et-lo.

²¹Hezekiah thilot-lo lapen la asopo Manassehsi la alar recho cholo.