Read Karbi 2 RECHO 25 Bible Online

2 RECHO 25 - Karbi bible

2 RECHO 25

¹Bebilon arecho Nebukadnezzar abe Zedekiah thurlo, lasi la ron-armu kedo-an pen vangsi Zedekiah Recho kecho sirkep aningkan kep achiklo, niphai kep arni Jerusalem tengkheng-lo. Rongsopi angtan halatum mukam kimsi la kekompetji aphan paisong kimlo,

²Zedekiah Recho kecho kre isi aningkan chokchetik la kompet-lo.

³Halaso aningkan, phli achiklo , niphai sirkep arni, rat atum kechoji ason avepin kehingno akhim thurlo,

⁴lapen paisong-heihei phridak-lo. Bebilon asor rongsopi kompet seta, ajo kangting ahut ron-aso atum kat-et-lo. Halatum Recho aberi pen arpong hini kechetok atovar pen damlo, lapen Jordan Arlok anat kat-lo.

⁵Bonta Zedekiah Recho aphi aphi Bebilon aron-armu atum hung-lo lapen Jeriko adung athoi along laphan nepchek-lo, lapen la aron-aso atum laphan otekangbup-lo.

⁶Riblah along kedo Nebukadnezzar Recho along Zedekiah aphan pondet-lo, lapen hadak laphan ingsailo.

⁷Zedekiah asomar aphan la amek angdeng kepathi pachelang dunding ahut Zedekiah aphan Nebukadnezzar amek pahor-et-lo, lapen ingchin arri pen ingnangsi laphan Bebilon adet pondet-lo.

⁸Bebilon arecho Nebukadnezzar recho kecho 19 aningkan, pho achiklo, throksi arni, recho aphan thanparebang, lapen la aron-armu ahemphu, Nebuzaradan, Jerusalem nanglut-lo.

⁹La Kardomhemthepi, rechohem, Jerusalem along arlengkethe atum ahem-heihei kedo-an me keilo.

¹⁰Lapen la aron-aso atum rongsopi apaisong-heihei phri-et-lo.

¹¹Anke rongsopi along kedo ahin kam keklemthek arat aphan Nebuzardan ha Bebilon adet pon-et-lo, ri asai keklemthek ahin amonit atum. Lapen Bebilon asor ke-otekang amonit anta pon-et-lo.

¹²Bonta la Judah angbong keduknei amonit, ahem arit kave atum aphan otekang-lo, lapen halatum aphan drakharikang aberi lapen hidi-heihei along kam paklemtoilo.

¹³Bebilon asor tam a-archok-heihei lapen Kardomhemthepi arlo kedo chainong ahemkonglong-heihei, lapen tam alangpenthepi kedo-an beng-etsi kedo-an atam angchin latum Bebilon adet pon-et-lo.

¹⁴Dovan kepangthir ke-en-i abevuk lapen thek-lo aphule-heihei latum pon-et-lo. Melur kangtip ajohton, lapen karkli ahut vi kedu dun aharlung, lapen mephik aduk kethor-i ajohton-heihei lapen akaprek tam amar-heihei Kardomhemthepi along kangduk ason an pon-et-lo.

¹⁵Ser mate rup pen keselam amar an harlungso lapen me akri kepon-i aphuleso anta latum pon-et-lo.

¹⁶Tam angchin pen Solomon Recho keselam archok hongni, chainong ahemkonglong-heihei lapen langpenthepi-heihei kelinji ardikpik.

¹⁷Hongni archok ke thekdak, ahongtin ta keding ingrup 18 lapen athak tam angchin aphu do, lapen la kangtui ingrup kethom do, aphutin along paivokak adalim athe tam angchin pen keselam la pakomchensi alon pilo.

¹⁸La apar ron-armu ahemphu Nebuzaradan, kurusarkethe Seraiah, lapen la adun Jephaniah kurusar aphan lapen akaprek Kardomhemthepi bangkethom a-arlengkethe atum aphan pondet-lo.

¹⁹Rongsopi la ron-asong ahemphu, rongsopi along kedo bomlang ahut recho aphan thanparebang bang pho, ron kechedan alam kerim abangphu, la ron ahukum kepi adun ahemphu lapen akaprek bang 60 arlengkethe aphan pondet-lo.

²⁰Hamath adet Riblah along kedo Bebilon arecho alongsi halatum aphan Nebuzaradan ponlo.

²¹Hadak recho halatum aphan arbulo lapen pathi-et-lo. Lasonsi Judah arat aphan halatum adet pen ban pondet-lo.

²²Shaphan asupo, lapen Ahikam asopo Gadaliah aphan Bebilon arecho Nebukadnezzarsi Judah a-Govornor bat-lo, lapen Bebilon adet keponpe arat aphan kepalang ahemphu arpu laphan pilo.

²³Judah achakri atum lapen kechehodaide aron-aso atum la arjulong-lok pen halatum Gadaliah along Mizpah along chelangdunlo, lahei achakri atum Nethaniah asopo Ishmael atum Kareah asopo Johanan, Tanhumeth asopo Seraiah, Netophah arong pen, lapen Maakah pen Jezaniah.

²⁴Halatum aphan Gadaliah pulo, “Bebilon achakri atum aphan nangtum kephereji akam avelo, pusi ne nangtum aphan chechak-lo, laso alongle along le donon, lapen Bebilon arecho aphan ingduknon, anke nangtum aphan ajatta mesenpo.”

²⁵Bonta halaso aningkan amat throksi achiklo, Nethaniah asopo Ishmael lapen Elishama asupo, la inut rechohem asor abangphulo, bang 10 amonit pen Mizpah damsi Gadaliah aphan tengkheng-lo lapen laphan pathilot-lo. La along kedo Israel aso lapen Bebilon asor aphanta la pathilo.

²⁶Anke Israel kedo-an keplang keduk kedo-an ron-armu achakri atum pen pen osi Ijip adet damjuilo, pima halatum Bebilon asor aphan pherelo.

²⁷Evilmerodak Bebilon arecho kecho ahut, la Judah arecho Jehoiachin aphan kebeng pen pajoksi kangjinso paklang-lo. Jehoiachin aphan kebeng poncheng pen ningkan 37 kechok, lapen krehini achiklo niphai ingkoira throksi arni la plang-lo.

²⁸Laphan Evilmerodak ingjinsolo lapen akaprek Bebilon adet along ban kedun arecho atum apar laphan amankethe kedo anghoisi pilo.

²⁹Lasi Jehoiachin aphan kebeng achoi pachelar long-lo, lapen akai dotik an recho an kecho atebul along chodunlong-lo.

³⁰Arnivang la akenangsot atangka la rengtik an laphan pilo.