Read Karbi 2 RECHO 3 Bible Online

2 RECHO 3 - Karbi bible

2 RECHO 3

¹Judah arecho Jehoshaphat Recho kecho 18 aningkan ahut Ahab asopo Joram Israel arecho plang-lo, lapen la Samaria along ningkan 12 pangrilo.

²La HEMPHU aphan langplotsi pap klemlo, bonta la apo lapen apei Jezebel ason an kehingno abang kali; la apo keselam Baal aphan karcho akumlin-heihei anujok sat-et-lo.

³Seta la aphrang Nebat asopo Jeroboam Recho asonsi la Israel aso aphan pap keklem japonlo lapen khang un-edet-lo.

⁴Moab arecho Mesha biresak pangreng-lo, lapen aningkanvangta la Israel arecho aphan biresak aso jon suri 100 lapen jon suri 100 abiresak angmi amidu pilo.

⁵Bonta Israel arecho Ahab thilot aphi, Mesha Israel abe thurkrap-lo.

⁶Tongsekotsi Joram Recho Samaria osi la ron-asong kedo-an pangrumlo.

⁷La Judah arecho Jehoshaphat aphan lamthe isi lolo: “Moab arecho nebe thurtang-lo; lapen kechedanji aphan nangli nangchelang dunjima?” Dunji, pusi Jehoshaphat Recho thak-lo, “Ne lapen ne-monit, ne losei anta nangrideng-lo.

⁸Ketengkhengji aphan koloso atovar ke-ensi kemejima?” Tovar keding Edom akejejangtang ajo sodingle damlonang, Joram thak-lo.

⁹Lasi Joram Recho lapen Judah arecho, lapen Edom arecho atum barlo. Ni throksi dambom aphi, halatum lang dordedet-lo, lapen monit lapen pi aphanta lang avedet-lo.

¹⁰“Cheplang-lo!” Joram Recho hangserlo, “Etum bangkethom aphan Moab arecho arideng HEMPHU ehodaitang-lo!”

¹¹Jehoshaphat Recho arjulo, “Ladak HEMPHU aphan karjuji inutbak amontri doma?” Joram Recho aron-armu achakri inut thak-lo, “Shaphat asopo Elisha ladak do. La Elijah arapbang-lo.”

¹²La inut ahok amontrilo, Jehoshaphat Recho pulo. Lasi bangkethom arecho atum Elisha along damlo.

¹³Neli kopisi nanglirap nangpo? Israel arecho aphan Elisha pulo, “Nanglipo lapen nanglipei karju amontri atum along dam iknon.” Kali! Joram thak-lo, “la HEMPHU-si netum bangkethom arecho atum aphan Moab arecho arideng hodailo.”

¹⁴Elisha thak-lo, “Ne kangduk kereng-et a-HEMPHU amen pen neli semetang-lo, nangli kechelang Judah arecho Jehoshaphat aphan neli man pipedet asonte nangli pen neli thangnat akam ave pusi neli puji,

¹⁵seta non neli inut aduhuidi neripitha.” Duhuidi abang la akumbeleng ardengsi Elisha aphuthak HEMPHU ajakong vang-lo,

¹⁶lapen la pulo, “HEMPHU kepu alam la helo: ‘Kekrengtai alangjeng akung an kurdong hut et nangji.

¹⁷Nanglitum arve mate tomon thek-longledet seta laso alangjeng langsi plengsetpo, lapen nanglitum, nanglitum api kedo-an lapen nanglitum karthang api kedo-an jun dorphlupji.’”

¹⁸Elisha ningje bomlo, “Bonta lahei ke HEMPHU aphan kejoi ke akamlo; lapen Moab atum aphuthak seta la nangpahaidetpo.

¹⁹Halatum kedo-an akelangme pairaikom arongsopi-heihei nanglitum hai unji, halatum thesere arong-heihei anta teng longetji, langmek-heihei khang unji lapen aho-or kedo ahidi ajo arlong-heihei kerikthip pen ajok halatum ahidi pavir unji.”

²⁰Puthot adap kaike adap athok ahut apor, Edom anat pen lang nanglesi longle dithip-lo.

²¹Bangkethom arecho atum ketengkhengjisi vang-lo pu Moab arecho arjulongsi akesarnei pen akebinei latum ron arisim kerimthek atum an aphan hangpetsi ahoi along chington damlo.

²²Puthot adap halatum thurlo, lang athak arni atur tursi la vi ason prung-ang-lo.

²³“La vi saidelo!” pusi halatum hangserlo. “Bangkethom hotur aron-armu atum halatum hijan chedansi chepathi-et-lo tahai! Etum damra halatum amar mukam along thidam lonang!”

²⁴Bonta halatum mukam kele ahut Israel aso atum halatum aphan tengkheng-lo lapen phlungsi pachevoilo. Israel atum hungdun bomsi Moab aso aphan pathi-et-lo,

²⁵lapen halatum arongsopi kedo-an pavirlo. Halatum aho-or kedo alongle lesi laso athak abangphutin a-Israel aso arlong hidi plengsetsetik varlo; halatum lang amek ta khangchek-lo lapen thesere arong-heiheita chorpi-et-lo. Kejutsi det arongsopi Kir Heres an chot-lo, lapen bathuli ke-ap atum la kompetsi laphan tengkheng-lo.

²⁶Moab arecho ron keremlo pu chechinisi la bang 700 nokjir kerim amonit cheponsi hotur aren anat atovar cheselam bor-isi Siria arecho anat katjuiji pulo, bonta la chunchedet-lo.

²⁷Lasi la alar recho kechoji abang aso akleng aphan rongsopi apai along Moab arnam aphan arklidet-lo. Israel atum pheresi rongsopi pen chiruilo lapen adet methang chevoi-et-lo.