Read Karbi 2 RECHO 23 Bible Online

2 RECHO 23 - Karbi bible

2 RECHO 23

¹Josiah Recho kedo-an Judah lapen Jerusalem ajalin atum aphan hangpet-lo,

²lapen halatum Kardomhemthepi anat damrappet-lo. Aphi aphi kurusar atum lapen montri atum lapen kedo-an arat atum keplang lapen keduk anta eteng isi damlo. Halatum kedo-an angno Kardomhemthepi arlo kelong kechejok aloh recho abang asekethe pen porhepilo.

³La recho anujok adung arjapsi HEMPHU aphan kepakroijisi la Aron lapen ahukum-heihei ning ajakong kedo-an lapen karjong ajakong kedo-an pen kekroithekjile lapen kechejok aloh along ketoktang kehang aling kecheseke nangji an aphan kechejok aloh pathik-lo, lapen kedo-an arat kechejok aloh kerimpetji aphan chechak-lo.

⁴Anke kurusarkethe aphan Hilkiah lapen la rapbang akurusar atum lapen Kardomhemthepi amangho keton abangphu aphan Baal, Asherah arnampi lapen chiklolongso-heihei aphan karcho amar kedo-an Kardomhemthepi arlo pen ingtan pavardam-etjisi Josiah hangpet-lo. Kidron Arlok adung rongsopi angtan along lahei amar an recho me phrin-et-lo, lapen athek-lo aduk ha Bethel anat ponlo.

⁵Karchotap adovan-heihei along kepaklemji Judah arecho atum kebat akurusar atum Judah arongsopi-heihei along lapen Jerusalem adung arei adim Baal, arni, chiklopi, akaprek apirthe lapen chiklolongso-heihei aphan karkli akurusar kedo-an aphan la akam pavedet-lo.

⁶Kardomhemthepi arlo pen Asherah arnampi nangnak rongsopi angtan ponsi Kidron Arlok along la mephrindut-lo, lapen la athek-lo paduk-isi rat athiri along tailo.

⁷Kardomhemthepi arlo kedo akhat-kave atum kedo ahem phrilo. (Asherah aphan karcho ape arloso atum hadak thak-lo.)

⁸Judah arongsopi-heihei along kedo akurusar atum aphan la Jerusalem along van-et-lo, lapen halatum karkli adovan-heihei det adang adim an pasa-ur et-lo. Rongsopi a-Govornor kekim anghap adung kedo bi hi-i aphan kepanong adovan phangnolo, la rongsopi anghap kelutdam arvi anat.

⁹Halatum akurusar atum aphan Kardomhemthepi along pangduk longledet-lo, bonta halatum aphan arisangho akurusar atum aphan kepi thapkave ahim chodun unlo.

¹⁰Hinnom Arlok along kedo karchotap, Tophith pu adim Josiah Recho pasa-ur-et-lo, anke baduta asopo mate asopi isi kephrin athok Molek arnam aphan arkli longledetpo.

¹¹Judah arecho atum arni aphan karchojile kepanong alosei-heihei la terek et-lo, lapen laso karchoji aphan ke-en aronhemkonglong-heihei la me phrin-et-lo. (Lahei Kardomhemthepi atikup anghap adung lapen inut achakri kethe Nathan Melek kedo ahem pen tebok-het alongsi bilo.)

¹²Ahaz Recho kedo rechohem asarnung angsong Judah arecho atum kekim asong adovan-heihei Josiah Recho phangnolo, Kardomhemthepi along Manasseh Recho keparjap atikup-heihei along adovan-heihei anta phangnolo ; la dovan-heihei theng-i-si lahei Kidron Arlok along vardamlo.

¹³Oliv anglong nitur anat lapen Jerusalem anihang anat Solomon Recho kekim Kehijimmeme akumlin-heihei Astarte la Sidon arnampi aphan adovan, Moab arnam Kemosh adovan, lapen Ammon a-arnam Molek adovan-heihei Josiah pasa-ur-et-lo.

¹⁴Josiah Recho arlong archok-heihei beng-ilo. Asherah arnampi akumlin angthek-heihei ingthan-ilo, lapen halatum keparjap adim monit arrepi pen bapthip-lo.

¹⁵Israel aphan pap anat kejapon abang Nebat asopo Jeroboam Recho kekim Bethel along karcho adim-heihei anta Josiah phangnolo. Dovan sat-et-lo, la arlong pangje-ilo , lahei aduk paplang-et-lo; lapen la Asherah akumlin-heihei me phrinlo.

