Read Karbi 2 RECHO 21 Bible Online

2 RECHO 21 - Karbi bible

2 RECHO 21

¹Judah arecho kecho ahut Manasseh arta ningkan 12 vet-lang, lapen la Jerusalem along ningkan 55 pangrilo. La apei Hephzibah.

²Israel atum kethe ahut HEMPHU kephlungtang adet atum keseketap kehijimmeme akam rimsi HEMPHU aphan langplotsi Manasseh pap klemlo.

³La apo Hezekiah kepavirtang karchotap adim-heihei kimthulo; lapen la Baal karcho aphan dovan kimlo; lapen Israel arecho Ahab keklem ason Asherah arnampi akumlin selamlo. Manasseh chiklolongso-heihei aphan archolo.

⁴HEMPHU kepu laphan Kardomhemthepi arlosi archo nangji pu adim la karchotap adovan-heihei kimlo.

⁵Kardomhemthepi atikup-heihei arlo chiklolongso-heihei adovan kimlo.

⁶La asopo aphan isi kephrin athok ason arklidet-lo, la sangkelang, kepamanghu akam lapen ripak ang-ang kelang, lapen ludep karju-heihei akam chesekelo . La jasemetsi HEMPHU aphan langplotsi pap klemlo, lapen laphan aning papung-lo.

⁷Asherah arnampi akumlin Kardomhemthepi arlo David lapen la asopo Solomon aphan HEMPHU kepu, “Ladak Jerusalem along laso Akardomhemthepi adim helo Ne Israel khei krehini alongri angbong Nephan keparchoji adim ingvailo.

⁸Lapen Israel arat atum jongsi Ne hukum kedo-an kroilote lapen Neban Moses halatum aphan kepi Aron Kangthim, rimpamelote, latum aphusar aphan Ne kepi alongle pen Ne latum aphan phlungphlelo.” Pu adimsi bilo.

⁹Bonta Judah arat atum HEMPHU alam kroikrelo lapen Israel arat kethe ahut HEMPHU kephlungtang adet atum keklem apap an sose pap kethe muchot akam halatum aphan kepaklemjisi Manasseh jalo.

¹⁰La aban montri atum pen HEMPHU pulo,

¹¹“Kanaan aso atum apar kehijimeme akam Manasseh lahei klemlo, lapen la akumlin-heihei pen Judah arat aphan pap anat japonlo.

¹²Lasi, Ne Israel a-Arnam HEMPHU Jerusalem lapen Judah aputhak lapuson akevir vanpo, la karjulong abangphutin thirikjokpo.

¹³Israel arecho Ahab lapen la aso-asu aphan Ne keklem asonthotsi Jerusalem aphanta Ne Samaria aphan keklem asonsi adukpipo, la arat aphan kasu kangthi pharlep pharlo asonsi Jerusalem aphan Ne pavedetpo.

¹⁴Kerenglang ahin aphan Ne obuppo, lapen latum alongle aphuthak kehai lapen markethipon ahotur atum arideng latum aphan Ne hodaidetpo.

¹⁵La Nerat aso aphuthak klempo, pima latum aphusar atum Ijip adet pen kevang ahut pen non pini arni anta latum Nephan langplotsi pap klemlo lapen Nening papung-lo.”

¹⁶Adaikave ke-ongdung arat aphan Manasseh pathi-olo, la ajok Jerusalem atovarpi vi lidung-lo; la laso akam Judah arat kumlin kepardomji anat kejaji klemlo, lapen halatum HEMPHU aphan palangplotsi pap paklemlo.

¹⁷Manasseh keklem asontin alam, la keklem apap-heihei anta Judah Arecho Aphurkimo along tok-et-lo.

¹⁸Manasseh thilo lapen la asopo Amon si la alar recho cholo.

¹⁹Judah arecho kecho ahut Amon arta ningkan 22 vet-lang, lapen la Jerusalem along ningkan hini pangrilo. La apei Jotbah arong pen Haruz asopi Meshullemeth.

²⁰Apo Manasseh asonsi lata HEMPHU aphan langplotsi pap klamlo,

²¹la apo akamsi charlidunlo, lapen la apo karcho akumlinsi la archolo.

²²La aphusar atum a-Arnam HEMPHU aphan kroimolo, lapen HEMPHU ahukum-heihei kroikredet-lo.

²³Amon achakri atum la abe thursi laphan rechohem arlo pathilot-lo.

²⁴Judah arat atum la Amon aphan kepathi abangphan pathisi la asopo Josiah aphan recho pacholo.

²⁵Amon keklem asontin akam Judah Arecho Aphurkimo aloh along tok-et-lo.

²⁶Amon aphan Uzza aberi athiri alongsi pip-lo, lapen la asopo Josiah si la alar rechocholo.