Read Karbi 2 RECHO 22 Bible Online

2 RECHO 22 - Karbi bible

2 RECHO 22

¹Judah arecho kecho ahut Josiah arta ningkan nerkep vet-lang, lapen la Jerusalem along ningkan 31 pangrilo. La apei Bozkath arong pen Adaiah asopi Jedidah.

²HEMPHU angno kopisi akemema Josiah klemlo; la aphusar David Recho arjansi endunlo, Arnam aron Kedo-an jasemet kroipamelo.

³La recho kecho 18 aningkan ahut, kangsaihem achunbang Meshullam asupo, lapen Azaliah asopo Shaphan aphan hukum pisi Kardomhemthepi anat padamtoilo:

⁴“Hilkiah kurusarkethe along damra Kardomhemthepi amangho along kedo akurusar atum rat atum pen ko-an atangka rung-loma aphai endamtha.

⁵Tangka Kardomhemthepi keselam ahemphu aphan le papinon.

⁶Halatum thengpihem kekim abangphu atum aphan lapen arlong kepangni atum aphan; thengpi, lapen arlong kenam atangka pinangji.

⁷Kam keklem ahemphu abang athikpet lasi halahei aphai hang jokphlot-lo.”

⁸Hilkiah aphan Shaphan, recho ahukum lam thanlo, lapen laphan Hilkiah thak-lo isi Aron aloh Kardomhemthepi arlo long-lok-lo. Laphan Hilkiah pilo, lapen Shaphan la porhelo.

⁹anke la thanpachinijisi recho along damlo; “Kardomhemthepi along kedo atangka nangliban atum ponlo, lapen keselam atum arideng la hodailo.”

¹⁰Anke la pulo, “Neli Hilkiah nekepi aloh ladak do,” lapen la recho aphan asepathedung pen porhe parjupilo.

¹¹Loh keporhe recho arjulongsi la kephere pen ape chingsek-lo,

¹²lapen Hilkiah kurusar aphan Shaphan asopo Ahikam aphan Mikaiah asopo Akbor aphan, kangsaihem achunbang Shaphan lapen recho along honbang Asaiah aphan hukum-heihei pilo:

¹³“Damra nepharman lapen Judah arat kedo-an apharman laso loh kopi ethanloma HEMPHU aphan arjudamnon. HEMPHU etum aphan aning jangjepik-lo, pima ephusar atum laso aloh along epaklemtoi akam klemkledet-lo.”

¹⁴Hilkiah, Ahikam, Akbor, Shaphan, laphan Asaiah inut a-arloso Huldah pu montripi Jerusalem kemi ahin anat kedo aphan arjulo. (Bangpi apenan Harhas asupo, lapen Tikvah asopo Shallum, la Kardomhemthepi arri-heihei ahemphulo.) Kopi plang-loma bangpi aphan halatum thanpajirmilo,

¹⁵lapen bangpi latum aphan recho along pachevoitoilo lapen

¹⁶laphan HEMPHU pen lahei abirta paputoilo: “Recho keporhe aloh along ketok ateng Ne Jerusalem lapen la arat kedo-an aphan aduk piji.

¹⁷Halatum Nephan nedengdelo lapen akaprek a-arnam atum aphansi athok-heihei pirong-lo, lahei halatum keklem pen ajok Nening pakang-lo.

¹⁸Recho amethang aphan la helo Ne, Israel a-Arnam HEMPHU kepuji: Loh along ketok ason nang arjulo,

¹⁹Ne kosonsi Jerusalem lapen la arat atum aphan aduk kepiji pu nang arjulong amat Ne ingno ning chiruisi nangmethang chepabihek-lo, nangpe chingseksi chirulo. Isi rat atum kepherememe ahirjuno Ne paplangpo. Bonta Ne nang kardom arjulong-lo.

²⁰Lapen Jerusalem aputhak Ne kepiji aduk nang thithetik pavangvelo. Ne nangphan ingsamjin pen pathilongtoiji.” Laso abirta pen pinso atum Josiah Recho along chevoilo.