¹⁶Anke Josiah adung arei lang-lo lapen ajehak athiri inglong angsong thek-long-lo, halatum pen ajehak arrepi la ensi dovan athak thorlo. Lasonsi la dovan pasa-urlo, ajirdingklui aphrang rong-aje ahut Jeroboam Recho dovan akung karjapding ahut montri keningje alam atengsi klemlo. Josiah recho adung arei lang-lo lapen laso alam kemontri amontri athiri thek-long-lo.

¹⁷Hala komat athirilo? La arjulo. Bethel arat atum thak-lo, “La Judah pen kevang amontri athirilo, lapen nangli laso adovan athak keklemtang alam alangli montri tekang-lo.”

¹⁸Laso ateng la padothot lonang, Josiah hukumpilo. “La arrepi papho nangnelo.” Lasi la arrepi ot-edet-lo, lapen Samaria pen kevang amontri atum arrepi ta ot-edet-lo.

¹⁹Israel arongsopi alongtin Israel arecho atum kekim karcho pangtar adim-heihei Josiah Recho phangnolo, pima lahei HEMPHU aning papung-lo. Halahei adovan Bethel along la keklemtang asonthotsi la klemlo.

²⁰Halahei adovan along kangduk ahok-he akurusar atum an aphan lapathi-et-lo, lapen alongritin adovan along monit arrepi phrinlo. Ansi la Jerusalem chevoilo.

²¹Kechejok aloh along ketok ateng halatum a-Arnam HEMPHU anong aphan Kejok amei ketalonjisi rat aphan Josiah Recho hukumpilo.

²²Kangsai atum det kepangri arni pen lason Kejok Amei Israel lapen Judah arecho atum baduta talonle pinlang.

²³Non kejut ahut, Josiah Recho kecho 18 aningkan, Kejok Amei Jerusalem along talonlo.

²⁴Kardomhemthepi arlo Hilkiah Kurusarkethe kelong Aron-heihei ketoktang an kepakroipetji aphan Jerusalem lapen Judah adet adang an kedo sangkelang atum, ripak ang-ang kelang atum lapen hem a-arnam-heihei, kumlin-heihei lapen kaprek ahok-he karcho amar-heihei kedo-an pavedet-lo.

²⁵HEMPHU aphan aning ajakong kedo-an pen, apran ajakong kedo-an pen lapen abang ajakong kedo-an pen kangduk lapen Moses Aron kekroi arecho alanglison alangli-phrang nahokta avepinlang.

²⁶Bonta Manasseh Recho keklem-tang akam ajok Judah aputhak HEMPHU aningkethi non anta la jonjelang.

²⁷HEMPHU pulo, “Israel aphan Ne keklem asonthotsi Ne Judah aphanta klempo! Ne mek angden pen Judah arat aphan phlung-etpo, lapen Ne kangvaitang arongsopi lapen Kardomhemthepi Nephan karcho adimlo, pu Ne kepu a-Jerusalem aphan Ne dengdelo.”

²⁸Josiah keklem asontin Judah Arecho Aphurkimo aloh along tok-et-lo.

²⁹Josiah Recho kecho ahut, Assiria Arechokethe aphan kerap dunjisi Ijip arecho Neko isi ron-aso esong Euphratis Aroi an jalo. Josiah Recho, Ijip aron-armu aphan Megiddo along khangdunlo lapen ron along thinang-lot-lo.

³⁰La achakri atum la abang arpum ronhemkonglong athak batsi Jerusalem anat vandet-lo, lapen laphan recho athiri along pip-lo. Judah arat atum, Josiah asopo Joahaz aphan ingvailo lapen recho kebat ajangthu patip-lo.

³¹Judah arecho kecho ahut Joahaz arta ningkan 23 vet-lang, lapen la Jerusalem along chiklo jon thom pangrilo, la apei Libnah arongsopi pen Jeremiah asopi Hamutal.

³²Aphusar atum arjan endunsi lata HEMPHU aphan langplot pen pap klemlo.

³³Hamath adet, Riblah along Ijip arecho Neko laphan nepponchek-lo, la amat la kepangri jutkok-lo, lapen Judah adet aphan rup lin 3,400 lapen ser lin 34 papinang-lo.

³⁴Josiah asopo Eliakim aphan Neko, Josiah alar Judah arecho bat-lo, lapen la amen larsi Jehoiakim irlo. Joahaz aphan Neko Recho Ijip adet pondet-lo, lapen hadak la thilot-lo.

³⁵Ijip arecho kehang amidu kepaplengji aphan Jehoiakim rat atum akhi ajakong kedo-an ateng pen midu rung-lo.

³⁶Judah arecho kecho ahut Jehoiakim arta ningkan 25 vet-lang, lapen la Jerusalem along ningkan 11 pangrilo. La apei Pedaiah asopi Zebidah, Rumah arong pen.

³⁷Aphusar atum arjan ensi la HEMPHU aphan langplotsi pap klemlo.